This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇല്ലം
സര്‍വ്വവിജ്ഞാനകോശം സംരംഭത്തില്‍ നിന്ന്
ഇല്ലം
വീട്‌, പാർപ്പിടം, താമസസ്ഥലം, ഭവനം തുടങ്ങിയ സംജ്ഞകളുടെ പര്യായമായ ഒരു പദം. പരമ്പരാഗതമായി നമ്പൂതിരി, ഭട്ടതിരി, പോറ്റി തുടങ്ങിയ കേരള ബ്രാഹ്മണരുടെ ഗൃഹങ്ങളെ സൂചിപ്പിക്കാന്‍ ഉപയോഗിച്ചു വരുന്നു. വീട്‌ എന്ന അർഥത്തിലുള്ള "ഇൽ' ധാതുവാണ്‌ ഇല്ലമായിത്തീർന്നതെന്ന്‌ കേരള പാണിനീയത്തിൽ കാണുന്നു. ഇല്ലം എന്നതുപോലെ മലയാള ബ്രാഹ്മണ ഭവനങ്ങളെ മഠം, മന എന്നും വിളിക്കാറുണ്ട്‌. കേരളാവകാശക്രമം എന്ന ഒരു പഴയ പുസ്‌തകത്തിൽ (1881) ബ്രാഹ്മണരുടെ ഗൃഹത്തിന്‌ വിശേഷമായി ഇല്ലമെന്നും മഠമെന്നും പറഞ്ഞുവരുന്നുവെന്ന്‌ രേഖപ്പെടുത്തിയിട്ടുണ്ട്‌.
കേരളീയ വാസ്‌തുവിദ്യയുടെ മുഖമുദ്രകളായ നാലുകെട്ട്‌, എട്ടുകെട്ട്‌, പതിനാറുകെട്ട്‌ എന്നീ രീതികളിലാണ്‌ മുന്‍കാലങ്ങളിലെ ഇല്ലങ്ങളുടെ നിർമാണ സംവിധാനം. അങ്കണ(നടുമുറ്റ)ത്തിന്റെ മൂന്നുവശങ്ങളിലുമുള്ള തളങ്ങള്‍ക്കും മുറികള്‍ക്കും അവയുടെ പ്രത്യേകദിശകളെ അടിസ്ഥാനമാക്കി വടക്കിനി, കിഴക്കിനി, തെക്കിനി എന്നു വേർതിരിച്ചു പറയാറുണ്ട്‌. വടക്കിനി അന്തർജനങ്ങളുടെ പെരുമാറ്റത്തിനു നീക്കിവച്ചിരിക്കുന്നു. കിഴക്കിനി ആണ്‌ പൂജാമുറി (തേവാരപ്പുര). തെക്കിനി ഭക്ഷണശാല ആയിരിക്കും. വൈദികവും മതപരവുമായ അനുഷ്‌ഠാനങ്ങള്‍ പ്രായേണ വടക്കിനിയിലോ കിഴക്കിനിയിലോ ആണു നടത്താറുള്ളത്‌. പൂർവാഭിമുഖമായ കെട്ടിടത്തിൽ അങ്കണത്തിന്റെ പടിഞ്ഞാറു ഭാഗം സാധാരണയായി നെല്ലറ ആയിരിക്കും. നോ. കേരളീയവാസ്‌തുവിദ്യ നായർ സമുദായത്തിൽപ്പെട്ട ഒരു വിഭാഗത്തെയും ഇല്ലക്കാർ എന്നു വിളിച്ചുവന്നിരുന്നു.
"അവർണർ' എന്ന്‌ വ്യവഹരിക്കപ്പെട്ടുവന്ന സമുദായങ്ങളുടെ ഇടയിലും "ഇല്ല'വ്യത്യാസം ഒരു കാലത്ത്‌ നിലനിന്നിരുന്നു. ഒരേ "ഇല്ല'ത്തിൽപ്പെട്ടവർ തമ്മിലുള്ള ബന്ധങ്ങളെ അഗമ്യഗമനം (incest)എന്ന പരിധിയിലാണ്‌ ഈഴവർ ഉള്‍പ്പെടുത്തിയിരുന്നത്‌. "ഈഴവരുടെ ഇടയിൽ മൂട്ടില്ലം, മാടമ്പി ഇല്ലം, ചോഴി ഇല്ലം, മയ്യനാട്ടില്ലം എന്ന്‌ നാല്‌ ഇല്ലങ്ങള്‍ ഉണ്ട്‌. കൊല്ലം മുതൽ വടക്ക്‌ തൃക്കുന്നപ്പുഴ വരെ ഈ ഇല്ലം ഏർപ്പാട്‌ ഒരു കാലത്ത്‌ നിലവിലുണ്ടായിരുന്നു. തെക്കു കന്യാകുമാരി വരെയും പിന്നെ പാണ്ടിയിലും ഈഴവർക്ക്‌ ഈ ഇല്ലം ഏർപ്പാട്‌ ഇപ്പോഴും ഉണ്ട്‌. ഒരേ ഇല്ലക്കാർ തമ്മിൽ വിവാഹം പാടില്ല. അവർ തമ്മിൽ സഹോദരബന്ധമാണുള്ളത്‌' (സി.കേശവന്‍, ജീവിതസമരം, 1953). ഈഴവരുടെ ഇടയിൽ പള്ളിച്ചൽ ഇല്ലം, പാച്ചല്ലൂർ ഇല്ലം എന്ന മറ്റു രണ്ടു വിഭാഗങ്ങള്‍ കൂടി തെക്കന്‍ തിരുവിതാംകൂറിൽ നിലവിലുള്ളതായി രേഖകളുണ്ട്‌.
മുക്കുവരിലും പുലയരിലും "ഇല്ലം' എന്ന ഒരു ജാതിവിഭാഗം ഉണ്ടായിരുന്നതായി പന്നിക്കോട്ട കരുണാകരമേനോന്‍ (19-ാം ശ.) രചിച്ച ദക്ഷിണ ഇന്ത്യയിലെ ജാതികള്‍ എന്ന പുസ്‌തകത്തിൽ പറയുന്നു. "വടക്കേ മലയാളത്തിൽ പൊന്നില്ലം, ചെമ്പില്ലം, കാരില്ലം, കാച്ചില്ലം ഇങ്ങനെ നാല്‌ ഇല്ലക്കാരാണ്‌. തെക്കേ മലയാളത്തിൽ പൊന്നില്ലം ഇല്ല. അതിനാൽ മൂന്നില്ലക്കാർ (മുക്കുവർ) എന്നു പറയും.' കൊയ്‌ത്തു കഴിഞ്ഞ്‌ നെൽക്കതിരുകള്‍ ശേഖരിച്ചു ദേവനു നിവേദിച്ച്‌ ശുഭമുഹൂർത്തത്തിൽ ഗൃഹത്തിന്‌ അലങ്കാരമായി നെല്ലറയുടെ മുന്നിൽ കെട്ടിത്തൂക്കുന്ന ഒരു ആചാരവിശേഷത്തിന്‌ "ഇല്ലംനിറ' എന്നു പേരുണ്ട്‌. "ഇല്ലം നിറച്ചാൽ വല്ലവും നിറയ്‌ക്കണം' എന്ന പഴമൊഴി ഇതിൽനിന്നും ഉടലെടുത്തതാണ്‌. "ധാന്യവൃദ്ധി എന്ന്‌ ഇല്ലം നിറയ്‌ക്ക' എന്ന്‌ മഴമംഗലം ശങ്കരന്‍ നമ്പൂതിരിയുടെ മുഹൂർത്തപദവി വ്യാഖ്യാനത്തിൽ കാണുന്നു.
