This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
അരയന്നം
സര്‍വ്വവിജ്ഞാനകോശം സംരംഭത്തില്‍ നിന്ന്
അരയന്നം
Swan
നീര്‍പ്പക്ഷികള്‍ ഉള്‍പ്പെടുന്ന അനാറ്റിഡേ (Anatidae) പക്ഷികുടുംബത്തിലെ ഒരംഗം. കുറുകിയ കാലുകളും നീണ്ട കഴുത്തുമുള്ള ഇത് നീര്‍പ്പക്ഷികളുടെ കൂട്ടത്തില്‍ വലുപ്പത്തില്‍ ഒന്നാം സ്ഥാനത്ത് നില്ക്കുന്നു. ജലാശയങ്ങളില്‍ വളരുന്ന സസ്യങ്ങളും പുല്ലും ധാന്യങ്ങളുമാണ് പ്രധാനാഹാരം. കുറുകിയ കാലുകളുപയോഗിച്ച് നടക്കുന്നതു കാണുവാന്‍ കൗതുകം തോന്നും.
സാധാരണയായി എട്ടിനം അരയന്നങ്ങളുണ്ട്. ഇതില്‍ വെള്ളനിറമുള്ള അഞ്ചിനം ഉത്തരാര്‍ധഗോളത്തില്‍ കാണപ്പെടുന്നു. കറുത്ത കഴുത്തോടുകൂടിയ സിഗ്നസ് മെലാന്‍കോറിഫസ് (Cygnus melancoriphus) എന്ന ഒരിനം ദക്ഷിണ അമേരിക്കയുടെ തെക്കന്‍ പ്രദേശത്തും തനി കറുപ്പുനിറത്തിലുള്ള കീനോപിസ് അട്രേറ്റ (Chenopis atrata) എന്നയിനം ആസ്റ്റ്രേലിയ, ന്യൂസിലണ്ട് എന്നിവിടങ്ങളിലും കാണപ്പെടുന്നു. ഉത്തരയൂറോപ്പിലും ഏഷ്യയിലും സാധാരണ കണ്ടുവരുന്ന സിഗ്നസ് ഓലോര്‍ (C.olor) എന്നയിനം അരയന്നത്തിന്റെ നെറ്റിയില്‍ ഒരു ചെറിയ മുഴ കാണാം. ഇവ ശബ്ദമുണ്ടാക്കാറില്ല. അമേരിക്കയിലുള്ള ഓലോര്‍ കൊളുംബിയാനസ് (Olor columbianus) എന്നയിനം ഉത്തരധ്രുവപ്രദേശങ്ങളില്‍ കൂടുകെട്ടുന്നു. ഇവയുടെ ചൂളംവിളിപോലെയുള്ള ശബ്ദം പ്രത്യേകം ശ്രദ്ധിക്കപ്പെടുന്നു. കാഹളം മുഴക്കുന്നതുപോലെയുള്ള ശബ്ദം പുറപ്പെടുവിക്കുന്ന ബുക്കിനേറ്റര്‍ (Buccinator) എന്ന മറ്റൊരു വര്‍ഗം കൂടിയുണ്ട്. ഇവയുടെ സംഖ്യ കുറഞ്ഞുവരുന്നതായി രേഖപ്പെടുത്തിയിരിക്കുന്നു.
അരയന്നം, സാഹിത്യത്തിലും ഐതിഹ്യങ്ങളിലും. ഭാരതീയ പുരാണേതിഹാസങ്ങളിലും സാഹിത്യസൃഷ്ടികളിലും അത്യന്തം ഉന്നതവും രാജകീയവുമായ പദവി അരയന്നത്തിനു നല്കപ്പെട്ടിട്ടുണ്ട്. ഹംസം, കളഹംസം. രാജഹംസം തുടങ്ങിയ സംസ്കൃത പര്യായശബ്ദങ്ങള്‍ തന്നെ ഇതിന്റെ അഗ്യ്രപദവിയെ സൂചിപ്പിക്കുന്നു. അന്നം എന്ന പദത്തോടുകൂടി രാജത്വദ്യോതകമായ 'അര' (അരശ് എന്നതിന്റെ തദ്ഭവം) എന്ന ഉപസര്‍ഗം കൂട്ടിച്ചേര്‍ത്ത് ഇതിനെ ഭാഷയില്‍ വ്യവഹരിക്കുന്നത് ഇതിന്റെ മഹിമ വിളിച്ചോതാനുള്ള കൗതുകത്തിന്റെ ഫലമാണ്.
