This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ആപ്‌തേ, ഹരിനാരായണ (1864 - 1919)
സര്‍വ്വവിജ്ഞാനകോശം സംരംഭത്തില്‍ നിന്ന്
ആപ്‌തേ, ഹരിനാരായണ (1864 - 1919)
മറാഠിസാഹിത്യകാരന്‍. മറാഠി, സംസ്‌കൃതം, ഇംഗ്ലീഷ്‌ എന്നീ ഭാഷകളിൽ അഗാധപാണ്ഡിത്യം നേടിയിരുന്ന ഇദ്ദേഹം മറാഠിയിൽ പുതിയൊരു ഗദ്യശൈലിയുടെ ഉപജ്ഞാതാവാണ്‌. ഇദ്ദേഹം 1864 മാ. 8-നു മഹാരാഷ്‌ട്രയിലെ പരോള്‍ ഗ്രാമത്തിൽ ജനിച്ചു. ബോംബെയിലും പൂനയിലും അധ്യയനം നടത്തിയ ആപേത്‌ക്ക്‌ സർവകലാശാലാവിദ്യാഭ്യാസം പൂർത്തിയാക്കാന്‍ സാധിച്ചില്ല. വിഷ്‌ണുശാസ്‌ത്രി ചിപ്‌ളങ്കർ, ബാലഗംഗാധരതിലകന്‍ തുടങ്ങിയവർ ഇദ്ദേഹത്തിന്റെ ചിന്താഗതിയിൽ ശക്തമായ പ്രരണ ചെലുത്തിയിട്ടുണ്ട്‌. രാഷ്‌ട്രീയകാര്യങ്ങളിൽ ജസ്റ്റിസ്‌ ഗോവിന്ദറാനഡേ ആയിരുന്നു ആപ്‌തേയുടെ ആചാര്യന്‍. സാമൂഹികപരിഷ്‌കരണം, സാഹിത്യം, സ്‌ത്രീജനോദ്ധാരണം, വിദ്യാഭ്യാസനവീകരണം മുതലായ മേഖലകളിൽ നിരന്തരം സേവനമനുഷ്‌ഠിച്ചുവന്ന ഇദ്ദേഹം ശ്വാസകോശസംബന്ധമായ രോഗം നിമിത്തം 1919 മാ. 3-നു പൂനയിൽവച്ച്‌ നിര്യാതനായി.
സംസ്‌കൃതഗ്രന്ഥങ്ങളുടെ പ്രസിദ്ധീകരണത്തിൽ തത്‌പരമായിരുന്ന "ആനന്ദാശ്രമം' എന്ന സ്ഥാപനവുമായി ബന്ധപ്പെട്ടാണ്‌ ആപ്‌തേയുടെ പൊതുജീവിതം ആരംഭിക്കുന്നത്‌. കർമാനൂക്‌ (1890-1917), മനോരഞ്‌ജന്‍, നിബന്ധചന്ദ്രിക (1887-92), ജ്ഞാനപ്രകാശ്‌ (1888-94), സുധാരക്‌ (1912) എന്നീ ആനുകാലിക പ്രസിദ്ധീകരണങ്ങളുടെ പത്രാധിപത്യം വഹിച്ചിട്ടുള്ള ആപ്‌തേ 22 നോവലുകളും ടാഗോറിന്റെ ഗീതാഞ്‌ജലിയുടെ വിവർത്തനവും മറാഠി സാഹിത്യത്തിന്‌ സംഭാവന ചെയ്‌തിട്ടുണ്ട്‌. 1912-ൽ അകോളയിൽ കൂടിയ മറാഠിസാഹിത്യസമ്മേളനത്തിന്റെ അധ്യക്ഷന്‍ ആപ്‌തേ ആയിരുന്നു. പൂനാ മുനിസിപ്പാലിറ്റിയുടെ അധ്യക്ഷനായിരുന്ന (1915-18) ആപ്‌തേ വളരെക്കാലം ആലന്ദി, ചിച്ഛാവാഡ്‌, ജെജുറി എന്നീ ആശ്രമങ്ങളുടെ അധിപനായും സേവനമനുഷ്‌ഠിച്ചിട്ടുണ്ട്‌. ഇദ്ദേഹം 1896-ലെ ക്ഷാമബാധയെക്കുറിച്ചുള്ള അന്വേഷണകമ്മിഷനുവേണ്ടി റിപ്പോർട്ട്‌ തയ്യാറാക്കുകയും 1897-ലെ പ്ലശ്ശേഗ്‌ബാധയിലും 1918-ലെ ഇന്‍ഫ്‌ളുവന്‍സാബാധയിലും പൂണെയിലെ കിങ്‌ എഡ്വേർഡ്‌ ആശുപത്രി വികസിപ്പിക്കാന്‍ മുന്‍കൈയെടുക്കുകയും ചെയ്‌തു. പൂണെയിലെ നൂതന്‍മഹാവിദ്യാലയത്തിന്റെ സ്ഥാപകന്‍ (1888) ഇദ്ദേഹം ആണ്‌. സാർവജനിക്‌സഭ, ഡക്കാണ്‍സഭ എന്നീ സ്ഥാപനങ്ങളിൽ റാനഡേയുടെ വലംകൈയായി ഇദ്ദേഹം പ്രവർത്തിച്ചു. 1895-ൽ പൂണെയിൽകൂടിയ ഇന്ത്യന്‍ നാഷണൽ കോണ്‍ഗ്രസ്‌ വാർഷികസമ്മേളനത്തിൽ തീവ്രവാദ സമീപനങ്ങള്‍ക്കെതിരെ നിലപാടെടുത്ത നേതാക്കളിൽ ഇദ്ദേഹവും ഉള്‍പ്പെടുന്നു.
