This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
എഡ്മണ്ടണ്
സര്‍വ്വവിജ്ഞാനകോശം സംരംഭത്തില്‍ നിന്ന്
എഡ്മണ്ടണ്
Edmonton
കാനഡയിലെ ആൽബെർട്ടാ പ്രവിശ്യയുടെ തലസ്ഥാന നഗരം. യു.എസ്‌.-കാനഡ അതിർത്തിയിൽനിന്ന്‌ 480 കി.മീ. വടക്ക്‌, സസ്‌കെച്ച്‌ വാന്‍നദിയുടെ ഇരുകരകളിലുമായി വ്യാപിച്ചുകിടക്കുന്നു. വടക്കേ അമേരിക്കയിലെ വന്‍നഗരങ്ങളിൽ ഏറ്റവും വടക്കായി സ്ഥിതിചെയ്യുന്നത്‌ എഡ്മണ്ടണ് ആണ്‌. 2006-ലെ സർവേ പ്രകാരം സിറ്റി ഏരിയ 684 സ്‌ക്വയർ കിലോമീറ്ററും മെട്രാ ഏരിയ 9417 സ്‌ക്വയർ കിലോമീറ്ററുമാണ്‌. ജനസാന്ദ്രത ച.കിലോമീറ്ററിൽ 1067 ആണ്‌. 2001-ലെ സെന്‍സസ്‌ പ്രകാരം ജനസംഖ്യയിൽ 31 ശതമാനം പ്രാട്ടസ്റ്റന്റുകളും 29 ശതമാനം കത്തോലിക്കരും മൂന്ന്‌ ശതമാനം മുസ്‌ലിങ്ങളുമാണ്‌. 2009-ൽ നിലവിൽ വന്ന തിരഞ്ഞെടുപ്പ്‌ സമ്പ്രദായമനുസരിച്ച്‌ എഡ്മണ്ടണ് നഗരത്തെ 12 വാർഡുകളായി തിരിച്ചു. ഇതിനെ അടിസ്ഥാനമാക്കി 2010-ൽ തിരഞ്ഞെടുപ്പ്‌ നടന്നു. ജനസംഖ്യ: 1155383 (2009).
ഈ നഗരത്തിന്റെ പശ്ചപ്രദേശം ഫലഭൂയിഷ്‌ഠമായ കാർഷികമേഖലയാണ്‌. ഈ ഭാഗത്ത്‌ ധാരാളം എണ്ണപ്പാടങ്ങളും ഉണ്ട്‌. എഡ്മണ്ടണ് ഒരു എണ്ണശുദ്ധീകരണ കേന്ദ്രമാണ്‌. കാനഡയിലെ എണ്ണ ഉത്‌പാദനത്തിൽ മുക്കാൽപങ്കും എഡ്മണ്ടണ് 150 കി.മീ. ചുറ്റളവിലുള്ള എണ്ണപ്പാടങ്ങളിൽനിന്നാണ്‌ ലഭിച്ചുവരുന്നത്‌. ഇവിടെ നിന്ന് ഒണ്ടാറിയോയിലെ സാർണിയിലേക്കും പസിഫിക്‌ തീരത്തെ വാന്‍കൂവറിലേക്കും സ്ഥാപിക്കപ്പെട്ടിരിക്കുന്ന എണ്ണക്കുഴലുകള്‍ കാനഡയിലെ പൈപ്പ്‌ ലൈനുകളിൽ ഏറ്റവും നീളം കൂടിയവയാണ്‌. എന്നാൽ എണ്ണശുദ്ധീകരണത്തിൽ എഡ്മണ്ടണ് കാനഡയിലെ നഗരങ്ങള്‍ക്കിടയിൽ നാലാം സ്ഥാനമേ ഉള്ളൂ. പെട്രാ-കെമിക്കൽ നിർമാണത്തിൽ ഇത്‌ രണ്ടാം സ്ഥാനത്താണ്‌. ജൈവരാസദ്രവ്യങ്ങള്‍, കൃത്രിമപ്പട്ട്‌, സെല്ലുലോസ്‌ അസറ്റേറ്റ്‌, പോളി എഥിലിന്‍ തുടങ്ങിയവയാണ്‌ എഡ്‌മണ്‍ടണിൽ ഉത്‌പാദിപ്പിക്കുന്ന പെട്രാ-കെമിക്കലുകള്‍; ഇവ ഏറിയകൂറും കയറ്റുമതിചെയ്യപ്പെടുന്നു. കാർഷികോത്‌പന്ന സംസ്‌കരണം ഈ നഗരത്തിലെ മറ്റൊരു മുന്തിയ വ്യവസായമാണ്‌. ഭക്ഷ്യപേയപദാർഥങ്ങള്‍ കയറ്റി അയയ്‌ക്കുന്നതിലും എഡ്മണ്ടണ് മുമ്പന്തിയിലാണ്‌.
പ്രവിശ്യാതലസ്ഥാനം, വ്യവസായകേന്ദ്രം എന്നിവയ്‌ക്കു പുറമേ ആൽബെർട്ടാ സർവകലാശാലയുടെ ആസ്ഥാനം, വാസ്‌തുസാമഗ്രി നിർമാണകേന്ദ്രം, ഗതാഗതകേന്ദ്രം എന്നീ നിലകളിലും എഡ്മണ്ടണ് പ്രാധാന്യം നേടിയിരിക്കുന്നു. വെസ്റ്റ്‌മോണ്‍ട്‌സെന്റർ വെസ്റ്റ്‌ എഡ്‌മണ്‍ടണ്‍മാള്‍, എഡ്മണ്ടണ് സിറ്റി സെന്റർ തുടങ്ങി ലോകപ്രസിദ്ധമായ മാളുകള്‍ ഇവിടെ സ്ഥിതി ചെയ്യുന്നു. 1978-ലെ കോമണ്‍വെൽത്ത്‌ ഗെയിംസ്‌ 1983-ലെ വേള്‍ഡ്‌ യൂണിവേഴ്‌സിറ്റി ഗെയിംസ്‌, 2001-ലെ വേള്‍ഡ്‌ ചാമ്പ്യന്‍ഷിപ്‌ ഇന്‍ അത്‌ലറ്റിക്‌സ്‌ 2005-ലെ ഫിഫയ്‌ക്കു 20 വേള്‍ഡ്‌ കപ്പ്‌ എന്നിവ എഡ്മണ്ടണ് ആതിഥ്യമരുളി. നഗരത്തിനുള്ളിലും വടക്കരികിലുമായി ആധുനിക സജ്ജീകരണങ്ങളുള്ള രണ്ട്‌ വിമാനത്താവളങ്ങളുണ്ട്‌. പ്രതിരോധപരവും ഖനനസംബന്ധിയുമായ ആവശ്യങ്ങളിലേക്ക്‌ ആളുകളെയും ചരക്കുകളെയും കയറ്റിയിറക്കുന്നതിലൂടെ ഇവ ലോകത്തിലെ ഏറ്റവും തിരക്കുപിടിച്ച വിമാനത്താവളങ്ങളുടെ മുന്‍നിരയിൽ വർത്തിക്കുന്നു. ജനസംഖ്യയിലും നാഗരികവ്യാപാരങ്ങളിലും അനുദിനം വളർന്നുകൊണ്ടിരിക്കുന്ന ഒരു നഗരമാണ്‌ എഡ്മണ്ടണ്.
