This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇറക്വോയ്‌ലീഗ്‌
സര്‍വ്വവിജ്ഞാനകോശം സംരംഭത്തില്‍ നിന്ന്
ഇറക്വോയ്‌ലീഗ്‌
Iroquois league
പതിനേഴും പതിനെട്ടും ശതകങ്ങളിൽ വടക്കേ അമേരിക്കയിൽ നിലവിലിരുന്ന അമേരിന്ത്യരുടെ ഗോത്ര രാഷ്‌ട്രീയസഖ്യം. ദെക്കനവിദ എന്ന പ്രവാചകനും അദ്ദേഹത്തിന്റെ അനുയായിയായ ഹൈയാവതയുമായിരുന്നു ഈ സഖ്യം രൂപവത്‌കരിച്ചത്‌. (ദെക്കനവിദ പുരാണം ആദിവാസി സാഹിത്യത്തിൽ പ്രചാരം സിദ്ധിച്ചിട്ടുള്ള കൃതിയാണ്‌. പ്രസ്‌തുത കൃതിയിൽനിന്ന്‌ അടർത്തിയെടുത്ത ചില വരികള്‍ ദേശീയാഘോഷങ്ങളിൽ ആലപിക്കുന്ന പതിവുണ്ട്‌). 1507-നും 1600-നും ഇടയ്‌ക്കാണ്‌ ഇറക്വോയ്‌ലീഗ്‌ സ്ഥാപിതമായതെന്നു ചില ചരിത്ര രേഖകള്‍ സൂചിപ്പിക്കുന്നു. മോഹോക്ക്‌, ഒനൈഡ, ഓനെന്‍ഡോഗെ, കെയൂഗെ, സെനെകെ എന്നീ ഗോത്രങ്ങള്‍ സ്ഥാപകാംഗങ്ങളായ ഈ സഖ്യത്തിൽ പിന്നീട്‌ ടസ്‌കെറോറെ ഗോത്രവും ചേർന്നു. യു.എസ്സിലെ ഗ്രറ്റ്‌ലേക്‌സിനും അപ്പലേച്ചിയന്‍ പീഠഭൂമിക്കും ചുറ്റുമുള്ള പ്രദേശത്ത്‌ അധിവസിച്ച ഇവർ 17-ാം ശതകത്തോടുകൂടി ദക്ഷിണ കാനഡ മുതൽ കെന്‍ടക്കി വരെയും കിഴക്ക്‌ പെന്‍സിൽവാനിയ മുതൽ ഒഹയോ വരെയും വ്യാപിച്ചു. ഇറക്വോയ്‌ ഭാഷയായിരുന്നു ഇവർ സംസാരിച്ചിരുന്നത്‌. ഇറക്വോയ്‌ ഗ്രറ്റ്‌ കൗണ്‍സിലായിരുന്നു ലീഗിന്റെ ഭരണം നിർവഹിച്ചിരുന്നത്‌. ഓരോ വർഗത്തെയും പ്രതിനിധീകരിച്ച്‌ 8-നും 10-നുമിടയ്‌ക്ക്‌ അംഗങ്ങള്‍ കൗണ്‍സിലിൽ പങ്കെടുത്തിരുന്നു. ചർച്ചകളിലൂടെയും വോട്ടിങ്ങിലൂടെയുമായിരുന്നു പ്രധാന രാഷ്‌ട്രീയ പ്രശ്‌നങ്ങള്‍ക്ക്‌ അവർ പരിഹാരം കണ്ടെത്തിയത്‌.
വടക്ക്‌ കിഴക്കന്‍ അമേരിക്കയുടെ പ്രദേശങ്ങളിൽ നിലവിലിരുന്ന പല രാഷ്‌ട്രീയസഖ്യങ്ങളെക്കാള്‍ നല്ലരീതിയിൽ സംഘടിപ്പിക്കുകയും ഫലപ്രദമായി പ്രാവർത്തികമാക്കുകയും ചെയ്‌ത ഒന്നായിരുന്നു ഇറക്വോയ്‌ ലീഗ്‌. രാഷ്‌ട്രതന്ത്രജ്ഞരെന്ന നിലയ്‌ക്കുള്ള അവരുടെ വൈദഗ്‌ധ്യവും അഗ്നികൊണ്ടുള്ള ആയുധോപകരണങ്ങളുടെ ഉടമസ്ഥാവകാശവും മുഖേനയാണ്‌ അവർ അധികാരം നിലനിർത്തിപ്പോന്നത്‌. രോമവ്യാപാരത്തിൽ പ്രമുഖരായിരുന്ന ഇവർ ചോളക്കൃഷിയും നടത്തിയിരുന്നു. യൂറോപ്യന്മാരുടെ അധിനിവേശമുണ്ടായതോടെ വീരസാഹസികരും യുദ്ധനിപുണരുമായിരുന്ന ഇവരുടെ പതനം ആരംഭിച്ചു. 1624-ൽ ഇവർ ആദ്യമായി ഫ്രഞ്ചുകാരുമായി സന്ധിചെയ്‌തു. ഡച്ചുകാരോടും ബ്രിട്ടീഷുകാരോടും ഇവർ മമതയിലാണ്‌ വർത്തിച്ചിരുന്നത്‌. അമേരിക്കന്‍ വിപ്ലവകാലത്ത്‌ (1775-83) ഇറക്വോയ്‌ലീഗിൽ ഭിന്നിപ്പ്‌ പ്രകടമായി. ഓനീഡയും ടസ്‌കറോറയും അമേരിക്കന്‍പക്ഷത്ത്‌ അണിനിരന്നപ്പോള്‍ മറ്റുള്ളവർ ബ്രിട്ടനോടൊപ്പമാണ്‌ നിന്നത്‌. 1784-ൽ യു.എസ്സുമായുണ്ടായ കരാർപ്രകാരം ലീഗ്‌ പിരിച്ചുവിടപ്പെട്ടു.
ന്യൂയോർക്കിലെ ഇറക്വോയ്‌ അധിനിവേശകേന്ദ്രത്തിലും, കാനഡയിലെ ചില സംരക്ഷിതപ്രദേശങ്ങളിലുമായി ഇറക്വോയ്‌ വർഗക്കാർ ഇന്ന്‌ കഴിഞ്ഞുകൂടുന്നു. വെള്ളക്കാരും ഇക്കൂട്ടരുമായുള്ള സങ്കരവിവാഹം ഇപ്പോള്‍ സാധാരണമായിത്തീർന്നിട്ടുണ്ട്‌. ഫ്രാങ്ക്‌ലിന്‍, വാഷിങ്‌ടണ്‍ തുടങ്ങിയ അമേരിക്കന്‍ രാഷ്‌ട്രശില്‌പികളുടെ രാഷ്‌ട്രീയദർശനത്തെ ഇറക്വോയ്‌ ഭരണഘടന സാരമായി സ്വാധീനിച്ചിട്ടുണ്ട്‌. അവരുടെ പല മാതൃകകളും യു.എസ്‌. ഭരണഘടനയിൽ സ്വീകരിക്കുകയും ചെയ്‌തിട്ടുണ്ട്‌.
