This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
നീറോലി
സര്‍വ്വവിജ്ഞാനകോശം സംരംഭത്തില്‍ നിന്ന്
നീറോലി
ഒരു വൃക്ഷം. സാപ്പിന്‍ഡേസി സസ്യകുടുംബത്തില്‍ ഉള്‍പ്പെടുന്ന ഇവയുടെ ശാ.നാ. ഫിലിഷ്യം ഡെസിപ്പിയന്‍സസ് (Filicium decipiences). കേരളത്തിലെ നിത്യഹരിതവനങ്ങളില്‍ അപൂര്‍വമായി കണ്ടുവരുന്നു. പശ്ചിമഘട്ടത്തിലെ ഈര്‍പ്പഭരിത മേഖലകളില്‍ ഇവ സമൃദ്ധമായി വളരുന്നു. മനോഹാരിതയാണ് നീറോലിയുടെ മുഖ്യസവിശേഷത.
പന്നല്‍ച്ചെടിയുടെ ഇലകളോട് സാദൃശ്യമുള്ള നീറോലിയുടെ ഇലകള്‍ ഏകാന്തരന്യാസത്തില്‍ ക്രമീകരിച്ചിരിക്കുന്നു. അനുപര്‍ണകം (Stipule) ഇല്ല. ഇലയ്ക്ക് 15-20 സെ.മീ. നീളമുണ്ട്. ഒരു ഇലയില്‍ 13-17 വരെ പത്രകങ്ങള്‍ കാണപ്പെടുന്നു. പത്രകത്തിന് ഏഴ് സെ.മീ. നീളവും രണ്ട് സെ.മീ. വീതിയും ഉണ്ടായിരിക്കും. ഇലകള്‍ അസമചിച്ഛക(imparipinnate)ങ്ങളാണ്. ഡി.-ജനു. മാസങ്ങളിലാണ് നീറോലി പുഷ്പിക്കുന്നത്. ആണ്,പെണ്‍ പുഷ്പങ്ങള്‍ പ്രത്യേകമായി ഒരേ വൃക്ഷത്തില്‍ത്തന്നെ കാണപ്പെടുന്നു. 4-5 വരെ ബാഹ്യദളങ്ങളും ദളങ്ങളുമുണ്ട്. പുഷ്പങ്ങള്‍ക്ക് ചുവപ്പു കലര്‍ന്ന വെളുപ്പ് നിറമാണുള്ളത്. 5-10 വരെ കേസരങ്ങളുണ്ട്. അണ്ഡാശയം ഊര്‍ധ്വവര്‍ത്തിയാണ്. ഇളം ചുവപ്പ് നിറത്തോട് കൂടിയ ഫലം, ഡ്രൂപ്പ് ആണ്. ഫലം മാ.-മാസത്തോടെ വിളയുന്നു. ഇതിന്റെ വിത്തിന് ജീവനക്ഷമത വളരെ കുറവായതിനാല്‍ പുനരുത്പാദനം നന്നേ കുറവാണ്.
ചുവപ്പ് നിറത്തിലുള്ള നീറോലിയുടെ തടി, കാര്‍ഷികാവശ്യങ്ങള്‍ക്കും ഗൃഹോപകരണങ്ങള്‍ നിര്‍മിക്കുന്നതിനും ഉപയോഗിക്കുന്നു.
