This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇൽമനൈറ്റ്‌
സര്‍വ്വവിജ്ഞാനകോശം സംരംഭത്തില്‍ നിന്ന്
ഇൽമനൈറ്റ്‌
Ilmenite
ടൈറ്റാനിയത്തിന്റെ പ്രധാന അയിരുകളിൽ ഒന്നായ ധാതു. സംരചനാഫോർമുല എല ഠശഛ3. ദക്ഷിണ യൂറാളിലെ (റഷ്യ) ഇൽമെന്‍ മലനിരകളിൽ ആദ്യമായി ഖനനം ചെയ്യപ്പെട്ടതിനാൽ ഇൽമനൈറ്റ്‌ എന്ന പേർ സിദ്ധിച്ചു. 36.8 ശതമാനം ഇരുമ്പ്‌, 31.6 ശതമാനം ടൈറ്റാനിയം, 31.6 ശതമാനം ഓക്‌സിജന്‍ എന്നീ ക്രമത്തിലാണ്‌ ഇൽമനൈറ്റിന്റെ രാസഘടന. ടൈറ്റാനിയം ഉത്‌പാദിപ്പിക്കുന്നതിനു പുറമേ ഇൽമനൈറ്റിനു ബഹുമുഖമായ ഉപയോഗങ്ങളുണ്ട്‌. ഉരുക്കുദണ്ഡുകള്‍ പൊതിയുന്നതിനും അവയെ വിളക്കിച്ചേർക്കുന്നതിനും ആർക്‌ ലാമ്പുകളിലെ(arc lamps) ഇലക്‌ട്രാഡുകള്‍ നിർമിക്കുന്നതിനും ടൈറ്റാനിയം ടെട്രാക്ലോറൈഡ്‌ തുടങ്ങി രംഗബന്ധക(mordant)ങ്ങളായും ചായക്കൂട്ടുകളായും മറ്റും ഉപയോഗിക്കപ്പെട്ടുവരുന്ന വിവിധ ടൈറ്റാനിയം യൗഗികങ്ങളുടെ നിർമാണത്തിനും ഇൽമനൈറ്റ്‌ പ്രയോജനപ്പെടുന്നു. ഇരുമ്പിന്റേതിനോടു സാദൃശ്യമുള്ള ഇരുണ്ടനിറമുള്ള ഇൽമനൈറ്റിന്‌ നേരിയ ലോഹദ്യുതിയും ദുർബലമായ കാന്തികശക്തിയുമുണ്ട്‌. സംസേചിതവും (impregnated) അനിയമിതവുമായ തരികളായാണ്‌ സാധാരണ കാണാറുള്ളത്‌. സാരണീബദ്ധമോ (tabular) ത്രിസമനതാക്ഷമോ(rhombohedral), അപൂർവമായി പടലിതമോ (lamellar) ആയി അസമമിതമായ ക്രിസ്റ്റൽ ഘടനയുണ്ട്‌. കാഠിന്യം 5-6 ആകുന്നു. ആപേക്ഷികസാന്ദ്രത 4.72. അതാര്യമായ ഇൽമനൈറ്റ്‌ ക്രിസ്റ്റലുകള്‍ക്ക്‌ കറുപ്പോ ഇരുണ്ട തവിട്ടോ തവിട്ടു കലർന്ന ചുവപ്പോ ആയ ചൂർണാഭ(streak)യും സാധാരണമാണ്‌. ഹേമറ്റൈറ്റിനോടു സാദൃശ്യമുള്ള ഇൽമനൈറ്റ്‌ സംപുഞ്‌ജങ്ങളെ തിരിച്ചറിയുന്നതിന്‌ ഈ ചൂർണാഭയും കാന്തികശക്തിയുടെ തീവ്രതക്കുറവുമാണ്‌ സഹായിക്കുന്നത്‌.
ബ്ലോപൈപ്പുകള്‍ ഉപയോഗിച്ചുപോലും ഉരുക്കാനാവാത്ത ഉച്ചതാപസഹമാണ്‌ ഇൽമനൈറ്റ്‌. ധൂളീകൃതരൂപത്തിൽ ഗാഢഹൈഡ്രാക്ലോറിക്‌ അമ്ലത്തിൽ ഭാഗികമായി ലയിച്ച്‌ ടൈറ്റാനിയം ഓക്‌സൈഡിനെ അവക്ഷേപിക്കുന്നു. പൊട്ടാസ്യം ബൈസള്‍ഫേറ്റുമായി ചേർത്ത്‌ ഉരുക്കിയ ഇൽമനൈറ്റ്‌, തകരവുമായി ചേർത്തു തിളപ്പിക്കുമ്പോള്‍ ലായനിക്ക്‌ വയലറ്റ്‌-ബ്ലൂ (violet-blue) നിറം സിദ്ധിക്കുന്നു. ഈ ലായനി വെള്ളം ചേർത്ത്‌ നേർപ്പിക്കുമ്പോള്‍ ക്രമേണ പാടലവർണം കൈക്കൊള്ളുന്നു.
അവസ്ഥിതി. ഗാബ്രാ, ഡയാബേസ്‌, പൈറോക്‌സിനൈറ്റുകള്‍ തുടങ്ങിയ അല്‌പസിലിക ശിലകളിൽ സംസേചനങ്ങള്‍ (impregnations) ആയി കാണപ്പെടുന്നു. മിക്കപ്പോഴും മാഗ്നറ്റൈറ്റുമായി ചേർന്നിരിക്കും. അപൂർവമായി സയനൈറ്റിക്‌ പെഗ്മട്ടൈറ്റുകളിൽ ഇൽമനൈറ്റിന്റെ നിബിഡ നിക്ഷേപങ്ങള്‍ കണ്ടെത്തിയിട്ടുണ്ട്‌. ഫെൽസ്‌പാർ, ബയോട്ടൈറ്റ്‌ എന്നിവയുമായുള്ള ക്രമിക-സഹജനനം paragenesis) ആണ്‌ ഇമ്മാതിരി നിക്ഷേപങ്ങള്‍ക്ക്‌ നിദാനം. താരതമ്യേന കനവും കടുപ്പവും കൂടിയ ഇൽമനൈറ്റ്‌ തരികള്‍ പ്ലേസർ നിക്ഷേപങ്ങള്‍ (placer deposits) ആയി കടൽപ്പുറത്തും നദീതടങ്ങളിലും സമൃദ്ധമായി കാണപ്പെടുന്നു.
ഇന്ത്യയിലെ നിക്ഷേപങ്ങള്‍. ഇന്ത്യയുടെ പൂർവപശ്ചിമ തീരങ്ങളിലെ കടൽപ്പുറങ്ങളിൽ ഇൽമനൈറ്റ്‌ നിക്ഷേപങ്ങള്‍ ഉണ്ട്‌. കേരളം, തമിഴ്‌നാട്‌, ആന്ധ്രപ്രദേശ്‌, മഹാരാഷ്‌ട്ര എന്നീ സംസ്ഥാനങ്ങളിലെ തീരപ്രദേശത്താണ്‌ സമ്പന്നനിക്ഷേപങ്ങളുള്ളത്‌. ഏറ്റവും പ്രധാനപ്പെട്ട മേഖല കായംകുളം മുതൽ കന്യാകുമാരി വരെയുള്ള കടൽത്തീരമാണ്‌. കേരളത്തിലെ ചവറയും തമിഴ്‌നാട്ടിൽ കന്യാകുമാരി ജില്ലയിൽപ്പെട്ട മണവാളക്കുറിച്ചിയുമാണ്‌ പ്രധാന ഖനനകേന്ദ്രങ്ങള്‍. ചവറയിലാണ്‌ മുന്തിയഇനം ഇൽമനൈറ്റ്‌ ലഭിക്കുന്നത്‌. ചവറയിലെ മണലിൽ ഇൽമനൈറ്റ്‌ (65-70%), റൂട്ടൈൽ (3-4%), സിർക്കോണ്‍(5-10%), മോണസൈറ്റും മാഗ്നറ്റൈറ്റും (1-2%), സില്ലിമനൈറ്റ്‌ (5-10%), ക്വാർട്ട്‌സ്‌ (5-10%) എന്നിവ അടങ്ങിയിരിക്കുന്നു. മണവാളക്കുറിച്ചിയിൽ നിന്നു ലഭിക്കുന്ന ഇൽമനൈറ്റിൽ ടൈറ്റാനിയം ഓക്‌സൈഡിന്റെ ശരാശരി തോത്‌ 54 ശതമാനം മാത്രമാണ്‌. മേല്‌പറഞ്ഞ മേഖലയിൽ മൊത്തം 35 കോടി ടണ്‍ ഇൽമനൈറ്റ്‌ നിക്ഷേപങ്ങളുള്ളതായി കണക്കാക്കപ്പെട്ടിരിക്കുന്നു.
ബിഹാറിലെ സിങ്‌ഭൂം ജില്ലയിലും, ഒഡിഷയിലെ മയൂർഭഞ്‌ജ്‌, കിയോത്സാർ ജില്ലകളിലും ഇൽമനൈറ്റ്‌ നിക്ഷേപങ്ങളുണ്ട്‌. വനേഡിയം ഉള്‍ക്കൊള്ളുന്ന ടൈറ്റാനിഫെറസ്‌ മാഗ്നറ്റൈറ്റ്‌ അയിരുകള്‍ക്കിടയിലായി അവസ്ഥിതമായിട്ടുള്ള ഇവയിൽ ടൈറ്റാനിയം ഓക്‌സൈഡിന്റെ ശരാശരി തോത്‌ 17 ശതമാനം മാത്രമാണ്‌. കർണാടക, രാജസ്ഥാന്‍ എന്നീ സംസ്ഥാനങ്ങളിലും അല്‌പമായ തോതിൽ ഇൽമനൈറ്റ്‌ നിക്ഷേപങ്ങള്‍ കണ്ടെത്തിയിട്ടുണ്ട്‌.
ഇന്ത്യയിൽ ഉത്‌പാദിപ്പിക്കുന്ന ഇൽമനൈറ്റിൽ നല്ലൊരു ശതമാനം കയറ്റുമതി ചെയ്യപ്പെടുന്നു. തിരുവനന്തപുരത്തും ചവറയിലുമുള്ള ടൈറ്റാനിയം ഫാക്‌ടറികളാണ്‌ ഇവിടെ ഇൽമനൈറ്റിന്റെ ഉപഭോക്താക്കള്‍. ശുഭ്രവർണമുള്ള ടൈറ്റാനിയം പെയിന്റ്‌, ആർക്‌വെൽഡിങ്ങിനുള്ള ഇലക്‌ട്രാഡുകള്‍ തുടങ്ങിയവ നിർമിക്കുന്നതിലാണ്‌ ഇൽമനൈറ്റിന്റെ ദേശീയ ഉപഭോഗം.
