This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കീരവാണി
സര്‍വ്വവിജ്ഞാനകോശം സംരംഭത്തില്‍ നിന്ന്
കീരവാണി
കർണാടകസംഗീതത്തിലെ ഒരു മേളകർത്താരാഗം. എഴുപത്തിരണ്ടു മേളാകർത്താപദ്ധതിയനുസരിച്ച്‌ 21-ാമത്തെ മേളമാണിത്‌. ഇത്‌ പൂർവമേളത്തിൽ "വേദ' എന്ന ചക്രത്തിലെ മൂന്നാമത്തെ രാഗവുമാണ്‌-വേദ.ഗോ.
ആരോഹണം : സരി ഗമ പധനിസ അവരോഹണം : സനിധപമഗരിസ
ഷഡ്‌ജം, പഞ്ചമം എന്നീ സ്വരങ്ങളെ കൂടാതെ ചതുഃശ്രുതിഋഷഭം, സാധാരണഗാന്ധാരം, ശുദ്ധമധ്യമം, ശുദ്ധധൈവതം, കാകലിനിഷാദം മുതലായ സ്വരങ്ങളും പ്രയോഗിക്കുന്നു. ഒരു സർവസ്വര ഗമക വരിക രക്തിരാഗമാണിത്‌. ഇതിൽ "പ' "രി' എന്നിവ ന്യാസസ്വരങ്ങളായും അംശസ്വരങ്ങളായും വരുന്നു. "രി', "ഗ', "മ', "നി' എന്നിവ രാഗച്ഛായാസ്വരങ്ങളാണ്‌. ഒരു ത്രിസ്ഥായിരാഗവും കൂടിയായ ഇത്‌ ദീർഘാലാപനത്തിനും സ്വരപ്രസ്‌താരത്തിനും വക നല്‌കുന്നു. സമയഭേദമെന്യേ ഈ രാഗം പാടാവുന്നതാണ്‌. ത്യാഗരാജസ്വാമികള്‍ ഈ രാഗത്തിൽ കീർത്തനങ്ങള്‍ രചിച്ചതോടെയാണ്‌ ഈ രാഗത്തിനു പ്രചാരം സിദ്ധിച്ചത്‌. ജണ്ടസ്വരപ്രയോഗങ്ങളും (സസരിരിഗഗ, മ മ പ പ ധ ധ, ഗ ഗ മ മ പ പ), ദാട്ടുവരിശപ്രയോഗങ്ങളും (ധഗരിഗസരി, പസനിസധനി), പ്രത്യാഹതഗമകപ്രയോഗങ്ങളും (ധ ധ പ പ മ മ ഗ ഗ രി രി നി) ഈ രാഗത്തിന്റെ സവിശേഷതകളാണ്‌.
ഒരു മൂർച്ഛനാ കാരകമേളമായ കീരവാണിരാഗത്തിന്റെ മധ്യമം, പഞ്ചമം, ധൈവതം എന്നീ സ്വരങ്ങള്‍ ആധാരഷഡ്‌ജമാക്കി ശ്രുതിഭേദം ചെയ്‌താൽ യഥാക്രമം ഹേമവതി, വകുളാഭരണം, കോസലം എന്നീ രാഗങ്ങള്‍ ലഭിക്കുന്നതാണ്‌. ഈ രാഗത്തോട്‌ സാദൃശ്യമുള്ളതാണ്‌ പാശ്ചാത്യസംഗീതത്തിലെ ഹാർമോണിക്‌ മൈനർ സ്‌കെയിൽ.
കലികിയുണ്ടെ ഗഡാ (ത്യാഗരാജസ്വാമികള്‍-ആദി), വരമുലൊ സഖി (പട്ടണം സുബ്രഹ്മണ്യയ്യർ-രൂപകം), നിജമുഖരാമ (രാമനാഥപുരം ശ്രീനിവാസയ്യങ്കാർ-ആദി), ഇന്നമും സന്ദേഹപ്പെടലാമോ (ഗോപാലകൃഷ്‌ണഭാരതി-ചായ്‌പ്‌), ഭാവയേ സാരസനാഭം (സ്വാതിതിരുനാള്‍-ആദി), അംബവാണി (മുത്തയ്യാ ഭാഗവതർ-ആദി), നാമിത ദയറാദാ (തിരുവറ്റിയൂർ ത്യാഗയ്യർ-ആദി) എന്നിങ്ങനെ അനേകം കൃതികള്‍ ഈ രാഗത്തിൽ രചിക്കപ്പെട്ടിട്ടുണ്ട്‌.
