This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുഞ്ചുണ്ണൂലി, അരിങ്ങോടന്‍
സര്‍വ്വവിജ്ഞാനകോശം സംരംഭത്തില്‍ നിന്ന്
കുഞ്ചുണ്ണൂലി, അരിങ്ങോടന്‍
വടക്കന്‍പാട്ടിലെ ഒരു കഥാപാത്രം. അങ്കത്തട്ടിൽവച്ച്‌ എതിർത്തുതോല്‌പിക്കേണ്ടുന്ന പുത്തൂരം ആരോമൽച്ചേകവരുടെ ചുരികകള്‍ കടയിച്ചെടുക്കുവാന്‍വേണ്ടി പോവുന്ന ചന്തുച്ചേകവരെ വശീകരിച്ച്‌ വീട്ടിലേക്കു കൂട്ടിക്കൊണ്ടുവരണമെന്ന്‌ അച്ഛന്‍ കുഞ്ചുണ്ണൂലിയോടു നിർദേശിച്ചു. മച്ചുനച്ചിയായ കുട്ടിമാണിയുടെ സഹായത്തോടെ ഇവള്‍ അത്‌ നിഷ്‌പ്രയാസം നിറവേറ്റി, കൊല്ലന്‌ കൈക്കൂലികൊടുത്ത്‌ ചുരികകളിൽ കള്ളപ്പണി നടത്തണമെന്നുള്ള അച്ഛന്റെ ആവശ്യവും ചന്തുവിനെക്കൊണ്ട്‌ ഇവള്‍ നിർവഹിപ്പിച്ചു.
കുഞ്ചുണ്ണൂലിയുടെ കുതന്ത്രങ്ങളത്രയും അങ്കത്തട്ടിൽവച്ച്‌ നിഷ്‌ഫലമായി. ആരോമൽച്ചേകവരുടെ വെട്ടേറ്റു മരിച്ച അച്ഛന്റെ അന്ത്യശാസനമനുസരിച്ചു ചന്തുവിനെ ഭർത്താവായി സ്വീകരിച്ച കുഞ്ചുണ്ണൂലിക്ക്‌ കുറ്റബോധം കൊണ്ടു വീർപ്പുമുട്ടുന്ന ചന്തുവിനെ സമാശ്വസിപ്പിക്കേണ്ടിവന്നു.
വർഷങ്ങള്‍ക്കുശേഷം ചതിയനായ ചന്തുവിനോട്‌ പകരം ചോദിക്കുവാന്‍ വന്ന മരുമകന്‍ ആരോമലുണ്ണിയെയും സൂത്രത്തിൽ പാട്ടിലാക്കുവാന്‍ ഇവള്‍ ശ്രമിച്ചു; പക്ഷേ അതിൽ തീർത്തും പരാജയപ്പെട്ടതേയുള്ളൂ. ആരോമലുണ്ണിയുടെ വെട്ടേറ്റ്‌ ഭർത്താവിന്റെ തല അറ്റുവീഴുന്നതിനു മുമ്പുതന്നെ മാനസികമായി മരിച്ചുകഴിഞ്ഞിരുന്ന കുഞ്ചുണ്ണൂലി പിന്നീട്‌ ഒരു ജീവച്ഛവമായി കഴിഞ്ഞുകൂടി.
(പയ്യന്നൂർ ബാലകൃഷ്‌ണന്‍)
