This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കൂനന്‍ കുരിശുസത്യം
സര്‍വ്വവിജ്ഞാനകോശം സംരംഭത്തില്‍ നിന്ന്
കൂനന്‍ കുരിശുസത്യം
ഈശോസഭാവൈദികരെയും, അവരുടെ സന്ന്യാസ സഭയിലെ ഗാർസ്യാ മെത്രാപ്പോലീത്തയെയും അനുസരിക്കുകയില്ലെന്ന്‌ കൊച്ചിക്കടുത്തുള്ള മട്ടാഞ്ചേരിയിലെ ഒരു കുരിശിൽ തൊട്ടുകൊണ്ട്‌ കേരളത്തിലെ മാർത്തോമാ ക്രിസ്‌ത്യാനികള്‍ 1653 ജനു. 3-ന്‌ വെള്ളിയാഴ്‌ച പരസ്യമായി നടത്തിയ സത്യപ്രതിജ്ഞ. മാർത്തോമാശ്ലീഹയിൽ നിന്ന് ക്രിസ്‌തുവിന്റെ സുവിശേഷം സ്വീകരിച്ച്‌ ഇന്ത്യയുടെ സംസ്‌കാരം സ്വാംശീകരിച്ച്‌ തനതായൊരു സഭാജീവിതശൈലി വളർത്തിയെടുത്തവരായിരുന്നു മാർത്തോമാ ക്രിസ്‌ത്യാനികള്‍. എന്നാൽ 16-ാം ശതകത്തിൽ പോർച്ചുഗീസുകാരും അവരോടൊപ്പം പോർച്ചുഗീസ്‌ മിഷണറിമാരും ഇന്ത്യയിലെത്തിയതോടെ ഇവിടെ നിലനിന്നിരുന്ന പുരാതന സഭയുടെമേൽ അവർ ആധിപത്യം അവകാശപ്പെട്ടു. 1599-ൽ നടന്ന ഉദയംപേരൂർ സുനഹദോസ്‌ മുതൽ പോർച്ചുഗീസുകാരായിരുന്നു ഇവിടത്തെ മാർത്തോമാ ക്രിസ്‌ത്യാനികളെ ഭരിച്ചുകൊണ്ടിരുന്ന മെത്രാന്മാർ. നിലവിലിരുന്ന സഭാപാരമ്പര്യങ്ങളിൽ അജ്ഞരായിരുന്ന പോർച്ചുഗീസ്‌ മെത്രാന്മാർ ഇവിടത്തെ ആചാരങ്ങളും ഭരണക്രമങ്ങളും മാറ്റി പകരം പോർച്ചുഗീസുരീതിയിലുള്ള ആചാരങ്ങളും നിയമങ്ങളും ആരാധനനാക്രമങ്ങളും പ്രചരിപ്പിക്കുവാന്‍ പരിശ്രമിച്ചു. ഇവിടത്തെ പാരമ്പര്യത്തോടു കാട്ടിയ വ്യക്തമായ അവഗണനയിൽ അമർഷം പൂണ്ട മാർത്തോമാ ക്രിസ്‌ത്യാനികളാണ്‌ ഈ "സാമ്പാളൂർ പാതിരിമാരെ' ഇനിമേൽ അനുസരിക്കുകയില്ലെന്ന്‌ പരസ്യമായി പ്രതിജ്ഞ ചെയ്‌തത്‌. "സാവൊപൗളോ'(Saopaolo)എന്ന പേരിലാണ്‌ ഈശോസഭക്കാരുടെ ആശ്രമമറിയപ്പെട്ടിരുന്നത്‌. അവിടെ താമസിക്കുന്ന വൈദികരും, അതേ സന്ന്യാസസഭയിൽപ്പെട്ട മെത്രാനും "സാമ്പാളൂർ പാതിരിമാർ' എന്ന പേരിൽ അറിയപ്പെട്ടിരുന്നു.
കൂനന്‍ കുരിശിന്‌ ഒരു ചരിത്രപശ്ചാത്തലമുണ്ട്‌. ഉദയംപേരൂർ സുനഹദോസ്‌ ഇതിലെ ഒരു പ്രധാനഘടകമാണ്‌. ഗോവാ മെത്രാപ്പോലീത്തയുടെ നേതൃത്വത്തിൽ ഉദയംപേരൂർ വച്ചു നടന്ന ഒരു സഭാസമ്മേളനമാണ്‌ "ഉദയംപേരൂർ സുനഹദോസ്‌' എന്ന പേരിലറിയപ്പെടുന്നത്‌ (നോ. ഉദയംപേരൂർ സുനഹദോസ്‌). ഈ കൗണ്‍സിൽ ഇവിടത്തെ പുരാതനസഭയുടെ ആചാരമര്യാദകളും ആരാധനാക്രമങ്ങളും അടിമുടി മാറ്റുന്ന ഒന്നായിരുന്നു. ആധുനിക ഗവേഷണങ്ങളുടെ വെളിച്ചത്തിൽ ഈ സുനഹദോസ്‌ അസാധുവാണെന്ന്‌ വ്യക്തമായിട്ടുണ്ട്‌. അതിനാൽ ഇതിന്‌ നിയമപ്രാബല്യമൊന്നുമില്ല.
കൊളോണിയലിസത്തിന്റെ കാലമായിരുന്നതിനാലും നാട്ടുരാജാക്കന്മാർ പരസ്‌പരം കലഹിച്ചു കഴിഞ്ഞിരുന്നതിനാലും വിദേശശക്തികളുടെ സഹായം സ്വന്തം ശത്രുക്കള്‍ക്കെതിരായി സ്വീകരിച്ചിരുന്നതിനാലും വിദേശികള്‍ക്ക്‌ ഇവിടത്തെ ആഭ്യന്തരകാര്യങ്ങളിൽ ഇടപെടുന്നതിന്‌ വലിയ ബുദ്ധിമുട്ടൊന്നും അനുഭവപ്പെട്ടിരുന്നില്ല. ഇപ്രകാരമാണ്‌ പോർച്ചുഗീസുകാർക്കും ഇവിടത്തെ സഭയുടെ ആഭ്യന്തരകാര്യങ്ങളിൽ ഇടപെടുവാന്‍ സാധിച്ചത്‌.
മട്ടാഞ്ചേരിയിൽ വച്ചു കൂനന്‍ കുരിശുസത്യം നടക്കുന്നതിന്‌ ഒരു പ്രത്യേക കാരണമുണ്ട്‌. പറങ്കിമെത്രാന്മാരിൽ നിന്ന് വിമോചനം നേടുവാന്‍ ആഗ്രഹിച്ചിരുന്ന മാർത്തോമാക്രിസ്‌ത്യാനികള്‍ തങ്ങളുടെ പാരമ്പര്യങ്ങളെ മാനിക്കുന്ന മെത്രാന്മാരെ കിട്ടുവാന്‍ പരിശ്രമിച്ചിരുന്നു. ഇവരുടെ അഭ്യർഥനയനുസരിച്ച്‌ അഹത്തള്ള (നോ. അഹത്തള്ള) എന്ന പേരിൽ ഒരു സുറിയാനി മെത്രാന്‍ ഇന്ത്യയിലെത്തി (1653). ഈ വാർത്തയറിഞ്ഞ പോർച്ചുഗീസുകാർ ഇദ്ദേഹത്തെ അധികാരത്തിലെടുക്കുകയും, മദ്രാസിൽനിന്ന്‌ കപ്പൽമാർഗം കൊച്ചിവഴി ഗോവയ്‌ക്കു കൊണ്ടുപോവുകയും ചെയ്‌തു. ഈ വിവരം അഹത്തള്ള രഹസ്യമായി മൈലാപ്പൂരിൽ തീർഥാടനത്തിനായെത്തിയ മൂന്നുപേർവഴി ഇവിടെ അറിയിച്ചിരുന്നു. സമുദായത്തിന്റെ നേതാവായിരുന്ന ആർച്ചുഡീക്കന്‍ ഈ വിവരം അറിഞ്ഞയുടനെ ജനങ്ങളെ വിവരമറിയിക്കുകയും അവർ അഹത്തള്ളയെ സ്വീകരിക്കുവാന്‍ ഒരുങ്ങി കൊച്ചിയിലെത്തുകയും ചെയ്‌തു. അഹത്തള്ളയെ കയറ്റിയിരുന്ന കപ്പൽ കൊച്ചി തുറമുഖത്തു വന്നെത്തിയ വിവരമറിഞ്ഞ്‌ അവർ അദ്ദേഹത്തെ നേരിട്ടുകാണുന്നതിന്‌ അധികാരികളെ സമീപിച്ചു. എന്നാൽ ആർച്ചുബിഷപ്പ്‌ ഗാർസ്യാ അഹത്തള്ളയെ മാർത്തോമാ ക്രിസ്‌ത്യാനികള്‍ കാണുവാന്‍ പാടില്ലെന്ന്‌ ശഠിച്ചു. പ്രതിനിധികള്‍ക്കെങ്കിലും സന്ദർശിക്കുവാനുള്ള അനുമതി നല്‌കണമെന്ന അഭ്യർഥനയും ആർച്ച്‌ ബിഷപ്പ്‌ അവഗണനയോടെ നിരസിച്ചു. ഔദ്യോഗിക രേഖകള്‍ പരിശോധിക്കുന്നതിനെങ്കിലും അനുവദിക്കണമെന്ന അഭ്യർഥനയും വനരോദനമാവുകയാണ്‌ ഉണ്ടായത്‌. മാർപ്പാപ്പാ അയച്ചതാണെങ്കിൽപ്പോലും പോർച്ചുഗീസ്‌ രാജാവിന്റെ അനുവാദം കൂടാതെ ഇവിടെ പ്രവേശിക്കുവാന്‍ അനുവദിക്കുകയില്ലെന്നായിരുന്നു ഗാർസ്യായുടെ കർക്കശമായ നിലപാട്‌. അഹത്തള്ള മെത്രാനെ പറങ്കികള്‍ കടലിൽ മുക്കിക്കൊന്നെന്ന്‌ ഒരു കിംവദന്തിയും പ്രചരിച്ചിരുന്നു. മാർത്തോമാ ക്രിസ്‌ത്യാനികളുടെ ധർമരോഷം ആളിക്കത്തി. കടുത്ത അവഗണനയെ തന്റേടത്തോടെ നേരിടുവാന്‍തന്നെ അവർ തീരുമാനിച്ചു. ഇപ്രകാരമൊരു മെത്രാനെയോ, അദ്ദേഹത്തിന്റെ സഹപ്രവർത്തകരായ ഈശോസഭാ വൈദികരെയോ ഇനി മേലിൽ അനുസരിക്കുകയില്ലെന്ന്‌ കുരിശു സാക്ഷിയാക്കി വികാരതീവ്രതയോടെ അവർ സത്യം ചെയ്‌തു. ഇതാണ്‌ ചരിത്രപ്രസിദ്ധമായ കൂനന്‍ കുരിശുസത്യം. ഈ സംഭവം മാർത്തോമാ ക്രിസ്‌ത്യാനികളുടെ സഭയെ സാരമായി ബാധിച്ചു. 16 നൂറ്റാണ്ടുകാലം ഒന്നായി കഴിഞ്ഞിരുന്ന ഒരു സമുദായത്തിൽ ഭിന്നതയുടെ ചരിത്രമാരംഭിക്കുന്നത്‌ കൂനന്‍ കുരിശു സത്യത്തോടെയാണ്‌.
(റവ. ഡോ. സേവ്യർ കൂടപ്പുഴ)
