This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇക്‌ബാൽനാമാ-എ-ജഹാംഗീരി
സര്‍വ്വവിജ്ഞാനകോശം സംരംഭത്തില്‍ നിന്ന്
ഇക്‌ബാൽനാമാ-എ-ജഹാംഗീരി
മുഗള്‍ ചക്രവർത്തി ജഹാംഗീറിന്റെ കാലത്തെക്കുറിച്ചു വിവരിക്കുന്ന ഒരു ചരിത്രകൃതി. പേർഷ്യന്‍ ഭാഷയിലുള്ള ഈ ഗ്രന്ഥത്തിന്‌ മൂന്ന്‌ ഭാഗങ്ങളുണ്ട്‌. ഒന്നാം ഭാഗം ഹുമയൂണ്‍ ചക്രവർത്തിയുടെ അന്ത്യംവരെയുള്ള മുഗള്‍രാജവംശ(1526-1556)ത്തിന്റെ ചരിത്രമാണ്‌; രണ്ടാംഭാഗത്തിൽ അക്‌ബർചക്രവർത്തിയുടെയും മൂന്നാം ഭാഗത്തിൽ ജഹാംഗീറിന്റെയും ചരിത്രം വിവരിക്കുന്നു. ഈ ഗ്രന്ഥത്തിന്റെ കർത്താവായ മുഅ്‌തമദ്‌ഖാന്‍ മുഗള്‍ സർക്കാരിൽ ബക്ഷി സ്ഥാനവും 1,000 പേരടങ്ങുന്ന സൈന്യത്തിന്റെ മന്‍സബും വഹിച്ചിരുന്നു.
ജഹാംഗീർ ചക്രവർത്തിയുടെ തുസുകെ ജഹാംഗീരി എന്ന ജീവിതസ്‌മരണകള്‍ അദ്ദേഹത്തിന്റെ ഭരണം തുടങ്ങി പതിനെട്ടാം വർഷത്തിൽ അവസാനിക്കുന്നു; അതിനുശേഷമുള്ള ചരിത്രം തുടർന്നെഴുതി പൂർത്തിയാക്കാന്‍ മുഅ്‌തമദ്‌ഖാന്‍ നിയുക്തനായി. അതിനാൽ ഇക്‌ബാൽനാമാ-എ-ജഹാംഗീരിയുടെ ആദ്യഭാഗം പ്രധാനമായും പ്രസ്‌തുത ഗ്രന്ഥത്തെ ആശ്രയിച്ചിരിക്കുന്നു. ജഹാംഗീർ ചക്രവർത്തിയുടെ ഭരണാന്ത്യത്തിലെ നാലു വർഷത്തെ ചരിത്രസംഭവങ്ങളുടെ വിശദവിവരണം ഈ ഗ്രന്ഥത്തിൽനിന്നും ലഭിക്കുന്നു.
ഖുസ്‌റോ രാജകുമാരന്‍ തന്റെ പിതാവിനെതിരായി നടത്തിയ കലാപവും അതിന്റെ പരിണാമവും, ജഹാംഗീറും നൂർജഹാനുമായുള്ള വിവാഹം, ഭരണത്തിന്റെ 11-ാം വർഷത്തിൽ ഉത്തരേന്ത്യയിൽ പടർന്നുപിടിച്ച പ്ലേഗ്‌, 19-ാം വർഷത്തിൽ ഷാജഹാന്റെ കലാപവും അതിനെത്തുടർന്നു സംഭവിച്ച മഹാബത്‌ഖാന്റെ കലാപവും (ഈ രണ്ടാമത്തെ കലാപത്തിനിടയിലാണ്‌ മഹാബത്‌ഖാന്‍ ചക്രവർത്തിയെയും രാജകുടുംബാംഗങ്ങളെയും തടവിലാക്കിയത്‌), ജഹാംഗീർ തടവിൽനിന്ന്‌ രക്ഷപ്പെട്ടത്‌, ഷാജഹാന്റെ സ്ഥാനാരോഹണം എന്നീ സംഭവങ്ങള്‍ ഈ ഗ്രന്ഥത്തിൽ വിശദമായി വിവരിക്കപ്പെട്ടിരിക്കുന്നു. (ഡോ. എ.പി. ഇബ്രാഹിംകുഞ്ഞ്‌)
