This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഒനിക്കോഫൊറ
സര്‍വ്വവിജ്ഞാനകോശം സംരംഭത്തില്‍ നിന്ന്
ഒനിക്കോഫൊറ
Onychophora
ഭൂമിയിലെ ഏറ്റവും പുരാതനജീവികളുടെ കൂട്ടത്തിൽപ്പെട്ട ഒരു വിഭാഗം. ആർത്രാപ്പോഡ ഫൈലത്തിലെ ഒരു വർഗമായും, ഒരു സ്വതന്ത്രഫൈലമായും ഇതിന്‌ സ്ഥാനം നല്‌കുന്ന ജന്തുശാസ്‌ത്രജ്ഞരുണ്ട്‌. പട്ടുപോലെ മൃദുവും നീണ്ടതുമായ ശരീരത്തോടുകൂടിയ ഈ ചെറുപുഴുക്കള്‍ക്ക്‌ കാഴ്‌ചയിൽ "കാറ്റർപില്ലറി'നോടാണ്‌ സാദൃശ്യം. ആദിമ ആർത്രാപ്പോഡുകളുടെ പൂർവികർ, "വെൽവെറ്റ്‌ പുഴുക്കള്‍' എന്നു പേരുള്ള ഒനിക്കോ ഫൊറകളെപ്പോലെ ആയിരുന്നിരിക്കണം എന്നു കരുതപ്പെടുന്നു. കരയിൽ കാണുന്ന ആർത്രാപ്പോഡുകളിൽ ഏറ്റവും പ്രാകൃതജീവികളാണിവ.
ഒനിക്കോസ്‌ (Onychos: claw), ഫെറിന്‍ (pherein: bearing)എന്നീ ഗ്രീക്‌ പദങ്ങളിൽ നിന്നാണ്‌ ഒനിക്കോഫൊറയുടെ ഉദ്‌ഭവം. ഇതിലെ അംഗങ്ങള്‍ക്ക്‌ ഉദ്ദേശം 20 സെ.മീ. നീളമുണ്ടായിരിക്കും. ശരീരത്തിൽനിന്നു വ്യതിരിക്തമായ തല ഇവയിലൊന്നിനുപോലും ഉണ്ടായിരിക്കില്ല. എന്നാൽ ഒരു ജോടി ലളിതനേത്രങ്ങള്‍; നീളം കുറഞ്ഞ്‌ പല ഖണ്ഡങ്ങള്‍ ചേർന്ന സ്‌പർശിനികള്‍ (antennae); ബോധേന്ദ്രിയമായി വർത്തിക്കുന്ന ഒരു ജോടി "ഓറൽ പാപ്പില'കള്‍ എന്നിവ ഈ പുഴുക്കളിൽ വ്യക്തമായി കാണാന്‍ കഴിയും. "സ്ലൈം'- ഗ്രന്ഥികള്‍ (slime glands) ഓറൽ പാപ്പിലകളിലേക്കു തുറക്കുന്നു. 15 മുതൽ 43 വരെ ജോടി കുറുകിയ കാലുകളും ഉണ്ടായിരിക്കും. ഈ കാലുകള്‍ ഖണ്ഡങ്ങള്‍ ചേർന്നുണ്ടായവയല്ല. രണ്ടായി തിരിഞ്ഞിട്ടുള്ള "നഖ'ങ്ങളിൽ അവസാനിക്കുന്ന ഈ കാലുകളാണ്‌ ഈ പുഴുക്കള്‍ക്ക്‌ "ഒനിക്കോഫൊറ' (claw-bearing)എന്ന പേര്‌ നേടിക്കൊടുത്തത്‌. മുറിയുന്ന വായ്‌ത്തലയുള്ള ഒരു ജോടി ഹനുക്കള്‍ (jaws), "ഹീമോസീൽ' എന്നറിയപ്പെടുന്ന ശരീരകുഹരം, ട്രക്കിയൽ ട്യൂബുകള്‍ ഉപയോഗിക്കുന്ന ശ്വസനവ്യൂഹം, നെഫ്രിഡിയകള്‍ പ്രവർത്തിക്കുന്ന വിസർജനവ്യൂഹം എന്നിവ ഈ പുഴുക്കളുടെ മറ്റു സവിശേഷതകളാകുന്നു. ലിംഗഭേദം ദൃശ്യമായ ഇവയിൽ ഉത്‌പാദനാവയവങ്ങള്‍ ജോടിയായാണ്‌ കാണപ്പെടുന്നത്‌.
അനലിഡുകളുടെയും ആർത്രാപ്പോഡുകളുടെയും പല സ്വഭാവവിശേഷങ്ങളും പ്രദർശിപ്പിക്കുന്ന വെൽവെറ്റ്‌ പുഴുക്കള്‍ക്ക്‌ താഴെപ്പറയുന്ന പ്രത്യേകതകളാൽ ഒരു സ്വതന്ത്രഫൈലത്തിന്റെ സ്ഥാനം നല്‌കാന്‍ ചില ശാസ്‌ത്രജ്ഞർ തയ്യാറായി. ഒരേയൊരു ജോടി ഹനുക്കള്‍; ഖണ്ഡങ്ങളായി വേർതിരിഞ്ഞിട്ടില്ലാത്ത ശരീരം; ഗാങ്‌ഗ്ലിയകളില്ലാത്തതും വേർതിരിച്ചുള്ളതുമായ നാഡീതന്ത്രികള്‍ എന്നിവ ഒനിക്കോഫൊറുകളുടെ തനതായ സവിശേഷതകളാകുന്നു. ഉപാംഗങ്ങളിൽ നിന്നു രൂപംകൊണ്ട ഹനുക്കള്‍; ഹീമോസീൽ; ചുരുങ്ങിയ സീലോം എന്നിവയാണ്‌ ഈ പുഴുക്കളിൽ ദൃശ്യമാകുന്ന ആർത്രാപ്പോഡ്‌ സ്വഭാവങ്ങള്‍. കണ്ണുകളുടെ ഘടന, നെഫ്രിഡിയകളുടെ സാന്നിധ്യം, സങ്കീർണമല്ലാത്ത കുടൽ എന്നിവ അനലിഡന്‍-സ്വഭാവങ്ങളാകുന്നു. മേല്‌പറഞ്ഞ പ്രത്യേകതകളാൽ, അനലിഡുകളെയും ആർത്രാപ്പോഡുകളെയും തമ്മിൽ ബന്ധിപ്പിക്കുന്ന ഈ കണ്ണിയായാണ്‌ കൂടുതൽ ജന്തുശാസ്‌ത്രജ്ഞരും ഈ വിഭാഗത്തെ കരുതുന്നത്‌.
ഒനിക്കോഫൊറാന്‍ പുഴുക്കളുടെ വിതരണത്തിലെ പ്രത്യേകത ഇന്നും ഉത്തരം കണ്ടെത്താനാവാത്ത ഒരു പ്രശ്‌നമായവശേഷിക്കുന്നു. മധ്യ-അമേരിക്ക, ആസ്റ്റ്രലിയ, കോംഗോ തുടങ്ങി ഭൂമിശാസ്‌ത്രപരമായി വളരെയധികം വേർപെട്ടുകിടക്കുന്ന രാജ്യങ്ങളിലും തിബത്തിലും ഇവയെ കണ്ടെത്തിയിട്ടുള്ളത്‌. ഇരുണ്ടതും ഈർപ്പം നിറഞ്ഞതുമായ സ്ഥലങ്ങളിലെ മണ്ണിൽ ഇവ ജീവിക്കുന്നു. ഈ പ്രദേശങ്ങളിൽത്തന്നെ ഇവ എണ്ണത്തിൽ വളരെ കുറവാണുതാനും. ഇക്കൂട്ടത്തിൽ ഏറ്റവും അറിയപ്പെടുന്ന ജീനസ്സിന്റെ പേരാണ്‌ പെരിപാറ്റസ്‌. ഇതിൽ 70 സ്‌പീഷീസുകള്‍ ഉള്ളതായി കണക്കാക്കപ്പെട്ടിരിക്കുന്നു.
