This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
എക്‌ളജൈറ്റ്‌
സര്‍വ്വവിജ്ഞാനകോശം സംരംഭത്തില്‍ നിന്ന്
എക്‌ളജൈറ്റ്‌
Eclogite
മറ്റു ഭൗമശിലകളുടേതില്‍നിന്ന്‌ വ്യത്യസ്‌തമായ സ്വഭാവവിശേഷങ്ങളുള്ള ഒരു പാതാളശിലാവ്യൂഹം. "എക്‌ളജൈറ്റ്‌ ധാതുക്കള്‍' എന്നു വിശേഷിപ്പിക്കാവുന്ന കടും പച്ചനിറമുള്ള ഓംഫസൈറ്റ്‌, ചെന്തവിട്ടു നിറമുള്ള പൈറോപ്‌ എന്നിവയാണ്‌ മുഖ്യഘടകങ്ങള്‍. സാമാന്യം വലുപ്പമുള്ള തരികളായി കാണപ്പെടുന്ന ഇവ അല്‌പസിലികമാണ്‌. പ്ലാജിയോക്ലേസ്‌ ഫെല്‍സ്‌പാര്‍ ഉള്‍ക്കൊള്ളുന്നില്ല എന്നതും എക്‌ളജൈറ്റിന്റെ ഒരു സവിശേഷതയാണ്‌. മാഗ്മീയ പ്രക്രിയ, കായാന്തരണം എന്നിവയുടെ വെണ്ണേറെയും, കൂട്ടായുമുള്ള പ്രവര്‍ത്തനഫലമായി രൂപംകൊള്ളുന്ന മൂന്നിനം എക്‌ളജൈറ്റ്‌ ശിലകളുണ്ട്‌. ഭൂവല്‌ക്കത്തിലുള്ള സിയാല്‍-പടലത്തിനുകീഴില്‍ എക്‌ളജൈറ്റ്‌ശില മാത്രം ഉള്‍ക്കൊള്ളുന്ന ഒരു പടലമുണ്ടെന്ന്‌ കരുതപ്പെടുന്നു. പ്രീ-കാംബ്രിയന്‍, പാലിയോസോയിക്‌ കല്‌പങ്ങളിലുള്ള ആഗ്നേയവും കായാന്തരിതവുമായ സങ്കീര്‍ണഘടനകളിലാണ്‌ എക്‌ളജൈറ്റ്‌ സാധാരണയായി അവസ്ഥിതമായിക്കാണുന്നത്‌.
രാസസംഘടനത്തില്‍ എക്‌ളജൈറ്റ്‌ ബസാള്‍ട്ട്‌, ഗാബ്രാ എന്നീ ശിലകള്‍ക്ക്‌ സമാനമാണ്‌; എങ്കിലും ആപേക്ഷികസാന്ദ്രത താരതമ്യേന കൂടുതലാണ്‌ (3.2-3.6) ഓംഫസൈറ്റ്‌ സോഡിയം, അലുമിനിയം എന്നിവയുടെ ആധിക്യമുള്ള ഒരു പൈറോക്‌സീന്‍ ധാതുവാണ്‌; പൈറോപ്‌ മഗ്നീഷ്യം കൂടുതലുള്‍ക്കൊള്ളുന്ന ഒരു ഗാര്‍നെറ്റ്‌ ധാതുവും. മറ്റു ധാതുക്കള്‍ ഡയോക്‌സൈഡ്‌, എന്‍സ്റ്റട്ടൈറ്റ്‌, ഒലിവിന്‍, റൂട്ടൈല്‍, അപട്ടൈറ്റ്‌, ഇരുമ്പയിരുകള്‍, ക്വാര്‍ട്‌സ്‌, മസ്‌കോവൈറ്റ്‌, സൊയിസൈറ്റ്‌, അല്‍ബൈറ്റ്‌, കയനൈറ്റ്‌, സിലിമനൈറ്റ്‌ എന്നിവയും അപൂര്‍വമായി വജ്രം, കാല്‍സൈറ്റ്‌ എന്നിവയുമാണ്‌. ഹോണ്‍ബ്‌ളെന്‍ഡ്‌, കെലിഫൈറ്റ്‌ എന്നിവ യഥാക്രമം പൈറോക്‌സീന്‍, ഗാര്‍നെറ്റ്‌ എന്നിവയുടെ പ്രതിസ്ഥാപിത ധാതുക്കളാണ്‌ ഹോണ്‍ബ്ലെന്‍ഡ്‌ ക്ഷാരീയമോ പച്ചനിറമുള്ള സ്‌മരഗ്‌ഡൈറ്റോ ആയിരിക്കും. പ്രതിസ്ഥാപനത്തിന്റെ ആക്കം വര്‍ധിക്കുമ്പോള്‍ എക്‌ളജൈറ്റ്‌ ശില ഗാര്‍നൈറ്റ്‌-ആംഫിബൊളൈറ്റ്‌ ശിലയായി പരിണമിക്കാം. ഗാബ്രാ, ബസാള്‍ട്ട്‌ ശിലകളിലുള്ള ധാതുസമുച്ചയം ഉന്നതമര്‍ദാവസ്ഥയില്‍ അസ്ഥിരമായതിനാല്‍ പുതിയവ രൂപംകൊള്ളുന്നു.
ഒലിവിന്‍, അനോര്‍തൈറ്റ്‌ എന്നിവ പ്രതിപ്രവര്‍ത്തിച്ച്‌ മഗ്നീഷ്യംഗാര്‍നൈറ്റും; അല്‍ബൈറ്റിനു പകരം ജഡൈറ്റും രൂപംകൊള്ളുന്നു. മാതൃശില കൂടുതലായി അലുമിനിയം ഉള്‍ക്കൊണ്ടിരുന്നാല്‍ കയനൈറ്റ്‌, സിലിമനൈറ്റ്‌ എന്നീ ധാതുക്കളും; മാഗ്മ കൂടുതലായി അലുമിനിയം ഉള്‍ക്കൊണ്ടിരുന്നാല്‍ ഓംഫസൈറ്റിനു പകരം ജഡൈറ്റ്‌, എജിറിന്‍ എന്നിവയും; പൈറോപ്പിനുപകരം ആല്‍മണ്ടൈറ്റ്‌, ഗ്രാസുലറൈറ്റ്‌ എന്നിവയും രൂപംകൊള്ളുന്നു.
ഭൂഗര്‍ഭീയ പരിസ്ഥിതികളെ ആസ്‌പദമാക്കി എക്‌ളജൈറ്റ്‌ ശിലകളെ മൂന്നിനങ്ങളായി തിരിക്കാം:
(1) ക്രാമിയത്തിന്റെ ആധിക്യമുള്ള പൈറോക്‌സീന്‍, മഗ്നീഷ്യത്തിന്റെ ആധിക്യമുള്ള ഗാര്‍നെറ്റ്‌ എന്നിവയുള്‍ക്കൊള്ളുന്ന ഗാര്‍നെറ്റ്‌-പൈറോക്‌സിനൈറ്റ്‌ അഥവാ ഗ്രിക്ക്വയിറ്റ്‌. സൗത്ത്‌ ആഫ്രിക്കന്‍ വജ്രഖനികളിലുള്ള കിംബര്‍ലൈറ്റ്‌ പൈപ്പുകളില്‍ ഖണ്ഡങ്ങളായും ഗോളകങ്ങളായും ഗ്രിക്ക്വയിറ്റ്‌ അവസ്ഥിതമായിക്കാണുന്നു. ഗ്രിക്ക്വയിറ്റ്‌ ഉള്‍ക്കൊള്ളുന്ന ഗാര്‍നെറ്റ്‌ പരലുകള്‍ക്കുള്ളിലാണ്‌ വജ്രം അവസ്ഥിതമായിക്കാണുന്നത്‌. തന്മൂലം ഇത്‌ വജ്രങ്ങളുടെ മാതൃശിലയായി കരുതപ്പെടുന്നു.
2. മാഗ്മീയ-കായാന്തരണ പ്രക്രിയകളുടെ കൂട്ടായപ്രവര്‍ത്തനംമൂലം സംജാതമാകുന്ന ഒഫിയോലിറ്റിക്‌-എക്‌ളജൈറ്റ്‌; ഈ വിഭാഗത്തില്‍ പൈറോക്‌സീന്‍ സോഡിയത്തിന്റെയും ഗാര്‍നെറ്റ്‌ ഇരുമ്പ്‌, നിക്കല്‍ എന്നിവയുടെയും ആധിക്യമുള്ളവയാണ്‌.
3. സാധാരണയുള്ള എക്‌ളജൈറ്റ്‌ ഉന്നതമര്‍ദോഷ്‌മാവില്‍
കായാന്തരണംമൂലം സംജാതമാകുന്നു (നോ. കായാന്തരണം). ഈ ഇനത്തില്‍ ഗാര്‍നെറ്റ്‌ കൂടുതല്‍ കാത്സ്യം ഉള്‍ക്കൊള്ളുന്നവയാണ്‌.
ബസാള്‍ട്ട്‌ മാഗ്മ ഉന്നതമര്‍ദത്തില്‍ രൂപംപ്രാപിക്കുക വഴിയും ഗാര്‍നെറ്റ്‌-പെരിടൊട്ടൈറ്റിന്റെ ഭാഗികഗളനം വഴിയും എക്‌ളജൈറ്റ്‌ രൂപംകൊള്ളുന്നു. സാധാരണ ഉന്നത മര്‍ദോഷ്‌മാവില്‍ രൂപംകൊള്ളുന്ന എക്‌ളജൈറ്റ്‌ മറ്റ്‌ അസംഗത(anomalous) പരിസ്ഥിതികളിലും കാണപ്പെടുന്നു. ഭൂവല്‌ക്കത്തിലുള്ള സിയാല്‍-പടലത്തിനു കീഴിലുള്ള എക്‌ളജൈറ്റ്‌ മണ്ഡലമാണ്‌ മോഹോ (Moho) വിച്ഛിന്നതയ്‌ക്ക്‌ നിദാനം എന്നു ചിലര്‍ക്ക്‌ അഭിപ്രായമുണ്ട്‌.
