This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കൃത്തിവാസന്‍; കൃത്തിവാസരാമായണം
സര്‍വ്വവിജ്ഞാനകോശം സംരംഭത്തില്‍ നിന്ന്
കൃത്തിവാസന്‍; കൃത്തിവാസരാമായണം
ബംഗാളിസാഹിത്യത്തിലെ അതിപ്രാചീനമായ രാമായണത്തിന്റെ രചയിതാവായ കവി. കൃത്തിവാസ ഓഝ, കൃത്തിവാസ പണ്ഡിതന്‍ എന്നീ പേരുകളിലും അറിയപ്പെടുന്നു. ഹൂഗ്ലീതീരത്തിലെ പുലിയാഗ്രാമത്തിലാണ്‌ ജനനം. പിതാവ്‌ വനമാലി പണ്ഡിതനും മാതാവ്‌ മാലിനിയുമാണ്‌. വനമാലി തന്റെ ദക്ഷിണദേശത്തേക്കുള്ള യാത്രയുടെ ആരംഭത്തിൽ ജനിച്ച മകനാകയാൽ ശിവസ്‌മൃതിയുളവാക്കുന്ന "കൃത്തിവാസന്‍' എന്ന പേർ മകനിട്ടതാണത്ര. ഇദ്ദേഹം പതിനഞ്ചാം വയസ്സിൽ ഉത്തരബംഗാളിൽ ചെന്ന്‌ വിദ്യാഭ്യാസം പൂർത്തിയാക്കി ഗൗഡദേശാധിപതിയുടെ ആസ്ഥാനത്തിൽ പോയി തന്റെ ആശുകവിത്വശക്തികൊണ്ടു രാജാവിനെ സന്തോഷിപ്പിച്ച്‌ സമ്മാനം നേടിയതായും രാജാവിന്റെ അഭ്യർഥനയനുസരിച്ചു രാമായണരചനാസങ്കല്‌പം ചെയ്‌തതായും പറയപ്പെടുന്നു. 14-ാം ശതകമോ 15-ാം ശതകമോ ആയിരിക്കാം ഇദ്ദേഹത്തിന്റെ ജീവിതകാലം.
കൃത്തിവാസരാമായണം എന്ന പ്രസിദ്ധ കൃതി കൃത്തിവാസന്റേതാണ്‌. രാമപാഞ്ചാലി എന്നാണ്‌ ആ കൃതിയുടെ ശരിയായ പേര്‌. പാഞ്ചാലി എന്നാൽ ആഖ്യാനകാവ്യമെന്നർഥം. "പയാർ' എന്ന മാത്രാവൃത്തവും സാമാന്യജനതയുടെ ഭാഷയുമാണ്‌ ഇതിൽ ഉപയോഗിച്ചിട്ടുള്ളത്‌. ഈ കാവ്യം ലിപിബദ്ധമായത്‌ കവിയുടെ കാലത്തിനുശേഷം ഏകദേശം രണ്ടു ശതാബ്‌ദം കഴിഞ്ഞാണെന്ന്‌ ഊഹിക്കപ്പെടുന്നു. ഇന്നു ലഭിച്ചിട്ടുള്ള അതിപ്രാചീനമായ കൈയെഴുത്തു പ്രതിക്ക്‌ ഇരുന്നൂറു വർഷത്തോളമേ പഴക്കമുള്ളൂ. അതുകൊണ്ട്‌ ഗ്രന്ഥത്തിന്റെ മൂലഭാഷയും കഥയും എത്രത്തോളം കവിരചിതമാണ്‌, എത്രത്തോളം കാലക്രമേണ പരിവർത്തിതമാണ്‌ എന്നു നിശ്ചയിക്കുവാന്‍ പ്രയാസമാണ്‌. അദ്‌ഭുതാചാര്യനും കവിചന്ദ്രനും എഴുതിയ രാമായണത്തിന്റെ അംശങ്ങളും ഇന്നത്തെ കൃത്തിവാസരാമായണത്തിൽ കലർന്നിട്ടുള്ളതായി കരുതപ്പെടുന്നു. ഈ കൃതി ആദ്യമായി 1803-ൽ ശ്രീരാമപുര മിഷന്‍ പ്രസ്സിൽ അച്ചടിച്ചു പ്രസിദ്ധപ്പെടുത്തി. കേരളത്തിൽ എഴുത്തച്ഛന്റെ അധ്യാത്മരാമായണത്തിനും ഉത്തരഭാരതത്തിൽ തുളസീദാസന്റെ രാമചരിതമാസത്തിനുമുള്ള പ്രചാരമാണ്‌ ബംഗാളിൽ രാമപാഞ്ചാലിക്കു ലഭിച്ചിട്ടുള്ളത്‌. അവിടെ ഓരോ ഗൃഹത്തിലും ഈ കൃതി നിത്യപാരായണത്തിന്‌ ഉപയോഗിക്കുന്നു. ബംഗാളിലെ പില്‌ക്കാലത്തെ സാഹിത്യകൃതികളെ ഇത്‌ വളരെ സ്വാധീനിച്ചിട്ടുണ്ട്‌. കൃത്തിവാസരാമായണത്തിന്റെ ആധാരം വാല്‌മീകിരാമായണത്തിന്റെ ഗൗഡീയ പാഠമാണ്‌. എന്നാൽ ഇത്‌ ഒരനുവാദമല്ല. ഋഷ്യശൃംഗന്റെ പത്‌നിയായ ശാന്ത ദശരഥന്റെ മകളാണ്‌; പൂർവജന്മത്തിൽ കുശധ്വജന്റെ മകളായിരുന്ന വേദവതിയാണ്‌ സീത എന്നിങ്ങനെയുള്ള പല വൃത്താന്തങ്ങളും ഗൗഡീയ വാല്‌മീകിരാമായണത്തിലുള്ളതാണ്‌. ഹരിശ്ചന്ദ്രന്‍, സൗദാസന്‍, ദിലീപന്‍, രഘു, അജന്‍ എന്നിങ്ങനെയുള്ള രഘുവംശപരമ്പരാവർണനം പദ്‌മപുരാണത്താൽ പ്രഭാവിതമാണ്‌. സ്‌കന്ദപുരാണത്തിന്റെയും രഘുവംശത്തിന്റെയും മറ്റും സ്വാധീനതയും ഇതിൽ കാണുന്നു.
കൃത്തിവാസരാമായണത്തിൽ ശൈവശാക്തസമ്പ്രദായങ്ങളുടെ പ്രഭാവവും കാണുന്നുണ്ട്‌. ഹനുമാന്‍ ശിവാവതാരമാണ്‌ എന്ന പ്രസ്‌താവം, മഹിരാവണപ്രകരണത്തിൽ രാമശിവന്മാരുടെ അഭേദപ്രദർശനം, സേതുബന്ധനാരംഭത്തിലെ ശിവപൂജ മുതലായവ ഇക്കാര്യം വ്യക്തമാക്കുന്നു. രാമഭക്തിമാഹാത്മ്യ പ്രകാശനമാണ്‌ ഈ കൃതിയുടെ മുഖ്യമായ ഉദ്ദേശ്യം. ഇതിലെ ഭാഷ സരളവും പ്രസാദഗുണയുക്തവുമത്ര. ഒരുദാഹരണം.
കാര്യനാഇരാജപാടേ പുനഃജാ ഈ ബനേ രാവണ പരമഭക്ത മാരിയ കേമനേ.
(രാജ്യത്തിലെ ഖജനാവുകൊണ്ട്‌ എന്തുപ്രയോജനം? വീണ്ടും ഞാന്‍ വനത്തിലേക്കു പോകും; രാവണന്‍ പരമഭക്തന്‍, അവനെ കൊല്ലുന്നതെങ്ങനെ?). ബംഗാളിൽ മാത്രം പ്രചാരത്തിലുള്ള ചില നാടന്‍പാട്ടുകളുടെ സ്വാധീനതയും ഈ രാമായണത്തിൽ കാണുന്നുണ്ട്‌.
