This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ടാബ്രിസ്
സര്‍വ്വവിജ്ഞാനകോശം സംരംഭത്തില്‍ നിന്ന്
ടാബ്രിസ്
ഠമയൃശ്വ
വടക്കുപടിഞ്ഞാറന്‍ ഇറാനിലെ പൂര്‍വ അസര്‍ബയ്ജാന്‍ പ്രവിശ്യയുടെ തലസ്ഥാന നഗരം. പ്രാചീനകാലത്ത് ടോറിസ് (ഠമൌൃശ) എന്ന പേരിലാണ് ഇത് അറിയപ്പെട്ടിരുന്നത്. ഉര്‍മിയ തടാകത്തില്‍നിന്ന് 55 കി. മീ. അകലെ അജിചായ് നദിക്കരയില്‍ സ്ഥിതിചെയ്യുന്ന ടാബ്രിസ് ഇറാനിലെ ഒരു പ്രധാന ഉത്പാദന-വാണിജ്യ കേന്ദ്രം കൂടിയാണ്. ജനസംഖ്യ 10,88,985 (91)
സമുദ്രനിരപ്പില്‍നിന്ന് 1370 മീ. ഉയരത്തില്‍ സ്ഥിതിചെയ്യുന്ന ടാബ്രിസ് നഗരത്തിന്റെ മൂന്നു ഭാഗങ്ങളില്‍ കുന്നുകളും ഒരു
ഭാഗത്ത് വിശാലമായ ഒരു സമതലവും അതിരുകള്‍ തീര്‍ക്കുന്നു. വന്‍കര കാലാവസ്ഥ അനുഭവപ്പെടുന്ന ഇവിടെ ചൂടേറിയതും വരണ്ടതുമായ വേനല്‍ക്കാലവും അതിശൈത്യമുള്ള ശീതകാലവും ആണുള്ളത്. ഫലഭൂയിഷ്ഠമായ ഒരു കാര്‍ഷികപ്രദേശമായ ടാബ്രിസില്‍ ഗോതമ്പിനു പുറമേ വിവിധയിനം ഫലങ്ങളും സമൃദ്ധമായി വിളയുന്നു. ടാബ്രിസില്‍ ഉത്പാദിപ്പിക്കപ്പെടുന്ന പേര്‍ഷ്യന്‍ പരവതാനികള്‍ പ്രസിദ്ധമാണ്. തുണിത്തരങ്ങള്‍, സംസ്കരിച്ച ഭക്ഷ്യസാധനങ്ങള്‍, തുകല്‍ ഉത്പന്നങ്ങള്‍, സോപ്പ് എന്നിവയാണ് മറ്റു പ്രധാന ഉത്പന്നങ്ങള്‍.
പാശ്ചാത്യ - പൌരസ്ത്യ ദേശങ്ങള്‍ക്കിടയിലെ പ്രധാന വാണിജ്യപാതയിലുള്ള ടാബ്രിസിന്റെ സ്ഥാനം ശതകങ്ങള്‍ക്കു മുമ്പുതന്നെ ഒരു പ്രമുഖ വ്യാപാര - വാണിജ്യ കേന്ദ്രമെന്ന പദവി ഇതിന് നേടിക്കൊടുത്തു. വന്‍ഭൂകമ്പങ്ങള്‍ പലതവണ ഇവിടെ കനത്ത നാശനഷ്ടങ്ങള്‍ വിതച്ചിട്ടുണ്ട്.
ടെഹ്റാനും റഷ്യന്‍ നഗരങ്ങളുമായി ടാബ്രിസിനെ റോഡുമാര്‍ഗം ബന്ധിപ്പിച്ചിരിക്കുന്നു. 15-ാം ശ.-ല്‍ സ്ഥാപിച്ച ബ്ളൂ മോസ്ക്', ടാബ്രിസ് സര്‍വകലാശാല (1949) എന്നിവയാണ് ഇവിടത്തെ പ്രധാന ആകര്‍ഷണ കേന്ദ്രങ്ങള്‍.
