This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഏഗെൽ, പാള്‍ (1691 - 1752)
സര്‍വ്വവിജ്ഞാനകോശം സംരംഭത്തില്‍ നിന്ന്
ഏഗെൽ, പാള്‍ (1691 - 1752)
Egal, Paul
ജർമന്‍ ശില്‌പി. 1691-ൽ മന്‍ഹൈമിൽ ജനിച്ചു. ഡ്രസ്‌ഡണിൽ ബൽത്താസർ പെർമോസറിൽ നിന്നു ശില്‌പകല അഭ്യസിക്കുകയും അദ്ദേഹത്തോടൊപ്പം ശില്‌പവേലകളിൽ ഏർപ്പെടുകയും ചെയ്‌തു. അദ്ദേഹത്തിൽ നിന്നാണ്‌ ബെവേറിയന്‍ ബാറോക്ക്‌ എന്ന പാരമ്പര്യ കലാസാങ്കേതികരീതി ഏഗെൽ സ്വായത്തമാക്കിയത്‌. റോമിലെ ബറോക്ക്‌ കലാകാരന്മാരുടെ പൈതൃകമായിരുന്ന അലങ്കരണത്തൊങ്ങലുകളുടെ രചനയിൽപ്പോലും ജർമന്‍ രീതികള്‍ ഇദ്ദേഹം നിലനിർത്തിയിരുന്നു; അതോടൊപ്പം വിശദീകരണക്ഷമമല്ലാത്ത വൈയക്തിക സവിശേഷതകള്‍ പ്രകടമാക്കിയിട്ടുണ്ട്‌.
1720-ൽ ഏഗെൽ മന്‍ഹൈമിലേക്കു തിരിച്ചുവന്നു. അവിടെ എലക്‌ടർ പലറ്റൈന്റെ കൊട്ടാരശില്‌പിയായി നിയമിക്കപ്പെട്ടു. ഈ തുറയിൽ ഇദ്ദേഹം സജീവമായി പ്രവർത്തിച്ചു. മന്‍ഹൈം കൊട്ടാരത്തിലെയും ഷ്വെറ്റ്‌സിങ്ങന്‍ പൂന്തോട്ടങ്ങളിലെയും പ്ലാസ്റ്റർ പണികള്‍ ഏഗെലാണ്‌ സംവിധാനം ചെയ്‌തത്‌. കൊട്ടാരത്തിന്റെ മുഖപ്പിലുള്ള വാർപ്പുപണികള്‍ അദ്ദേഹം തന്നെ നിർവഹിച്ചു. മന്‍ഹൈം ജെസ്യൂട്ട്‌ ദേവാലയത്തിലെ ശില്‌പാലങ്കാരപ്പണികളിലും ഏഗെൽ സഹകരിച്ചിരുന്നു. മന്‍ഹൈം, ഹിൽഡെസ്‌ ഹൈം എന്നീ ദേവലായങ്ങളിലെ അള്‍ത്താരകള്‍ ഇദ്ദേഹത്തിന്റെ കലാസൃഷ്‌ടികളിൽപ്പെട്ടതാണ്‌. 1752-ൽ മന്‍ഹൈമിൽ ഇദ്ദേഹം നിര്യാതനായി. ബെർലിന്‍, മന്‍ഹൈം എന്നീ മ്യൂസിയങ്ങളിൽ സൂക്ഷിച്ചിരുന്ന ഏഗെൽ രചനകളൊക്കെ രണ്ടാം ലോകയുദ്ധകാലത്ത്‌ നശിച്ചുപോയി.
