This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുഞ്ഞിമാഹിന്‍കുട്ടിവൈദ്യർ, പട്ടളത്ത്‌
സര്‍വ്വവിജ്ഞാനകോശം സംരംഭത്തില്‍ നിന്ന്
കുഞ്ഞിമാഹിന്‍കുട്ടിവൈദ്യർ, പട്ടളത്ത്‌
19-ാം നൂറ്റാണ്ടിന്റെ അന്ത്യത്തിൽ ജീവിച്ചിരുന്ന പ്രസിദ്ധവൈദ്യനും മാപ്പിളക്കവിയും. കാസർകോട്‌ സ്വദേശിയായിരുന്ന അബ്‌ദുൽഖാദിർ വൈദ്യരുടെ മകനായി ജനിച്ചു. പാരമ്പര്യമായിത്തന്നെ പട്ടളത്ത്‌ കുടുംബക്കാരിൽ പലരും ആര്യവൈദ്യന്മാരായിരുന്നു. ഇദ്ദേഹത്തിന്റെ ജനന-മരണകാലത്തെ സംബന്ധിച്ചു ശരിയായ വിവരം ലഭിച്ചിട്ടില്ല. അഷ്‌ടാംഗഹൃദയം എന്ന വൈദ്യശാസ്‌ത്രഗ്രന്ഥം ഇദ്ദേഹം മാപ്പിളപ്പാട്ട്‌ രീതിയിൽ എട്ടുഭാഗങ്ങളായി വിവർത്തനം ചെയ്‌തിരുന്നു. അതിൽ എത്ര ഭാഗങ്ങള്‍ മുദ്രണം ചെയ്‌തിട്ടുണ്ടെന്ന്‌ അറിയുന്നില്ല. "വൈദ്യജ്ഞാനം' എന്ന ഭാഗം മുദ്രണം ചെയ്‌തിട്ടുണ്ട്‌. ആ പുസ്‌തകം ഹിജ്‌റ 1310-ൽ മൊഗ്രാൽ (കാസർകോട്‌) നിന്നു മൈസറത്ത്‌ കുഞ്ഞമ്മദ്‌ പ്രസിദ്ധീകരിച്ചതാണ്‌. ആ കൃതിയുടെ അന്ത്യത്തിൽ കാവ്യത്തിലെ പദങ്ങള്‍ക്ക്‌ അകാരാദിയും അനുബന്ധമായിച്ചേർത്തിട്ടുണ്ട്‌. ഗ്രന്ഥത്തിലെ ചില വരികള്‍:
""തിന്നിടാം നെയ്‌കള്‍ ചൊല്ലാം ചിറ്റാമൃതിടിച്ചെനീറ്റിൽ നെയ്‌ അതും ചേർത്ത്‌ കാച്ചീ അരിച്ചെടുത്തിട്ട്‌ തിന്നാൽ വന്നിടും ശോണിതങ്ങള്‍ ഒക്കെയും പോയിടുമേ''
രസികശിരോമണി കുഞ്ഞായിൽ മുസല്യാരുടെ കപ്പപ്പാട്ടിന്‌ "മുഖമ്മസ്സ്‌' (വ്യാഖ്യാനകാവ്യം) രചിച്ചിരുന്ന മൊഗ്രാൽ കുഞ്ഞിപ്പക്കി സാഹിബ്‌ ഇദ്ദേഹത്തിന്റെ അടുത്ത സുഹൃത്തും ശിഷ്യനുമായിരുന്നു. മൊഗ്രാൽ ജുമുഅത്ത്‌ പള്ളിശ്‌മശാനത്തിലാണ്‌ ഇദ്ദേഹത്തിന്റെ ഖബർ.
(കെ.കെ. മുഹമ്മദ്‌ അബ്‌ദുൽ കരീം)
