This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇരുള്‍
സര്‍വ്വവിജ്ഞാനകോശം സംരംഭത്തില്‍ നിന്ന്
ഇരുള്‍
Burma Ironwood
മൈമോസീ സസ്യകുടുംബത്തിൽപ്പെട്ട ഒരു വന്‍മരം. ശാ.നാ. സൈലിയ സൈലൊകാർപ (Xylia xylocarpa). ഇരുമുള്ള്‌ എന്നും ഇതിനു പേരുണ്ട്‌. ദക്ഷിണേന്ത്യയിൽ 600 മീ. വരെ ഉയരമുള്ള പത്രപാതിവനങ്ങളിൽ സമൃദ്ധമായി വളരുന്നു. ഫലപുഷ്‌ടിയുള്ള മച്ചു വേണമെന്നില്ല. ജൈവാംശം കുറഞ്ഞ ചെമ്മച്ചിലും മണലിലും ഇടതിങ്ങി വളരുന്നതുകാണാം.
തൊലിക്ക്‌ ഇരുണ്ട ചുവപ്പുനിറമാണ്‌. ശാഖകളിൽ വലിയ വെള്ളപ്പൊട്ടുകള്‍ കാണപ്പെടുന്നു. ഇല ദ്വിപിച്ഛകമാണ്‌; ഒരു ജോടി പിച്ഛകങ്ങളേയുള്ളൂ. ഓരോന്നിലും നാലുമുതൽ പന്ത്രണ്ടുവരെ പർണകങ്ങളുണ്ടായിരിക്കും. അവ സമ്മുഖങ്ങളാണ്‌. പർണകത്തിന്‌ 12 സെ.മീ. നീളവും 4 സെ.മീ. വീതിയും കാണും. അഗ്ര പർണകത്തിനു വലുപ്പം കൂടും. ഇലത്തണ്ടിന്റെ അറ്റത്ത്‌ ഒരു ചുവന്ന ഗ്രന്ഥിയുണ്ട്‌. തളിരിലയ്‌ക്കു ചെമ്പിന്റെ നിറമാണ്‌. മാർച്ചു മുതൽ ഏപ്രിൽ വരെയാണ്‌ പൂക്കാലം. പൂവിന്‌ പാൽപ്പാടയുടെ നിറമാണുള്ളത്‌. മുണ്ഡമഞ്‌ജരി ഇനത്തിലുള്ള പൂക്കുലയാണ്‌ കാണപ്പെടുന്നത്‌. പൂക്കുലയുടെ തണ്ട്‌ പരന്നുണ്ടാകുന്ന പുഷ്‌പാധാരത്തിലാണ്‌ അവൃന്തപുഷ്‌പങ്ങള്‍ ഉണ്ടാകുന്നത്‌. കായയ്‌ക്ക്‌ ഉദ്ദേശം 15 സെ.മീ. നീളവും 5 സെ.മീ. വീതിയും കാണും. വിളഞ്ഞ കായയ്‌ക്ക്‌ കറുപ്പുകലർന്ന തവിട്ടുനിറമാണുള്ളത്‌. ഒരു കിലോഗ്രാമിൽ 3,500 വിത്തു കാണും. വിത്ത്‌ വീര്യം നഷ്‌ടപ്പെടാതെ ഏതാനും മാസങ്ങള്‍ സൂക്ഷിക്കാം.
ചെറിയ തണൽ ഇഷ്‌ടപ്പെടുന്ന പത്രപാതിമരമാണിത്‌. മൂലപ്രസാരകങ്ങളുണ്ടാകും. ചെറിയ വരള്‍ച്ച സഹിക്കുമെങ്കിലും അതിശൈത്യത്തിൽ വളരാറില്ല.
ഇരുളിന്‌ നൈസർഗികമായ പുനരുദ്‌ഭവശേഷിയുണ്ട്‌. കായയുടെ സ്‌ഫോടനംവഴി വിത്തുവിതരണം നടക്കുന്നു. കാലവർഷാരംഭത്തോടെ വിത്തുമുളയ്‌ക്കും. കൃത്രിമപുനരുത്‌പാദനത്തിന്‌ ഒരു വർഷമായ നഴ്‌സറി തൈകള്‍ ക്രാബാർ ദ്വാരങ്ങളിൽ നട്ടാൽ മതിയാകും. തടിക്ക്‌ നല്ല ഉറപ്പും കടുപ്പവുമുണ്ട്‌. ഒരു ക്യു.സെ.മീ. തടിക്ക്‌ 900 ഗ്രാം ഭാരംകാണും. തടിയിൽ ഒരു റെസിനുണ്ട്‌. അതുകൊണ്ട്‌ തടിക്ക്‌ ഈടുകൂടുതലാണ്‌. ഭവനനിർമാണത്തിനും റയിൽവേ സ്ലീപ്പറിനും ഇരുള്‍ ധാരാളം ഉപയോഗിക്കുന്നു. സ്‌തംഭങ്ങളുടെയും പാലങ്ങളുടെയും നിർമാണാവശ്യങ്ങള്‍ക്കും ഇതു നല്ലതാണ്‌. കനവും കടുപ്പവും അധികമായതുകൊണ്ട്‌ തടി ഉരുപ്പടികള്‍ക്കുപറ്റിയതല്ല. തടിക്കു വെള്ള കുറവാണ്‌. വാർഷികവലയങ്ങളില്ല. തടി ഉണങ്ങുമ്പോള്‍ വിള്ളലുകള്‍ പ്രത്യക്ഷപ്പെടാറുണ്ട്‌.
(ഡോ. പി.എന്‍. നായർ)
