This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുട്ടിക്കുഞ്ഞു തങ്കച്ചി (1820 - 1904)
സര്‍വ്വവിജ്ഞാനകോശം സംരംഭത്തില്‍ നിന്ന്
കുട്ടിക്കുഞ്ഞു തങ്കച്ചി (1820 - 1904)
ഒരു മലയാള കവയിത്രി. അനുഗൃഹീത കവിയായിരുന്ന ഇരയിമ്മന്‍തമ്പി (1782-1856)യുടെ പുത്രിയായി കന്യാകുമാരി ജില്ലയിലുള്ള വിളവംകോടു താലൂക്കിലെ ഇടയ്‌ക്കോട്‌ പുളിയറത്തലവീട്ടിൽ 1820-ൽ ജനിച്ചു. ഇരയിമ്മന്‍ തമ്പിയോടൊത്ത്‌ തിരുവനന്തപുരത്ത്‌ കോട്ടയ്‌ക്കകത്ത്‌ കിഴക്കേ മഠത്തിലാണ്‌ കഴിഞ്ഞുവന്നത്‌. ശരിയായ പേര്‌ ലക്ഷ്‌മിപ്പിള്ള എന്നാണ്‌; കുട്ടിക്കുഞ്ഞ്‌ എന്ന ഓമനപ്പേരിലാണ്‌ പരക്കെ അറിയപ്പെട്ടിരുന്നത്‌. ചേർത്തല വാരനാട്ടു നടുവിലെക്കോവിലകത്ത്‌ കുഞ്ഞന്‍ തമ്പാനായിരുന്നു തങ്കച്ചിയുടെ ഭർത്താവ്‌. സംസ്‌കൃതം ഹരിപ്പാട്ട്‌ കൊച്ചുപിള്ള വാരിയരിൽ നിന്നും, കാവ്യനാടകാദികള്‍ പിതാവിൽനിന്നും അഭ്യസിച്ചു. ഈ രണ്ടു ഗുരുനാഥന്മാരെയും തന്റെ കൃതികളിൽ തങ്കച്ചി സാദരം സ്‌മരിക്കുന്നുണ്ട്‌.
സംഗീതവാസനയുണ്ടായിരുന്ന തങ്കച്ചിക്ക്‌ സംഗീതത്തിൽ വേണ്ടത്ര ശിക്ഷണവും പ്രാത്സാഹനവും ഇരയിമ്മന്‍തമ്പി നല്‌കിയിരുന്നു. ഇവർ തിരുവാതിരക്കളിയിലും സവിശേഷ പ്രാവീണ്യം നേടിയിരുന്നു. 1904 ഫെ. 13-നു തിരുവനന്തപുരത്തുവച്ച്‌ അന്തരിച്ചു. നാടകം, ആട്ടക്കഥ, കിളിപ്പാട്ട്‌, തിരുവാതിരപ്പാട്ട്‌, കുറത്തിപ്പാട്ട്‌, ഓട്ടന്‍തുള്ളൽ, വാതിൽതുറപ്പാട്ട്‌, കുമ്മി, താരാട്ട്‌, ഭജനകീർത്തനം എന്നീ കൈരളീകാവ്യശാഖകളെയെല്ലാം തങ്കച്ചി തന്റെ തൂലികകൊണ്ട്‌ പോഷിപ്പിച്ചിട്ടുണ്ട്‌. 1890-ൽ പ്രസിദ്ധീകരിച്ച തങ്കച്ചിയുടെ അജ്ഞാതവാസം നാടകത്തിൽ മഹാഭാരതത്തിലെ വനപർവത്തിൽ നിന്ന് സ്വീകരിച്ച പാണ്ഡവരുടെ കഥയാണ്‌ കൈകാര്യം ചെയ്‌തിരിക്കുന്നത്‌. ഒരു സ്വതന്ത്രനാടകമാണ്‌ ഈ കൃതി. ഇവർ രചിച്ച ശ്രീമതീസ്വയംവരം, പാർവതീസ്വയംവരം, മിത്രസഹമോക്ഷം എന്നീ മൂന്ന്‌ ആട്ടക്കഥകളും മെച്ചപ്പെട്ട കൃതികളാണ്‌. തിരുവനന്തപുരം സ്ഥലപുരാണം, വൈക്കം സ്ഥലപുരാണം, സ്വർഗവാതിലേകാദശീ മാഹാത്മ്യം, എന്ന മൂന്നു കളിപ്പാട്ടുകളും ഗംഗാസ്‌നാനം എന്ന ഒരു ഓട്ടന്‍തുള്ളലും ഇവർ രചിച്ചിട്ടുണ്ട്‌. ഇവരുടെ ഗാനകൃതികളിൽ ശ്രദ്ധേയമായിട്ടുള്ളവയാണ്‌ ശിവരാത്രി മാഹാത്മ്യം, സീതാസ്വയംവരം, നാരദമോഹനം, സേതുസ്‌നാനം, സ്വാഹാസുധാകരം, പ്രഹ്‌ളാദചരിതം, കിരാതം കുറത്തിപ്പാട്ട്‌, നളചരിതം കുറത്തിപ്പാട്ട്‌ എന്നിവ. കല്യാണാഘോഷം എന്നൊരു മണിപ്രവാളകൃതിയും ഇവരുടേതായുണ്ട്‌. ഭക്തിരസനിർഭരങ്ങളായ ഏതാനും കീർത്തനങ്ങളും ഇവർ രചിച്ചിട്ടുണ്ട്‌.
(പ്രാഫ. അമ്പലത്തറ ഉണ്ണിക്കൃഷ്‌ണന്‍നായർ)
