This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ദശപുഷ്പം
സര്‍വ്വവിജ്ഞാനകോശം സംരംഭത്തില്‍ നിന്ന്
ദശപുഷ്പം
കറുക, ചെറൂള, മുയല്‍ച്ചെവിയന്‍, വിഷ്ണുക്രാന്തി, തിരുതാളി, നിലപ്പന, മുക്കുറ്റി, കയ്യോന്നി, പൂവാങ്കുറുന്തല്‍, ഉഴിഞ്ഞ എന്നീ പത്തുസസ്യങ്ങളുടെ ഗണം. ഇവയെല്ലാം ഔഷധസസ്യങ്ങളാണ്.
ഭാരതീയര്‍ക്ക് ദശപുഷ്പം ഓരോന്നും ഓരോ ദേവതാസങ്കല്പമാണ്.
കറുക ചൂടുന്നതുകൊണ്ട് ആധിവ്യാധികള്‍ ശമിക്കുമെന്നാണ് വിശ്വാസം. കറുക ഗണപതിഹോമത്തിനും ഉപയോഗിക്കുന്നു. വിഷ്ണുക്രാന്തി ചൂടിയാല്‍ വിഷ്ണുപദപ്രാപ്തിയാണത്രെ ഫലം. പൂവാങ്കുറുന്തലിന്റെ ഇല ധരിക്കുന്നത് ദാരിദ്ര്യദുഃഖശമനത്തിന് നല്ലതാണെന്നാണ് വിശ്വാസം. പാപങ്ങള്‍ നശിപ്പിക്കുന്നതാണ് നിലപ്പന ധാരണമെന്നും കയ്യോന്നി ധരിച്ചാല്‍ പഞ്ചപാപങ്ങളും നശിക്കുമെന്നും കരുതപ്പെടുന്നു. മുക്കുറ്റി ചൂടിയാല്‍ ഭര്‍ത്തൃസൗഖ്യം എന്നാണു വിധി. തിരുതാളി സൗന്ദര്യവര്‍ധകമാണെന്നാണ് വിശ്വാസം. ആഗ്രഹസാഫല്യത്തിന് ഉഴിഞ്ഞ ധരിക്കണമെന്നും ആയുര്‍വര്‍ധനയ്ക്ക് ചെറൂള ധരിക്കണമെന്നും വിശ്വസിച്ചുപോരുന്നു. ചെറൂള യമധര്‍മസങ്കല്പത്തിലുള്ള പുഷ്പമാകയാല്‍ അത് ബലിയിടുന്നതിന് ഉപയോഗിക്കുന്നു.
മിഥുന സംക്രമദിവസം ദശപുഷ്പം വീട്ടുവളപ്പില്‍ നടുന്നത് ഐശ്വര്യദായകമാണെന്ന് വിശ്വാസമുണ്ട്.
ദശപുഷ്പവുമായി ബന്ധപ്പെട്ട ഏറ്റവും പ്രധാന അനുഷ്ഠാനമാണ് പാതിരാപ്പൂചൂടല്‍. ധനുമാസത്തിലെ തിരുവാതിര നാളില്‍ ഉപവാസമനുഷ്ഠിച്ചശേഷം അര്‍ധരാത്രിയില്‍ സ്ത്രീകള്‍ ദശപുഷ്പം ചൂടുന്ന ചടങ്ങാണിത്.
