This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ആഹുതി
സര്‍വ്വവിജ്ഞാനകോശം സംരംഭത്തില്‍ നിന്ന്
ആഹുതി
വേദവിഹിതങ്ങളായ അഗ്നിഹോത്രാദി ഹോമങ്ങളിൽ ദേവതോദ്ദേശ്യകമായ ഹോമദ്രവ്യം മന്ത്രാച്ചാരണത്തോടെ അഗ്നിയിൽ ഹോമിക്കുന്ന ക്രിയ. ഓരോ ഹോമത്തിലും ഹോമദ്രവ്യം വ്യത്യസ്‌തമായിരിക്കും. "ദധ്‌നാ ജുഹോതി', "പയസാ ജുഹോതി' എന്നിങ്ങനെയുള്ള വിവിധവാക്യങ്ങള്‍ ദധ്യാദിഹോമദ്രവ്യങ്ങളെ നിർദേശിക്കുന്നു. "ആഹവനീയേ ജുഹോതി' മുതലായ വാക്യങ്ങള്‍ ആഹവനീയാദ്യഗ്നികളാണ്‌ ഹോമാധാരമെന്ന്‌ ബോധിപ്പിക്കുന്നു. അതുകൊണ്ട്‌ ആധ്യം അഗ്ന്യാധാനാദികർമങ്ങള്‍ യഥാവിധി അനുഷ്‌ഠിച്ചതിനുശേഷമേ പ്രധാനഹോമം ആരംഭിക്കാവൂ. അഗ്നയേസ്വാഹാ, ഇന്ദ്രായസ്വാഹാ എന്നിങ്ങനെ സ്വാഹാകാരാന്തങ്ങളായ മന്ത്രങ്ങളാണ്‌ ആഹുതിക്ക്‌ ഉപയോഗിക്കുന്നത്‌. ഏത്‌ ദേവതയെ ഉദ്ദേശിച്ചുള്ള ഹവിസ്സായാലും ഹോമിക്കുന്നത്‌ അഗ്നിയിൽത്തന്നെയാണ്‌. അഗ്നിദേവന്‍ ആ ഹവിസ്സ്‌ നിർദിഷ്‌ട ദേവന്‌ എത്തിച്ചുകൊടുക്കുന്നുവെന്നാണ്‌ സങ്കല്‌പം. ശ്രാദ്ധ കർമത്തിൽ പിണ്ഡാഹുതി ചെയ്യുന്നവരുമുണ്ട്‌.
ഹോമദ്രവ്യങ്ങളിൽ മുഖ്യം ആജ്യം (നെയ്യ്‌) ആണ്‌. മറ്റു ദ്രവ്യങ്ങളുടെ ആഹുതിക്ക്‌ മുമ്പും പിമ്പുമായി ആജ്യാഹുതി ഉണ്ടായിരിക്കണം. നിർദിഷ്‌ടദ്രവ്യങ്ങളുടെ ആഹുതിക്കുശേഷം പൂർണാഹുതിയോടെയാണ്‌ ഹോമം അവസാനിക്കുക. പൂർണാഹുതിയിൽ സാധാരണ കദളിപ്പഴം ആജ്യത്തോടുകൂടി ഹോമിക്കുകയാണ്‌ ചെയ്യുന്നത്‌. എന്നാൽ ചില ഹോമങ്ങളിൽ നാളികേരാദികളും പൂർണാഹുതിക്ക്‌ ഉപയോഗിക്കുന്നുണ്ട്‌. "പൂർണാഹുത്യാ വൈസർവാന്‍ കാമാനവാപ്‌നോതി' എന്ന അഥർേവദവചനം പൂർണാഹുതിയുടെ പ്രാധാന്യം വ്യക്തമാക്കുന്നു. പൂർണാഹുതിയില്ലാത്ത ഹോമം ശിരസ്സില്ലാത്ത ശരീരം പോലെയാണ്‌. അധ്വര്യു എഴുന്നേറ്റുനിന്നു മന്ത്രാച്ചാരണത്തോടെ പൂർണാഹുതി നിർവഹിക്കുന്നു. തുടർന്ന്‌ നീരാജനാദികർമങ്ങളോടെ ഹോമം പര്യവസാനിക്കുന്നു. (പ്രാഫ. ആർ. വാസുദേവന്‍പോറ്റി)
