This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കാട്ടുമണ്ഡലി
സര്‍വ്വവിജ്ഞാനകോശം സംരംഭത്തില്‍ നിന്ന്
കാട്ടുമണ്ഡലി
alabar rock pit viper
ഏഴുജാതി മണ്ഡലിപ്പാമ്പുകളിൽ ഒരിനം. ശാ. നാ. ട്രമെറസൂറസ്‌ മലബാറികസ്‌ (Trimere Surus Malabaricus). മലമ്പ്രദേശങ്ങളിൽ മാത്രമേ ഇതിനെ കണ്ടുവരുന്നുള്ളൂ. കൂടുതൽ സമയവും മരങ്ങളിൽ കഴിയുന്ന സ്വഭാവമുള്ളതിനാൽ ഇതിന്‌ "മരമണ്ഡലി' എന്നും പേരുണ്ട്‌.
തെക്കേ മലബാർ, ആനമല, പഴയ തിരുവിതാകൂർ പ്രദേശങ്ങള്‍ എന്നിവിടങ്ങളിൽ 700 മീ. മുതൽ 2,500 മീ. വരെ ഉയരത്തിലുള്ള കാട്ടുപ്രദേശങ്ങളിൽ കാട്ടുമണ്ഡലിയെ കാണാന്‍ കഴിയുന്നു. മഹാബലേശ്വരം, ഗോവ, വടക്കന്‍ കർണാടകം, കുടക്‌, നീലഗിരി, ഷവറോയ്‌ കുന്നുകള്‍, പഴനി തുടങ്ങിയ തെക്കു പടിഞ്ഞാറേ ഇന്ത്യയിലെ കുന്നുകളും ഇതിന്റെ വാസസ്ഥാനങ്ങളാണ്‌. 700 മീ.-ൽ കുറവ്‌ ഉയരമുള്ള പ്രദേശങ്ങളിൽ ഇതിനെ കാണാറില്ല.
നിറം, അടയാളം എന്നിവ മാത്രംകൊണ്ട്‌ ഇതിനെ തിരിച്ചറിയാം. പച്ചയിൽ തവിട്ടുഛായ കലർന്നതാണ്‌ ശരീരത്തിന്റെ നിറം. മുതുകിൽ, തല മുതൽ വാൽവരെ, തവിട്ടുനിറത്തിലോ കുറേക്കൂടി ഇരുണ്ട നിറത്തോടുകൂടിയതോ ആയ കുറേ പുള്ളികള്‍, ഒന്നോടൊന്നു തൊട്ടോ തൊടാതെയോ കാണപ്പെടുന്നു. വശങ്ങളിലായി മഞ്ഞപ്പുള്ളികളുടെ ഒരു വരിയും ഉണ്ടായിരിക്കും. വാൽ കറുപ്പോ മഞ്ഞയോ ആണ്‌; അടിഭാഗം മഞ്ഞയോ ഇളം പച്ചയോ ആകാറുണ്ട്‌. ഋതുഭേദത്തിനനുസൃതമായി കാട്ടുമണ്ഡലിയുടെ നിറത്തിലും വ്യത്യാസം ദൃശ്യമാകുന്നു. ഏതുകാലത്തും ഇതിന്റെ നിറം പരിസരങ്ങളോടു നന്നായി ഇണങ്ങിച്ചേരുന്നതാണ്‌. പുറത്തെ ശല്‌ക്കങ്ങളെക്കാള്‍ തലയിലേതു കുറച്ചു വലുതായിരിക്കും.
ഏതാണ്ട്‌ ഒരു മീറ്ററാണ്‌ ഇതിന്റെ സാധാരണ നീളം; സാമാന്യം വണ്ണവുമുണ്ടായിരിക്കും. വാലിന്റെ നീളം ശരീരത്തിന്റെ നീളത്തിന്റെ ആറിലൊന്നുവരും. വാലിനു ചുറ്റിപ്പിടിക്കാനുള്ള കഴിവുണ്ട്‌. രണ്ടു വയസ്സാകുന്നതോടെ പെണ്‍പാമ്പ്‌ ലൈംഗിക വളർച്ച നേടിക്കഴിയും. ഒരു മീറ്ററിൽ താഴെ നീളമാണ്‌ ഈ പ്രായത്തിൽ അതിനുണ്ടായിരിക്കുക. ഗർഭകാലം ഏകദേശം ആറു മാസമാണ്‌. ആദ്യ പ്രസവത്തിൽ ആറോ ഏഴോ കുട്ടികളേ ഉണ്ടാകാറുള്ളൂ. തുടർന്നുള്ള പ്രസവങ്ങളിൽ കുട്ടികളുടെ എണ്ണം വർധിക്കുന്നു. ജനനസമയത്തു കുട്ടിയുടെ നീളം 19-22 സെ.മീ. ആയിരിക്കും.
മേലണയിൽ ഓരോ ഭാഗത്തും ഈരണ്ടു വിഷപ്പല്ലുകളുണ്ട്‌. വിഷം രക്തത്തെ ബാധിക്കുമെങ്കിലും രക്തസ്രാവം പൊതുവേ കുറവായിരിക്കും. കടിച്ചയുടന്‍ വേദന അനുഭവപ്പെടില്ലെങ്കിലും, വളരെ കുറച്ചു സമയത്തിനുള്ളിൽ കടിയേറ്റ അവയവം നീരുവന്നു വീർക്കുകയും, അസഹ്യമായ വേദനയും പനിയും അനുഭവപ്പെടുകയും ചെയ്യും. ഒരു ദിവസം കഴിയുന്നതോടെ മുറിവിൽനിന്നു ചോരയും പഴുപ്പും ധാരാളമായി വന്നുതുടങ്ങും. രണ്ടുദിവസം കഴിഞ്ഞാൽ വേദന കുറയാനാരംഭിക്കുന്നു. പ്രത്യേക ചികിത്സകളൊന്നും കൂടാതെതന്നെ ഈ അസ്വസ്ഥതകള്‍ ശമിക്കുകയാണ്‌ പതിവ്‌. എന്നാൽ കടികൊണ്ടയിടത്തുനിന്ന്‌ ഇടയ്‌ക്കിടെ ചോരയും പഴുപ്പും വരിക അപൂർവമല്ല. തവള, ഓന്ത്‌, ചുണ്ടെലി, എലി തുടങ്ങിയ ഇരകളെ നിശ്ചലമാക്കുന്നതിന്‌ ഈ വിഷം പര്യാപ്‌തമാണ്‌. എലികളെ തിന്നൊടുക്കുന്നതിനാൽ കാട്ടുമണ്ഡലിയെ മലയോര കർഷകന്റെ ഉത്തമബന്ധുവായി കണക്കാക്കുന്നു.
