This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
എലിസബെത്ത്‌ (1709 - 62)
സര്‍വ്വവിജ്ഞാനകോശം സംരംഭത്തില്‍ നിന്ന്
എലിസബെത്ത്‌ (1709 - 62)
Elizabeth
റഷ്യന്‍ ചക്രവർത്തിനി. 1709 ഡി. 18നു മഹാനായ പീറ്റർ ചക്രവർത്തിക്ക്‌ കാതറീന്‍ 1-ൽ ജനിച്ച പുത്രി.
1740-ൽ ബാലനായ ഇവാന്‍ ഢക നു വേണ്ടി ഭരണമേറ്റത്‌ എലിസബെത്തിന്റെ സഹോദരി അന്നാലിയോ പോള്‍ ദോവ്‌ന ആയിരുന്നു. അലസയും അസമർഥയുമായ അവരുടെ ഭരണകാലത്ത്‌ പൊതു ജീവിതത്തിലേക്കു കടന്നുവരാന്‍ എലിസബെത്ത്‌ നിർബന്ധിതയായി. 1741 ന. 25-ന്‌ അർധരാത്രിയിൽ വിശ്വസ്‌തരായ ഏതാനും പട്ടാളക്കാർ അവരെ ചെന്നു കാണുകയും കർമരംഗത്തേക്കു കടന്നു വരുവാന്‍ അപേക്ഷിക്കുകയും ചെയ്‌തു. ഇരുമ്പുകൊണ്ടുള്ള മാർച്ചട്ടയും ധരിച്ച്‌, കൈയിലൊരു കുരിശുമായി എലിസബെത്ത്‌ പ്രായോബ്രാഷെന്‍സ്‌കി റെജിമെന്റി(Preobrazhensky Regiment)നെ സമീപിച്ചു; അവർ എലിസബെത്തിനെ പിന്തുടർന്നു. ചക്രവർത്തിനിയുടെ പാർശ്വവർത്തികളെ മുഴുവന്‍ കീഴടക്കിയശേഷം എലിസബെത്ത്‌ സിംഹാസനാരൂഢയായി.
തന്റെ പിതാവിന്റെ നയങ്ങളെ ആദർശസൂക്തങ്ങളായിത്തന്നെ എലിസബെത്ത്‌ സ്വീകരിച്ചു. ആക്രമണകാരികളായ സ്വീഡന്‍കാരെ പിന്നാക്കം പായിച്ചു. ഫിന്‍ലന്‍ഡ്‌ ഭാഗത്ത്‌ റഷ്യന്‍ അതിർത്തി കൂടുതൽ പടിഞ്ഞാറോട്ടു വ്യാപിപ്പിച്ചു. റഷ്യയിൽ മരണശിക്ഷ നിർത്തലാക്കി. എന്നാൽ പില്‌ക്കാലത്ത്‌ കുറ്റവാളികളായ സൈനികർക്കും രാഷ്‌ട്രീയക്കാർക്കും വേണ്ടി പരിമിതപ്പെടുത്തിക്കൊണ്ട്‌ അത്‌ നിലനിർത്തേണ്ടിവന്നു. എലിസബെത്തിന്റെ പ്രധാന ഉപദേഷ്‌ടാക്കളിൽ ഒരാള്‍ കൗണ്ട്‌ ഇവാന്‍ ഷുവാലോവ്‌ ആയിരുന്നു. ശ്രദ്ധേയമായ ഒരു വിദ്യാഭ്യാസപരിപാടി നടപ്പാക്കുന്നതിൽ ഇദ്ദേഹത്തെ എലിസബെത്ത്‌ നിർലോഭം സഹായിച്ചു. ഈ പരിപാടിയുടെ ഭാഗമെന്ന നിലയിലാണ്‌ മോസ്‌കോ സർവകലാശാല സ്ഥാപിതമായത്‌ (1755). റഷ്യയിലെ ആദ്യത്തെ സർവകലാശാലയാണ്‌ ഇത്‌. ഫ്രഞ്ച്‌ സാഹിത്യത്തിലൂടെ പ്രത്യക്ഷപ്പെട്ട പാശ്ചാത്യസംസ്‌കാരത്തിൽ റഷ്യ ഇക്കാലത്ത്‌ കൂടുതൽ ആകൃഷ്‌ടയായി. ആധുനിക റഷ്യന്‍ സാഹിത്യത്തിന്റെ പ്രാരംഭം കുറിച്ച ലൊമെനസോവ്‌ എലിസബെത്തിന്റെ സമകാലികനായിരുന്നു.
എലിസബെത്തിന്റെ മന്ത്രിമാരിൽ പ്രധാനിയായിരുന്ന ഷുവാലോവ്‌ (കൗണ്ട്‌ പീറ്റർ) കർഷകരുടെ നാശം രാജ്യത്തിന്റെ നാശമായിരിക്കുമെന്ന്‌ ചൂണ്ടിക്കാട്ടി. കാർഷിക മേഖലയിലെ ശോചനീയാവസ്ഥയിൽ എലിസബെത്ത്‌ അസന്തുഷ്‌ടയായിരുന്നു. കാർഷികകലാപങ്ങള്‍ മിക്കവാറും നിരങ്കുശമായിത്തന്നെ തുടർന്നു. ഈ പരിതഃസ്ഥിതിയിൽ പോലും 10 ദശലക്ഷം റൂബിള്‍ ചെലവാക്കി ഒരു ശീതകാലകൊട്ടാരം പണിയിക്കുവാന്‍ എലിസബെത്ത്‌ മടിച്ചില്ല.
യൂറോപ്പിൽ നടന്ന സപ്‌തവത്സര യുദ്ധ (1756-63) ത്തിൽ എലിസബെത്ത്‌ പങ്കെടുത്തു. പ്രഷ്യയിലെ ഫ്രഡറിക്‌ നടത്തിയ ചില വ്യക്തിപരമായ പരാമർശങ്ങളാണ്‌ ഈ യുദ്ധത്തിൽ ചേരുവാന്‍ അവരെ പ്രരിപ്പിച്ചത്‌. പ്രഷ്യയുടെ മേൽ പല വിജയങ്ങളും അവർ നേടി. ഇത്‌ യൂറോപ്പിൽ റഷ്യയുടെ യശസ്സ്‌ ഉയർത്തുവാന്‍ പര്യാപ്‌തമായിരുന്നു. 1762 ജനു. 5-ന്‌ എലിസബെത്ത്‌ അന്തരിച്ചു.
