This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുടകപ്പാല
സര്‍വ്വവിജ്ഞാനകോശം സംരംഭത്തില്‍ നിന്ന്
കുടകപ്പാല
Bitter Oleander
അപ്പോസൈനേസീ കുടുംബത്തിൽപ്പെട്ട ഒരു ഔഷധസസ്യം. ശാ.നാ. ഹോളറീന ആന്റിഡിസന്ററിക്ക (Holarrhena antidysente-rica). ആന്റിഡിസന്ററിക്ക എന്ന പദം അതിസാരത്തിന്‌ ഫലപ്രദമായ ഔഷധം എന്ന നിലയിലുള്ള ഇതിന്റെ പ്രാധാന്യത്തെ സൂചിപ്പിക്കുന്നു. കുർചി എന്ന വ്യാപാരസംജ്ഞയിലറിയപ്പെടുന്ന ഈ സസ്യം സാധാരണയായി പർവതപ്രദേശങ്ങളിൽ വളരുന്നുവെന്നാണ്‌ "കുടജം' എന്ന സംസ്‌കൃത നാമത്തിൽനിന്നു വ്യക്തമാകുന്നുത്‌. റൈറ്റിയ ടിങ്‌ടോറിയ (Wrightia tinctoria)എന്ന ചെടിയും കുടകപ്പാല എന്ന പേരിലാണ്‌ അറിയപ്പെടുന്നത്‌. രണ്ടിനം കുടകപ്പാലയുള്ളതായി ചരകന്‍ രേഖപ്പെടുത്തിയിട്ടുണ്ട്‌. ഗിരിമല്ലിക, മല്ലികാപുഷ്‌പം എന്നീ ഇതരനാമങ്ങള്‍ ഇതിന്റെ പുഷ്‌പങ്ങള്‍ക്ക്‌ മുല്ലപ്പൂവിനോടുള്ള സാദൃശ്യത്തെ കാണിക്കുന്നു. ഇന്ത്യയിൽ വരണ്ട ഇലപൊഴിയും കാടുകളിൽ ഏതാണ്ട്‌ 1,200 മീ. വരെ ഉയരമുള്ള പ്രദേശങ്ങളിൽ കുടകപ്പാല വളരുന്നു. മധ്യപ്രദേശ്‌, മഹാരാഷ്‌ട്ര എന്നിവിടങ്ങളിലെ വനപ്രദേശങ്ങളിലും ബിഹാർ, കേരളം എന്നീ സംസ്ഥാനങ്ങളിലും ഇത്‌ സാധാരണമാണ്‌. സാൽവനങ്ങളിലും ആരവല്ലി പർവതനിരകളിലും ധാരാളമായി കണ്ടുവരുന്നു. വളക്കൂറില്ലാത്ത മണ്ണിലും ഈ സസ്യം സമൃദ്ധമായി വളരുന്നു. പുതുതായി വെട്ടിത്തെളിച്ച പ്രദേശങ്ങളിലും ഇത്‌ തഴച്ചു വളരാറുണ്ട്‌.
ഏകദേശം 10 മീ. ഉയരത്തിൽ വളരുന്ന ഒരു ചെറുവൃക്ഷമാണിത്‌. ചെടിയുടെ എല്ലാ ഭാഗത്തും പാലുപോലുള്ള വെളുത്ത കറയുണ്ട്‌. 10-30 സെ.മീ. നീളമുള്ള ലഘുപത്രങ്ങള്‍ വിപരീതദിശയിൽ ക്രമീകരിച്ചിരിക്കുന്നു. ലോലമായ ഇലയിൽ സിരകള്‍ വ്യക്തമായി കാണാം. പർണവൃന്തം വളരെച്ചെറുതാണ്‌. വെളുത്ത മൃദുവായ തടിയിൽ വാർഷികവലയങ്ങള്‍ കാണാം. ഫെബ്രുവരി-മേയ്‌ മാസങ്ങളാണ്‌ പൂക്കാലമെങ്കിലും ജൂണ്‍, ജൂലായ്‌ മാസങ്ങളിലും ചിലപ്പോള്‍ പൂവണിയാറുണ്ട്‌. ശാഖാഗ്രങ്ങളിലുള്ള വലിയ കുലകളിൽ (റെസീം) നേരിയ ഗന്ധമുള്ള വെളുത്ത പൂക്കള്‍ കാണുന്നു. അഞ്ച്‌ വിദളങ്ങള്‍ ചേർന്ന വിദളപുടവും അഞ്ച്‌ ദളങ്ങള്‍ ചേർന്ന സംയുക്തദളപുടവും കാണാം. വിദളങ്ങള്‍ക്കു ചുവട്ടിൽ ഉള്‍ഭാഗത്തായി ചെറുഗ്രന്ഥികള്‍ ഉണ്ട്‌. ബാണാകാരവും (Sagilate)അന്തർമുഖസ്‌ഫുടന (introrse dehiscence) സ്വഭാവമുള്ള പരാഗികളോടുകൂടിയ അഞ്ചു ദളലഗ്ന (epi-petalous) കേസരങ്ങളുണ്ട്‌. അണ്ഡാശയം ഊർധ്വമാണ്‌. വിയുക്താണ്ഡപാണ്ഡാശയത്തിൽ (apocarpous ovary) നിരവധി അണ്ഡങ്ങള്‍ കാണാം. 20-45 സെ.മീ. നീളവും 6-8 മി.മീ. കനവുമുള്ള നീണ്ടുരുണ്ട കായ്‌കള്‍ക്ക്‌ പുറമേ കറുപ്പുനിറമാണ്‌. വിത്തുകള്‍ ഏകദേശം ഒരു സെ.മീ. നീളമുള്ളതും അഗ്രഭാഗത്ത്‌ തവിട്ടുനിറത്തിൽ കുടുമപോലെ രോമങ്ങളോടുകൂടിയതുമാണ്‌. പട്ട, വേര്‌, വിത്ത്‌ എന്നിവയ്‌ക്ക്‌ ഔഷധഗുണമുണ്ട്‌. തൊലിയിലും വിത്തിലും "കോണിസൈന്‍' (conessine) എന്ന പദാർഥം അടങ്ങിയിരിക്കുന്നു. ജലം, ആൽക്കഹോള്‍, നേർത്ത അമ്ലങ്ങള്‍ എന്നിവയിൽ ലയിക്കുന്ന ഈ പാദാർഥം ഹെയിന്‍സ്‌ (1858) ആണ്‌ ആദ്യമായി പട്ടയിൽനിന്ന്‌ വേർതിരിച്ചെടുത്തത്‌. വോർണിക്‌, കാന്‍ഗ (1886), അയ്യർ-സൈമണ്‍സണ്‍ (1925) എന്നിവർ വിത്തിൽനിന്ന്‌ ശുദ്ധമായ കോണിസൈന്‍ വേർതിരിച്ചെടുക്കുകയുണ്ടായി. കയ്‌പുള്ളതും വെള്ളപ്പരൽ രൂപമുള്ളതുമായ "കുർച്ചിസി'നും "കുർച്ചിന്‍' എന്ന മറ്റൊരു ആൽക്കലോയ്‌ഡും കൽക്കത്താ സ്‌കൂള്‍ ഒഫ്‌ മെഡിസിനിലെ ഘോഷ്‌, ബോസ്‌ എന്നീ ശാസ്‌ത്രജ്ഞന്മാർ (1932) ശുദ്ധരൂപത്തിൽ വേർതിരിച്ചെടുക്കുകയുണ്ടായി.
തലശ്ശേരിപ്പട്ട എന്നറിയപ്പെടുന്ന കയ്‌പുള്ളതും ദീപനകരവും പുഷ്‌ടികരവും ജ്വരഹാരിയും കൃമിഘ്‌നവുമായ ഇതിന്റെ പട്ട അതിസാരത്തിനുള്ള ഫലപ്രദമായ മരുന്ന്‌ എന്ന നിലയിൽ പ്രസിദ്ധമാണ്‌. ഹിന്ദു മെറ്റീരിയാ മെഡിക്കായിലെ ഏറ്റവും പ്രധാനപ്പെട്ട ഔഷധങ്ങളിലൊന്നാണിതെന്ന്‌ ഡൈമോക്ക്‌ അഭിപ്രായപ്പെടുന്നു. കാലപ്പഴക്കം ചെന്ന കഠിനമായ അതിസാരത്തിനും രക്താതിസാരത്തിനും ഇളയ ചെടിയുടെ തൊലിയും വേരും വിത്തും വളരെ വിശേഷപ്പെട്ട ഔഷധമാകുന്നു. ഭാവപ്രകാശം, ധന്വന്തരിനിഘണ്ടു എന്നീ ആയുർവേദ നിഘണ്ടുക്കളിൽ അർശസ്സ്‌, രക്തപിത്തം, കുഷ്‌ഠം, ഛർദി, വയറുവേദന എന്നിവയ്‌ക്കുള്ള ഫലപ്രദമായ ഔഷധമായി ഇതിനെ പരാമർശിച്ചിട്ടുണ്ട്‌. വേരും പട്ടയും ത്രിദോഷ (വാതം, പിത്തം, കഫം) ഹരങ്ങളാണ്‌. ഇന്ദ്രയവം, കലിംഗം, ഭദ്രയവം എന്നീ പേരുകളിലറിയപ്പെടുന്ന വിത്തുകള്‍ വാജീകരണൗഷധമായും ടോണിക്കായും ഉപയോഗിക്കുന്നു. കന്നുകാലി ചികിത്സയിലും ഇത്‌ പ്രധാനപ്പെട്ട ഒരു മരുന്നാണ്‌.
