This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഒഡോനൽ (1809 - 67)
സര്‍വ്വവിജ്ഞാനകോശം സംരംഭത്തില്‍ നിന്ന്
ഒഡോനൽ (1809 - 67)
Odonnell
സ്‌പെയിനിലെ രാഷ്‌ട്രീയ നേതാവ്‌. ഒന്നാം കാർലിസ്റ്റുയുദ്ധ(1833-39)ത്തോടെയാണ്‌ ഇദ്ദേഹം ശ്രദ്ധേയനായിത്തീർന്നത്‌. 1840-ൽ ഫ്രാന്‍സിൽ അഭയം തേടിയ ഒഡോനൽ മൂന്നുവർഷത്തിനുശേഷം തിരിച്ചെത്തി. ജനറൽ ബൽദൊമെറൊ എസ്‌പാർടെറോയുടെ നേതൃത്വത്തിലുള്ള ഗവണ്‍മെന്റിനെ മറിച്ചിടുകയായിരുന്നു ലക്ഷ്യം. 1844-45 കാലത്ത്‌ ക്യൂബയിലെ ക്യാപ്‌റ്റന്‍ ജനറൽ ആയി നിയമിതനായി. 1843-ലെയും 54-ലെയും സൈനിക കലാപങ്ങളിൽ ഒഡോനൽ സുപ്രധാനമായ പങ്കുവഹിച്ചു. 1854-ൽ ലിബറൽ ചിന്താഗതിയുടെ വക്താവെന്ന നിലയിൽ നടത്തിയ കലാപത്തിലൂടെ ജനശ്രദ്ധയാകർഷിക്കുകയും സ്‌പെയിനിലെ യുദ്ധകാര്യമന്ത്രിയായിത്തീരുകയും ചെയ്‌തു. ഈ പദവിയിലിരുന്നുകൊണ്ട്‌ പ്രധാനമന്ത്രിയായ എസ്‌പാർടെറോയുമായി അധികാരം പങ്കുവച്ചു. 1856 ജൂലായിൽ എസ്‌പാർടെറോയെ പ്രധാനമന്ത്രിപദത്തിൽനിന്ന്‌ നിഷ്‌കാസനം ചെയ്‌ത്‌ സ്വയം അധികാരം കൈയടക്കി. എന്നാൽ ആ വർഷം ഒക്‌ടോബർ വരെ മാത്രമേ അധികാരത്തിൽ തുടരാന്‍ ഒഡോനലിന്‌ കഴിഞ്ഞുള്ളൂ. പിന്നീട്‌ "ലിബറൽ യൂണിയ'ന്റെ നേതാവെന്ന നിലയിൽ 1858 മുതൽ 1863 വരെ വീണ്ടും അധികാരത്തിൽ തുടരുവാന്‍ ഇദ്ദേഹത്തിനു കഴിഞ്ഞു.
1845-ലെ യാഥാസ്ഥിതിക ഭരണഘടന പ്രകാരമുള്ള ഒഡോനലിന്റെ ഭരണം, സാമ്പത്തിക വികസനം, സഭാസ്വത്തിനെ സംബന്ധിച്ച തർക്കപരിഹാരം, മൊറോക്കോ, സാന്തോഡോമിന്‍ഗൊ, മെക്‌സിക്കൊ എന്നിവിടങ്ങളിലെ അവസരവാദപരമായ ഇടപെടൽ എന്നിവകളാൽ പ്രതേ്യകം ശ്രദ്ധേയമായിരുന്നു. മൊറോക്കോയുദ്ധത്തിൽ (1859-61) ഇദ്ദേഹം സ്വയം സേനയെ നയിക്കുകയും ജനപ്രീതി നേടുകയും ചെയ്‌തു. ഹ്രസ്വകാലത്തേക്ക്‌ (1865-66) ഒഡോനൽ പ്രധാനമന്ത്രിയായും സേവനമനുഷ്‌ഠിച്ചു. സുവ്യക്തമായ ഒരു രാഷ്‌ട്രീയവീക്ഷണമുണ്ടായിരുന്നില്ലെങ്കിലും ഇസബെല്ല രാജ്ഞിയുടെ (ഭ.കാ. 1833-68) ഒരു ശക്തനായ പിന്തുണക്കാരനായ ഇദ്ദേഹം പൊതുവേ യാഥാസ്ഥിതികമായ ഒരു നയമാണ്‌ അനുവർത്തിച്ചിരുന്നത്‌. പ്രാരംഭകാലത്ത്‌ അനുരഞ്‌ജനനയം പിന്തുടർന്നിരുന്ന ഒഡോനലിന്‌ 1866-ൽ രണ്ടു കലാപങ്ങളെ നേരി ടേണ്ടിവന്നു. ഇതിനെത്തുടർന്ന്‌ ഇദ്ദേഹം പ്രധാനമന്ത്രിപദത്തിൽ നിന്നു നീക്കംചെയ്യപ്പെട്ടു. 1867 ന. 6-ന്‌ ഒഡോനൽ അന്തരിച്ചു.
