This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുമാരപിള്ള, ജി. (1923 - 2000)
സര്‍വ്വവിജ്ഞാനകോശം സംരംഭത്തില്‍ നിന്ന്
കുമാരപിള്ള, ജി. (1923 - 2000)
ഭാവദീപ്‌തങ്ങളായ ഒട്ടേറെ കവിതകള്‍കൊണ്ട്‌ ജനശ്രദ്ധ ആകർഷിച്ച മലയാളകവി. ഇദ്ദേഹം തിരുവല്ല പെരിങ്ങര ഗോപാലപിള്ളയുടെയും കോട്ടയം വെന്നിമല പഴീയടത്തു പാർവതിയമ്മയുടെയും മകനായി 1923-ൽ ജനിച്ചു. അധ്യാപകനായിരുന്ന അച്ഛന്‍ നല്ലൊരു സാഹിത്യരസികനുമായിരുന്നു. തിരുവല്ലയിൽ സ്‌കൂള്‍ വിദ്യാഭ്യാസം നിർവഹിച്ചശേഷം ചങ്ങനാശ്ശേരി സെന്റ്‌ ബർക്ക്‌മന്‍സ്‌ കോളജിൽ ചേർന്നു. 1943-ൽ എല്ലാ വിഷയങ്ങള്‍ക്കും ഒന്നാംക്ലാസ്സോടുകൂടി ബി.എ. ജയിച്ചു. 1947-ൽ നാഗപ്പൂർ സർവകലാശാലയിൽ നിന്ന് പ്രവറ്റായി എം.എ. (ഇംഗ്ലീഷ്‌)യും ജയിച്ചു. ബി.എ. ബിരുദം നേടിയശേഷം ബോംബെയിലും തിരുവനന്തപുരത്തും കുറച്ചുനാള്‍ ജോലി നോക്കി. പിന്നീട്‌ തൃശൂർ സെന്റ്‌ തോമസ്‌ കോളജിൽ അസിസ്റ്റന്റ്‌ ലക്‌ചററായി (1944). രണ്ടുവർഷത്തിനുശേഷം സ്വദേശത്തുള്ള ഒരു ഹൈസ്‌കൂളിൽ അധ്യാപകവൃത്തി സ്വീകരിച്ചു. ഇതിനിടയ്‌ക്കാണ്‌ എം.എ. പാസായത്‌. 1948-ൽ പുതുതായാരംഭിച്ച തിരുവനന്തപുരത്തെ മഹാത്മാഗാന്ധി കോളജിൽ ഇംഗ്ലീഷ്‌ ലക്‌ചററായി. താമസിയാതെ തിരുവനന്തപുരം യൂണിവേഴ്‌സിറ്റി കോളജിൽ ലക്‌ചററായി നിയമിക്കപ്പെട്ടു. പ്രാഫസറായി കയറ്റം കിട്ടിയതിനുശേഷം മടപ്പള്ളി, തലശ്ശേരി എന്നിവിടങ്ങളിലെ ഗവണ്‍മെന്റ്‌ കോളജുകളിൽ ജോലിനോക്കിയതൊഴിച്ചാൽ അധ്യാപകവൃത്തിയുടെ ഏറിയകാലവും തിരുവനന്തപുരത്തു തന്നെയായിരുന്നു. പഠിപ്പിച്ചിടത്തൊക്കെ നല്ലൊരു ഇംഗ്ലീഷ്‌ അധ്യാപകന്‍ എന്ന പേരുനേടി. കുമാരപിള്ള സ്വാതന്ത്യ്രസമരകാലത്ത്‌ രാഷ്‌ട്രീയപ്രവർത്തനങ്ങളിൽ ഏർപ്പെട്ടിരുന്നു. 1944-46 കാലങ്ങളിൽ കൊച്ചി പ്രജാമണ്ഡലത്തിന്റെ സജീവപ്രവർത്തകനായിരുന്നു. കവിതാസമിതി, ഗാന്ധിവിചാരപരിഷത്ത്‌ ഇവയുടെ ആദ്യത്തെ കാര്യദർശിയും തുടർന്നു പങ്കാളിയും ആയി. ഗാന്ധിസ്‌മാരകനിധിയിലും ഗാന്ധിസാഹിത്യപ്രസിദ്ധീകരണങ്ങളിലും സജീവമായി പങ്കെടുത്തു. 1961 മുതൽ 69 വരെ കേരളസർവകലാശാലയുടെ സെനറ്റിൽ അധ്യാപകപ്രതിനിധിയായിരുന്നു. കുട്ടിക്കാലത്തുതന്നെ കവിതയെഴുതിത്തുടങ്ങിയ കുമാരപിള്ള 1950-ലാണ്‌ അരളിപ്പൂക്കള്‍ എന്ന ആദ്യസമാഹാരം പ്രസിദ്ധപ്പെടുത്തിയത്‌. പിന്നീട്‌ രണ്ടു സമാഹാരങ്ങള്‍ കൂടി പ്രസിദ്ധം ചെയ്‌തു. കുമാരപിള്ളയുടെ സുഹൃത്തുക്കളും ശിഷ്യന്മാരും മുന്‍കൈയെടുത്ത്‌ എല്ലാ കവിതകളും സമാഹരിച്ച്‌ ഓർമയുടെ സുഗന്ധം എന്ന പേരിൽ 1977-ൽ ഒറ്റപ്പുസ്‌തകമായി പ്രകാശിപ്പിച്ചു. സ്‌നേഹാസ്‌പദമായി പുരോഗമിക്കേണ്ട മനുഷ്യജീവിതത്തിന്റെ ആശകളെയും ആശാഭംഗങ്ങളെയും ഈ കവി ആത്മാർഥതയോടെ അവതരിപ്പിക്കുന്നു. ചങ്ങമ്പുഴക്കാലത്തെ കാല്‌പനികശൈലിയിലെന്ന പോലെ നവീനകവിതയുടെ സവിശേഷശൈലിയിലും പ്രാഗല്‌ഭ്യത്തോടെ എഴുതാന്‍ കുമാരപിള്ളയ്‌ക്കു കഴിഞ്ഞു. ഇദ്ദേഹത്തിന്റെ പ്രധാനകൃതികള്‍ സപ്‌തസ്വരം (1983), 25-കവിതകള്‍ (1986), ശതാബ്‌ദങ്ങളുടെ ശബ്‌ദം (1997- ഗാന്ധിജിയെക്കുറിച്ചുള്ള കവിതകളുടെ സമാഹാരം), കാലത്തിന്റെ കോലങ്ങള്‍ (1998) എന്നീ കവിതാസമാഹാരങ്ങളും തെരഞ്ഞെടുത്ത ലേഖനങ്ങള്‍ (1984), ആചാര്യ നരേന്ദ്രദേവ്‌ (1989-ജീവചരിത്രം), മനുഷ്യത്വത്തിന്റെ മാർഗങ്ങള്‍ (1994), കേരളത്തിലെ മദ്യവിരുദ്ധ പ്രവർത്തനം (1998), ലക്ഷ്‌മി എന്‍. മേനോന്‍ (ജീവചരിത്രം), ഇന്നും ഇന്നലെയും നാളെയും (1999) എന്നീ ഗദ്യകൃതികളുമാണ്‌. മഹാത്മാഗാന്ധിയുടെ തിരഞ്ഞെടുത്ത കൃതികള്‍ ഉള്‍പ്പെടുത്തി സംശോധന എന്ന പേരിൽ ഒരു പുസ്‌തകവും ഇദ്ദേഹം പുറത്തിറക്കി. കേരള മദ്യവിരുദ്ധസമിതി അധ്യക്ഷനായി പ്രവർത്തിച്ച കുമാരപിള്ള "മദ്യനിരോധന'ത്തെപ്പറ്റിയുള്ള ഗ്രന്ഥങ്ങളും രചിച്ചു. സാഹിത്യപ്രവർത്തനത്തിനുള്ള അംഗീകാരമായി കേന്ദ്രസാഹിത്യ അക്കാദമി അവാർഡ്‌, ആശാന്‍ പുരസ്‌കാരം, ഓടക്കുഴൽ സമ്മാനം, ഉള്ളൂർ സ്‌മാരക ബഹുമതി, വൈലോപ്പിള്ളി അവാർഡ്‌ എന്നിവയും സാമൂഹ്യരംഗത്തെ സേവനങ്ങള്‍ക്കുള്ള ആദരസൂചകമായി രാമാശ്രമം അവാർഡും, ദക്ഷിണഭാരത ഹിന്ദിപ്രചാര സഭ അവാർഡും ഇദ്ദേഹത്തിനു ലഭിച്ചു. 2000 സെപ്‌. 17-ന്‌ ഇദ്ദേഹം അന്തരിച്ചു. ഇദ്ദേഹത്തിന്റെ സുഹൃത്തുക്കള്‍ ചേർന്ന്‌ ആത്മാവിന്റെ അയൽക്കാർ എന്നൊരു ഉപഹാരഗ്രന്ഥം പ്രസാധനം ചെയ്‌ത്‌ പ്രസിദ്ധീകരിക്കുകയുണ്ടായി.
