This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുമുദേന്ദു
സര്‍വ്വവിജ്ഞാനകോശം സംരംഭത്തില്‍ നിന്ന്
കുമുദേന്ദു
ഷട്‌പദീഛന്ദസ്സിൽ രാമായണമെഴുതിയ ഒരു കന്നഡ കവി. ജൈനമതാനുയായിയായ ഇദ്ദേഹം 13-ാം ശതകത്തിന്റെ ഉത്തരാർധത്തിൽ ജീവിച്ചിരുന്നു. പദ്‌മനന്ദിവ്രതി പിതാവും അർഹണന്ദിവ്രതി പിതാമഹനുമാണെന്ന്‌ കവി സ്വയം പ്രസ്‌താവിച്ചിട്ടുണ്ട്‌. ഇരുവരും ആഗമനാടക തർക്കവ്യാകരണാദിവിഷയങ്ങളിൽ അപ്രതിമമായ പാണ്ഡിത്യം നേടിയിരുന്നതായി അവരുടെ ബിരുദങ്ങളിൽനിന്നു മനസ്സിലാക്കാം. സിദ്ധാന്ത ചക്രവർത്തിയെന്നു പ്രസിദ്ധി നേടിയ മാഘാനന്ദാചാര്യനായിരുന്നു ഇദ്ദേഹത്തിന്റെ ഗുരു. കുമുദേന്ദുവും അസാമാന്യ പണ്ഡിതനുമായിരുന്നു. പരവാദിഗിരിവജ്രം, വാദിഗജകേസരി, കവിരാജശിഖാമണി, സരസകവിതിലകന്‍ മുതലായ ബിരുദങ്ങള്‍ ഇക്കാര്യം വ്യക്തമാക്കുന്നു.
കുമുദേന്ദു രാമായണം ആണ്‌ ഇദ്ദേഹത്തിന്റെ മുഖ്യകൃതി. രാമചന്ദ്രന്‍ സീതാലക്ഷ്‌മണന്മാരോടൊപ്പം അയോധ്യയിൽ മടങ്ങിയെത്തുന്നതുവരെയുള്ള കഥാഭാഗമാണ്‌ ഇതിലുള്ളത്‌; പമ്പരാമായണം പോലെയുള്ള പൂർണകൃതിയല്ല. ഇന്നു പ്രസിദ്ധീകരിച്ചിട്ടുള്ള കൃതിയിൽ എട്ടു സന്ധികളാണുള്ളത്‌. ഇതിലെ രാമകഥ വിമലസൂരി സമ്പ്രദായത്തെയാണ്‌ അവലംബിക്കുന്നത്‌. "പമ്പരാമായണ'വും ഇതിനെ സ്വാധീനിച്ചിട്ടുണ്ട്‌. എല്ലാത്തരത്തിലുള്ള ഷട്‌പദീഛന്ദസ്സുകളും ഇതിൽ പ്രയോഗിച്ചിരിക്കുന്നു. ഓരോ സന്ധിയിലും ഓരോ ഷട്‌പദീഭേദമാണ്‌ കാണുന്നത്‌. രണ്ടു സന്ധികളിൽ താളസൂചനയുണ്ട്‌. ചില സ്ഥലത്തു ഛന്ദസ്സിൽ ശൈഥില്യവും കാണുന്നു. അർഥപുഷ്‌ടി, രസസ്‌ഫൂർത്തി, ഗുണാലങ്കാര പൗഷ്‌കല്യം മുതലായവ ഈ കാവ്യത്തിന്റെ പ്രത്യേകതകളാണ്‌. കവി ഭാഷാപ്രയോഗത്തിൽ സിദ്ധഹസ്‌തനാണ്‌. ഗേയകാവ്യമെന്ന നിലയിൽ കർണാടകത്തിൽ ഇതിനു കൂടുതൽ പ്രചാരമുണ്ട്‌. പക്ഷേ "പമ്പരാമായണ'ത്തിന്റെ മുമ്പിൽ കുമുദേന്ദു രാമായണം മങ്ങിപ്പോകുന്നു.
