This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുട്ടിത്തേവാങ്ക്‌
സര്‍വ്വവിജ്ഞാനകോശം സംരംഭത്തില്‍ നിന്ന്
കുട്ടിത്തേവാങ്ക്‌
Slender loris
പ്രമേറ്റ്‌ വർഗത്തിൽപ്പെട്ട ഒരു സസ്‌തനി. തേവാങ്കുകള്‍ മൊത്തത്തിൽ "ലെമൂർ' എന്ന പേരിലാണറിയപ്പെടുന്നത്‌. കാഴ്‌ചയിൽ മനുഷ്യരോട്‌, വാനരന്മാർക്കുള്ളിടത്തോളം സാമ്യം ഇവയ്‌ക്കില്ല. എങ്കിലും കൈകാലുകളുടെയും ആന്തരികാവയവങ്ങളുടെയും തലച്ചോറിന്റെയും ഘടനയിൽ മനുഷ്യരോടും വാനരന്മാരോടും ഇവയ്‌ക്ക്‌ വളരെ അടുപ്പമുണ്ട്‌. ലെമൂർ വിഭാഗത്തിലെ ലോറിസിഡേ കുടുംബത്തിലുള്ള രണ്ടിനം തേവാങ്കുകള്‍ മാത്രമേ ഇന്ത്യയിൽ ഇന്നു ജീവിച്ചിരിപ്പുള്ളൂ-തോവാങ്കും (Slow loris) കുട്ടിത്തേവാങ്കും (Slender loris). ആഫ്രിക്കയിലും തെക്കുപടിഞ്ഞാറന്‍ ഏഷ്യയിലും ഇവ കാണപ്പെടുന്നു.
ഉരുണ്ട തലയും വലിയ വട്ടക്കണ്ണുകളുമുള്ള കുട്ടിത്തേവാങ്കിന്റെ ശാ.നാ.: ലോറിസ്‌ ടാർഡിഗ്രാഡുസ്‌ (Loris tardigradus). വളർച്ചയെത്തുമ്പോള്‍ 20-25 സെ.മീ. നീളം കാണും; 280 മുതൽ 340 ഗ്രാം വരെ ഭാരവും. വാൽ ഇല്ല എന്നുതന്നെ പറയാം. ആണിനെ അപേക്ഷിച്ച്‌ പെണ്ണിന്‌ പൊതുവേ വലുപ്പവും ഭാരവും കുറവാണ്‌. ഉറച്ച ഉടലും നേർത്ത കൈകാലുകളുമാണ്‌ ഇവയ്‌ക്കുള്ളത്‌. ദേഹമാസകലം സമൃദ്ധമായ രോമപാളികളുണ്ട്‌. ചെവി നീണ്ടതും മൂക്ക്‌ കൂർത്തതുമാണ്‌. അടുത്തടുത്തു സ്ഥിതിചെയ്യുന്ന രണ്ടുവലിയ വട്ടക്കണ്ണുകള്‍ മൂങ്ങയെ ഓർമിപ്പിക്കുന്നു. പൊതുവേ വെളുപ്പ്‌, തവിട്ട്‌ എന്നീ നിറങ്ങളും അപൂർവമായി ചാരനിറവും ഇവയുടെ പുറംചട്ടയ്‌ക്കുള്ളതായി കാണാം. ഇവയുടെ കണ്ണുകള്‍ക്കു ചുറ്റും കറുപ്പ്‌, തവിട്ട്‌ എന്നീ നിറങ്ങളിലുള്ള വളയങ്ങളുണ്ട്‌.
തെക്കേ ഇന്ത്യയും ശ്രീലങ്കയുമാണ്‌ കുട്ടിത്തേവാങ്കിന്റെ ആവാസകേന്ദ്രങ്ങള്‍. വനാന്തർഭാഗങ്ങളിലെന്നപോലെ വനത്തിന്റെ പ്രാന്തപ്രദേശങ്ങളിലും ഇവ വളരുന്നുണ്ട്‌. ആരുടെയും കണ്ണിൽപ്പെടാതെ രഹസ്യജീവിതം നയിക്കുന്ന രാത്രിഞ്ചരന്മാരാണ്‌ ഈ ജീവികള്‍. മുഴുവന്‍ സമയവും മരക്കൊമ്പുകള്‍ക്കിടയിൽ ഒളിച്ചിരിക്കുന്ന സ്വഭാവം ഇവയ്‌ക്കില്ല. രാത്രികാലത്ത്‌ ഇടയ്‌ക്കിടെ തീറ്റതേടി കുറ്റിച്ചെടികളിലേക്ക്‌ ഇറങ്ങിവരികയും, ചിലപ്പോള്‍ നിലത്തുകൂടി ഓടി വേറൊരു മരത്തിൽച്ചെന്നു കയറുകയും ചെയ്യും. പകൽസമയം മുഴുവനും ഗാഢനിദ്രയിലായിരിക്കും. ആ അവസരങ്ങളിൽ മരച്ചില്ലയിലെ പച്ചിലകള്‍ക്കിടയിൽ ഒളിച്ചിരിക്കുന്ന ഇവയെ കണ്ടുപിടിക്കാന്‍ എളുപ്പമല്ല. നേരം സന്ധ്യയാകുന്നതോടെ മെല്ലെ ഇറങ്ങി അലയാന്‍ തുടങ്ങും. പൂച്ചെടി (അരിപ്പൂ)ക്കായ്‌കളാണ്‌ ഇവയ്‌ക്ക്‌ ഏറെ പഥ്യം. ഓന്ത്‌, ചെറുകിളികള്‍, മരത്തവള എന്നീ ജീവികളെയും ഇവ പിടിച്ചുതിന്നാറുണ്ട്‌. ജീവനുള്ള ഒരു ഇരയെ അടുത്തുകണ്ടെത്തിയാലുടന്‍ കാലുകള്‍ ഉറപ്പിച്ചു നിവർന്നുനിന്ന്‌ രണ്ടു കൈകളുംകൊണ്ട്‌ ക്ഷണം അതിനെ അള്ളിപ്പിടിക്കും. കൈയിൽ കിട്ടിയ ഇര നിമിഷത്തിനുള്ളിൽ വായ്‌ക്കുള്ളിലാകും. ഇലയിൽ പറ്റിയിരിക്കുന്ന വെള്ളത്തുള്ളികള്‍ വിരലിൽ എടുത്ത്‌ ഊറ്റിക്കുടിക്കുന്നു. പാത്രത്തിൽ വെള്ളം വച്ചുകൊടുത്താൽ കൈകള്‍ ഉപയോഗിക്കാതെ നക്കിക്കുടിക്കാനും ഇവയ്‌ക്കറിയാം.
ഒറ്റയ്‌ക്ക്‌ ജീവിതം കഴിച്ചുകൂട്ടുവാനിഷ്‌ടപ്പെടുന്ന ജന്തുക്കളാണ്‌ കുട്ടിത്തേവാങ്കുകള്‍. ഇവയുടെ ലൈംഗികജീവിതത്തെ സംബന്ധിക്കുന്ന വളരെ കുറച്ചുവിവരങ്ങള്‍ മാത്രമേ അറിവായിട്ടുള്ളൂ. ഏകദേശം 170 ദിവസമാണ്‌ ഗർഭകാലം. ഒരു പ്രസവത്തിൽ ഒറ്റക്കുട്ടിയാണ്‌ പതിവെങ്കിലും അപൂർവമായി ഇരട്ടകളെയും പ്രസവിക്കാറുണ്ട്‌. കുഞ്ഞിനു പകുതി വളർച്ചയെത്തുന്നതുവരെ തള്ള മുലയൂട്ടുന്നു.
ഒട്ടനവധി അന്ധവിശ്വാസങ്ങള്‍ ചൂഴ്‌ന്നുനില്‌ക്കുന്ന ഒരു ജീവിയാണ്‌ കുട്ടിത്തേവാങ്ക്‌. മന്ത്രവാദങ്ങള്‍ക്കും, കണ്ണുചികിത്സയ്‌ക്കും വേണ്ടി ഇവയെ പിടിച്ചുകൊല്ലാറുണ്ട്‌. മൃഗശാലകളിൽ വളരെ അപൂർവമായി മാത്രമേ ഈ ജീവികളെ പാർപ്പിക്കാറുള്ളൂ. ഇവയുടെ പ്രത്യേക ജീവിതചര്യകള്‍ മൃഗശാലയുമായി പൊരുത്തപ്പെട്ടുപോകാത്തതുമൂലമാവണം, ഏറെനാള്‍ ഈ രാത്രിഞ്ചരന്മാർ ബന്ധനത്തിൽ ജീവിച്ചിരിക്കാറില്ല. 2010-ലെ ഐ.യു.സി.എന്‍ റെഡ്‌ ഡേറ്റാബുക്ക്‌ പ്രകാരം വംശനാശഭീഷണി നേരിടുന്ന ജീവികളാണ്‌ കുട്ടിത്തേവാങ്കുകള്‍.
(കെ. രാജേന്ദ്രബാബു)
