This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഐറിഷ്‌ കടൽ
സര്‍വ്വവിജ്ഞാനകോശം സംരംഭത്തില്‍ നിന്ന്
ഐറിഷ്‌ കടൽ
Irish sea
ഇംഗ്ലണ്ടിനും അയർലണ്ടിനും ഇടയ്‌ക്കായി കിടക്കുന്ന കടൽ. സ്‌കോട്ട്‌ലന്‍ഡിന്റെ തെക്കുപടിഞ്ഞാറു മൂലയിലുള്ള ഗാലവേ മുനമ്പു മുതൽ തെക്കോട്ട്‌ ഇംഗ്ലണ്ടിന്റെ പടിഞ്ഞാറേ തീരത്തുള്ള സെയ്‌ന്റ്‌ ഡേവിഡ്‌ മുനമ്പുവരെയാണ്‌ ഈ കടലിന്റെ വ്യാപ്‌തി. സെയ്‌ന്റ്‌ ഡേവിഡ്‌ മുനമ്പിനെയും അയർലണ്ടിന്റെ കിഴക്കേ തീരത്തുള്ള കാണ്‍സോർ മുനമ്പിനെയും ബന്ധിപ്പിക്കുന്ന രേഖ ഐറിഷ്‌ കടലിന്റെ തെക്കതിരായി നിർണയിക്കപ്പെട്ടിരിക്കുന്നു. വിസ്‌തൃതി സുമാർ 1,00,000 ച. കിലോമീറ്റർ ആണ്‌.
അയർലണ്ടു തീരത്തു നിന്ന് 30-50 കി. മീ. അകലത്തിൽ, തടരേഖയ്‌ക്ക്‌ ഏതാണ്ടു സമാന്തരമായി ഗർത്തങ്ങളുടെ ഒരു ശൃംഖലയുണ്ട്‌. ഏറ്റവും ആഴം കൂടിയ ഭാഗം (273 മീ.) വടക്കരികിലാണ്‌. 130 മുതൽ 150 വരെ മീറ്റർ ആഴമുള്ള നിരവധി കിടങ്ങുകളുണ്ട്‌. കടൽത്തറയിൽ പൊതുവേ പാലിയോസോയിക്‌ മഹാകല്‌പത്തിൽ രൂപം കൊണ്ട ശിലകളാണുള്ളത്‌. ഈ കടലിലെ അവസാദങ്ങള്‍ സമീപസ്ഥ ദ്വീപുകളിലെ ആധാരശിലകളെ അപേക്ഷിച്ച്‌ പ്രായം കുറഞ്ഞവയാണ്‌. ഐറിഷ്‌കടൽ ഒരിക്കലും ഉറയുന്നില്ല. ശൈത്യകാലത്ത്‌ ഊർധ്വാധരദിശയിലുള്ള ചലനംമൂലം ഈ കടലിലെ ജലപിണ്ഡങ്ങള്‍ താപസംവഹനത്തിനു വിധേയമാകും. ഇത്‌ ഫലത്തിൽ ശൈത്യബാധ ഇല്ലാതാക്കുകയും ചെയ്യുന്നു. ശൈത്യകാലത്തെ ഊർധ്വാധര ചലനം താപസന്തുലനത്തിനെന്നതുപോലെ ലവണത ഏകീകരിക്കുന്നതിനും കാരണമാകുന്നു. ഐറിഷ്‌ കടലിലെ ലവണത 3.2 ശതമാനം മുതൽ 3.53 ശതമാനം വരെ വ്യതിചലിച്ചുകാണുന്നു. പടിഞ്ഞാറേ തീരങ്ങളെ അപേക്ഷിച്ച്‌ കിഴക്കേ തീരങ്ങളിൽ വേലിയേറ്റം ശക്തമാണ്‌. ലോകത്തിൽ ഏറ്റവും കൂടുതൽ ആണവമലിനീകരണം നടക്കുന്ന കടലായി ഐറിഷ്‌കടലിനെ ഗ്രീന്‍പീസ്‌ ഫൗണ്ടേഷന്‍ വിലയിരുത്തുന്നു.
