This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഒളിമ്പസ്‌
സര്‍വ്വവിജ്ഞാനകോശം സംരംഭത്തില്‍ നിന്ന്
ഒളിമ്പസ്‌
Olympus
1. പുരാതന ഗ്രീസിലെയും ഏഷ്യാമൈനറിലെയും നിരവധി പർവതനിരകളുടെ കൂട്ടായ പേര്‌. തെസ്സാലിയെയും മാസിഡോണിയയെയും വേർതിരിക്കുന്ന ഗ്രീസിലെ ഏറ്റവും ഉയരംകൂടിയ പർവതനിരകളാണ്‌ ഇവയിൽ പ്രധാനം. ഏറ്റവും ഉയരംകൂടിയ കൊടുമുടിക്ക്‌ 2,917 മീ. പൊക്കമുണ്ട്‌. ഗ്രീക്ക്‌ പുരാണങ്ങളനുസരിച്ച്‌ ഈ പർവതനിരകളുടെ ശിഖരങ്ങളിലാണ്‌ ഗ്രീക്ക്‌ ദേവതകളുടെ ആലയങ്ങള്‍; ഈ ആലയങ്ങള്‍ ഹെഫേസ്റ്റസ്‌ എന്നു പേരായ ദേവതയാണ്‌ നിർമിച്ചതെന്നും വിശ്വസിച്ചുപോരുന്നു. ഋതുക്കള്‍ എന്നറിയപ്പെട്ടിരുന്ന ദേവതകളാൽ സംരക്ഷിക്കപ്പെട്ടിരുന്ന കവാടമാണ്‌ ഒളിമ്പസ്സിലേക്കുള്ള പ്രവേശനദ്വാരം. ദേവതകളുടെ രാജാവായ സ്യൂസിന്റെ സിംഹാസനം ഒളിമ്പസ്സിലാണ്‌. സ്യൂസ്‌ അദ്ദേഹത്തിന്റെ പത്‌നി ഹേര, സമുദ്രദേവതയും സ്യൂസിന്റെ സഹോദരനും ആയ പൊസൈഡോണ്‍, പാതാളദേവതയും സ്യൂസിന്റെ മറ്റൊരു സഹോദരനും ആയ ഹേഡ്‌സ്‌, സഹോദരിയായ ഹെസ്റ്റ്യ, പുത്രിമാരായ അഥീന, ആർട്ടെമിസ്‌, അഫ്രാഡൈറ്റ്‌, പുത്രന്മാരായ എറിസ്‌, അപ്പോളൊ, ദൈവദൂതനായ ഹെർമസ്‌, ഹെഫേസ്റ്റസ്‌ എന്നിങ്ങനെ ഗ്രീക്കുദേവതകളിൽ പ്രധാനികളായ 12 പേരുടെ ആലയങ്ങളാണ്‌ ഒളിമ്പസ്സിലുള്ളതെന്നു പറയപ്പെടുന്നു. പില്‌ക്കാല ഗ്രീക്കു സാഹിത്യകാരന്മാർ ഗ്രീക്കുദേവതകളുടെ ആലയസ്ഥാനം മഞ്ഞുമൂടിയ ഒളിമ്പസ്‌ അല്ല എന്ന്‌ പ്രസ്‌താവിച്ചിട്ടുണ്ട്‌.
2. ലിസിയയിലെ ഒരു നഗരത്തിനും ഈ പേരുണ്ടായിരുന്നു. തുർക്കിയിലെ ഉലുഡാഗ എന്നറിയപ്പെടുന്ന പർവതനിരകളുടെ പേരും ഒളിമ്പസ്‌ എന്നാണ്‌. സൈപ്രസ്സിലെ തൂഡോസ്‌ പർവതത്തിന്റെ ഏറ്റവും ഉയരം കൂടിയ കൊടുമുടിയും ഒളിമ്പസ്‌ എന്ന പേരിലറിയപ്പെട്ടിരുന്നു.
