This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഓംസ്‌ക്‌
സര്‍വ്വവിജ്ഞാനകോശം സംരംഭത്തില്‍ നിന്ന്
ഓംസ്‌ക്‌
Omsk
റഷ്യയിലെ പശ്ചിമസൈബീരിയയിലുള്ള ഒരു നഗരം. ജനസംഖ്യ 11,54,000. വിസ്‌തീർണം: 573 സ്‌ക്വയർ കി. മീ. ജനസംഖ്യാടിസ്ഥാനത്തിൽ റഷ്യയിലെ രണ്ടാമത്തെയും വിസ്‌തീർണം അടിസ്ഥാനമാക്കി ഏഴാമത്തെയും നഗരമാണ്‌. സൈബീരിയന്‍ കൊസാക്ക്‌ ഹോസ്റ്റിന്റെ ഭരണകേന്ദ്രവുമാണ്‌ ഓംസ്‌ക്‌. 550 വ. 73038' കി. ഓംസ്‌ക്‌ ഒബ്‌ളാസ്റ്റിന്റെ തലസ്ഥാനമായ ഈ നഗരം ഇർത്തിഷ്‌, ഓം എന്നീ നദികളുടെ സംഗമസ്ഥാനത്താണ്‌ സ്ഥിതിചെയ്യുന്നത്‌. ഓബ്‌ നദീതടത്തിലെ പ്രമുഖ വിപണനകേന്ദ്രമായ ഓംസ്‌ക്‌ ട്രാന്‍സ്‌ സൈബീരിയന്‍ റെയിൽപ്പാതയിലെ ഒരു പ്രധാന കവലയാണ്‌; ഇവിടെവച്ച്‌ ഈ റെയിൽപ്പാത രണ്ടായിപ്പിരിഞ്ഞ്‌ യൂറാള്‍ മേഖലയിലെ വിവിധകേന്ദ്രങ്ങളിലേക്കു നീളുന്നു. ഓംസ്‌കിന്റെ പശ്ചിമപ്രദേശം സ്റ്റെപ്പ്‌ മാതൃകാ കാലാവസ്ഥയിലുള്ള കാർഷികമേഖലയാണ്‌; ഗവ്യപദാർഥങ്ങള്‍, ധാന്യങ്ങള്‍, ചണം, സൂര്യകാന്തി എണ്ണ എന്നിവ ഈ പ്രദേശത്ത്‌ വന്‍തോതിൽ ഉത്‌പാദിപ്പിക്കപ്പെടുന്നു. വടക്കുള്ള സൂചികാഗ്ര വനങ്ങളിൽ നിന്നുള്ള തടിയിനങ്ങളും തെക്കുനിന്ന്‌ എത്തിച്ചേരുന്ന ഗവ്യോത്‌പന്നങ്ങള്‍, തുകൽ തുടങ്ങിയവയും ജലയാനങ്ങളിൽ നിന്നു തീവണ്ടികളിലേക്ക്‌ കൈമാറ്റം ചെയ്യപ്പെടുന്നത്‌ ഓംസ്‌കിൽ വച്ചാണ്‌. അസംസ്‌കൃത പദാർഥങ്ങളുടെ വിപണനകേന്ദ്രമായ ഓംസ്‌ക്‌ വ്യവസായരംഗത്തും വളർച്ച പ്രാപിച്ചിട്ടുണ്ട്‌. കാർഷികയന്ത്രങ്ങള്‍, റെയിൽ ഗതാഗതവുമായി ബന്ധപ്പെട്ട യന്ത്രങ്ങളും ഇതരസാധനങ്ങളും തുകൽ വസ്‌തുക്കള്‍ തുടങ്ങിയവ വന്‍തോതിൽ നിർമിക്കപ്പെട്ടുവരുന്നു. ധാന്യസംസ്‌കരണവും കാനിങ്ങും അഭിവൃദ്ധിപ്പെട്ടിട്ടുണ്ട്‌. സാർചക്രവർത്തിമാർ 1716-ൽ നിർമിച്ച കോട്ടയാണ്‌ ഓംസ്‌കിലെ നഗരാധിവാസത്തിനു തുടക്കം കുറിച്ചത്‌. രണ്ടാംലോകയുദ്ധകാലത്ത്‌ യുദ്ധോപകരണങ്ങളുടെ നിർമാണം ഈ നഗരത്തിൽ കേന്ദ്രീകരിക്കപ്പെട്ടു. എങ്കിലും സോവിയറ്റ്‌ യൂണിയന്റെ തകർച്ചയെത്തുടർന്ന്‌ തൊഴിലില്ലായ്‌മ രൂക്ഷമായി. 1950-കളിൽ സൈബീരിയയിൽ എണ്ണക്കിണറുകളും വാതകശേഖരങ്ങളും കണ്ടുപിടിക്കപ്പെട്ടതോടെ ഓംസ്‌ക്‌ നഗരം കൂടുതൽ അഭിവൃദ്ധിപ്രാപിച്ചു.
സോവിയറ്റ്‌ യൂണിയന്റെ തകർച്ചയോടെ സ്റ്റേറ്റിന്റെ മേൽനോട്ടത്തിലായിരുന്ന കമ്പനികള്‍ സ്വകാര്യവത്‌കരിക്കപ്പെട്ടു. 2005-ൽ കസാക്കിസ്ഥാന്‍ റിപ്പബ്ലിക്കിന്റെ കണ്‍സുലേറ്റ്‌ ജനറൽ ഓഫീസ്‌ ഇവിടെ സ്ഥാപിതമായി. പ്രാദേശികതലസ്ഥാനവും പ്രമുഖവിദ്യാഭ്യാസകേന്ദ്രവുമായ ഓംസ്‌കിൽ നിരവധി വിദ്യാഭ്യാസകേന്ദ്രങ്ങളും തിയെറ്ററുകളും കാഴ്‌ചബംഗ്ലാവുകളും സ്ഥിതിചെയ്യുന്നു. പുഷ്‌കിന്‍ സ്റ്റേറ്റ്‌ ലൈബ്രറി, മയക്കോവ്‌സ്‌കി എന്റർടെയ്‌ന്‍മെന്റ്‌ കോംപ്ലക്‌സ്‌ ഓംസ്‌ക്‌ ഡ്രാമാ തിയെറ്റർ, ഓംസ്‌ക്‌ ഡോർമിഷന്‍ കത്തീഡ്രൽ, മിഖേൽ വ്രൂബൽ മ്യൂസിയം ഒഫ്‌ ഫൈന്‍ ആർട്‌സ്‌, ഓംസ്‌ക്‌ കേഡറ്റ്‌ മിലിട്ടറി സ്‌കൂള്‍ എന്നിവ ഇവയിൽ പ്രാധാന്യമർഹിക്കുന്നു. ഓംസ്‌കിലെ ഫുട്‌ബാള്‍, ഹോക്കി ടീമുകള്‍ ദേശീയതലത്തിൽ പ്രതിനിധീകരിക്കപ്പെടുന്നുണ്ട്‌.
