This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ദേവപാലന്‍ (ഭ.കാ. സു. 815 - 55)
സര്‍വ്വവിജ്ഞാനകോശം സംരംഭത്തില്‍ നിന്ന്
ദേവപാലന്‍ (ഭ.കാ. സു. 815 - 55)
പാല രാജവംശത്തിലെ ഒരു രാജാവ്. ബംഗാളില്‍ ഭരണം നടത്തിയ ധര്‍മപാലന്റെ പുത്രനായിരുന്നു ദേവപാലന്‍. വടക്ക് കംബോജം മുതല്‍ തെക്ക് വിന്ധ്യാനിരകള്‍ വരെ ഇദ്ദേഹത്തിന്റെ അധികാരം വ്യാപിച്ചിരുന്നതായി ശിലാരേഖകള്‍ സാക്ഷ്യപ്പെടുത്തുന്നു. കാമരൂപം, ഉത്കല്‍ എന്നീ രാജ്യങ്ങളെ പാല സാമ്രാജ്യത്തോടു ചേര്‍ത്ത ദേവപാലന്‍ ഹൂണന്മാരെയും ദ്രാവിഡരെയും പരാജയപ്പെടുത്തിയതായി കരുതപ്പെടുന്നു. വടക്കേ ഇന്ത്യയില്‍ ആധിപത്യം സ്ഥാപിക്കുവാന്‍ ശ്രമിച്ച പ്രതിഹാരന്മാരും രാഷ്ട്രകൂടരും ഇദ്ദേഹത്തിന്റെ മുഖ്യ പ്രതിയോഗികളായിരുന്നു. പ്രതിഹാരന്മാരുടെയും രാഷ്ട്രകൂടരുടെയും സേനയെക്കാള്‍ മികച്ചതായിരുന്നു ഇദ്ദേഹത്തിന്റെ സൈന്യം എന്ന് അറബി സഞ്ചാരിയായ സുലൈമാന്‍ രേഖപ്പെടുത്തിയിട്ടുണ്ട്. ഇന്ത്യയ്ക്കു പുറത്തും ദേവപാലന്റെ പ്രശസ്തി വ്യാപിച്ചിരുന്നു. സുമാത്രയിലെ രാജാവായിരുന്ന ബാലപുത്രദേവന്റെ അഭ്യര്‍ഥനപ്രകാരം നാളന്ദയില്‍ ഒരു ബുദ്ധവിഹാരം പണിയുന്നതിനാവശ്യമായ സ്ഥലം ഇദ്ദേഹം വിട്ടുകൊടുത്തതായി നാളന്ദയില്‍നിന്നു കണ്ടെടുത്ത താമ്രശാസനം വ്യക്തമാക്കുന്നു.
855-ല്‍ ദേവപാലന്റെ മരണശേഷം പാല സാമ്രാജ്യം അപചയാവസ്ഥയിലേക്കു നീങ്ങി.
ദേവപ്രശ്നം
ജ്യോതിഷ സംബന്ധിയായ ഒരു അനുഷ്ഠാനം. ക്ഷേത്രങ്ങളില്‍ ദേവസാന്നിധ്യത്തിനു ഹാനികരമായ എന്തെങ്കിലും സംഭവിച്ചിട്ടുണ്ടോ എന്നറിയാനായി നടത്തുന്ന 'പ്രശ്നം വയ്ക്കല്‍' ആണിത്. ക്ഷേത്രത്തില്‍ അപമൃതികള്‍ ഉണ്ടാവുക, ക്ഷേത്രപരിസരത്ത് തുടര്‍ച്ചയായി ദുരിതങ്ങള്‍ പെരുകുക, പൂജാദികര്‍മങ്ങള്‍ക്ക് അകാരണമായി വിഘ്നങ്ങള്‍ ഉണ്ടാവുക, കവര്‍ച്ച തുടങ്ങിയ കാര്യങ്ങള്‍ സംഭവിക്കുക എന്നീ സന്ദര്‍ഭങ്ങളിലെല്ലാം അതിനുള്ള കാരണം കണ്ടുപിടിക്കാനായി ദേവപ്രശ്നം നടത്തും. ക്ഷേത്ര നവീകരണത്തിനു മുന്നോടിയായും ദേവപ്രശ്നം നടത്താറുണ്ട്. ചുരുക്കത്തില്‍ ദേവന് അഹിതമായതു വല്ലതും ദേവാലയത്തില്‍ നടന്നിട്ടുണ്ടോ എന്നു കണ്ടുപിടിക്കുന്നതിനായോ ദേവാലയത്തില്‍ നടത്താനുദ്ദേശിക്കുന്ന പരിഷ്കാരങ്ങള്‍ ദേവനു ഹിതമായവയാണോ എന്നറിയുന്നതിനായോ ആണ് ദേവപ്രശ്നം നടത്തുന്നത്.
