This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
അര്‍മീനിയന്‍ ഗ്രിഗോറിയന്‍ സഭ
സര്‍വ്വവിജ്ഞാനകോശം സംരംഭത്തില്‍ നിന്ന്
അര്‍മീനിയന്‍ ഗ്രിഗോറിയന്‍ സഭ
Armenian Gregorian Church
ഒന്നാമത്തെ ദേശീയ ക്രൈസ്തവസഭ. കിഴക്കന്‍ മോണോഫിസൈറ്റ് സഭകളില്‍ ഒന്നാണിത്. ഒന്നാം ശ.-ത്തില്‍ തദ്ദായി, ബര്‍ത്തലോമിയ എന്നീ അപ്പോസ്തലന്മാര്‍ അര്‍മീനിയയില്‍ സുവിശേഷപ്രസംഗം നടത്തിയിട്ടുണ്ടെന്നു പറയപ്പെടുന്നു. ഇതിന്റെ അടിസ്ഥാനത്തില്‍ അര്‍മീനിയന്‍ സഭയുടെ അപ്പോസ്തലിക-ആരംഭത്തെ അര്‍മീനിയക്കാര്‍ ന്യായീകരിക്കുന്നു. അര്‍മീനിയയിലെ ക്രൈസ്തവ രക്തസാക്ഷികളുടെ പട്ടികയില്‍ രണ്ടും മൂന്നും ശ.-ങ്ങളില്‍ ജീവിച്ചിരുന്ന മെത്രാന്‍മാരെപ്പറ്റി പരാമര്‍ശിക്കുന്നുണ്ട്. എങ്കിലും ആദ്യത്തെ മൂന്നു ശ.-ങ്ങളിലെ ഇതിന്റെ ചരിത്രം അവ്യക്തമാണ്.
വിശുദ്ധഗ്രിഗറിയുടെ പ്രവര്‍ത്തനങ്ങളുടെ ഫലമായി 286-നും 314-നും ഇടയ്ക്കാണു ക്രിസ്തുമതം അര്‍മീനിയയിലെ മതമായി അംഗീകരിക്കപ്പെട്ടത്. അന്നത്തെ അര്‍മീനിയന്‍ രാജാവായിരുന്ന തിറിഡേറ്റസ് (Tirdates) മൂന്നാമന്‍ ക്രിസ്തുമതം സ്വീകരിക്കുകയും അതിനെ അവിടത്തെ മതമായി പ്രഖ്യാപിക്കുകയും ചെയ്തു. അവിടത്തെ ക്രൈസ്തവസഭയുടെ ആദ്യതലവന്‍ വിശുദ്ധ ഗ്രിഗറി ആയിരുന്നു.
ആദ്യം മുതല്‍ ഈ സഭ സ്വതന്ത്രമായൊരു പദവി ആഗ്രഹിച്ചിരുന്നു. 434-ല്‍ അര്‍മീനിയന്‍ ഭാഷയിലേക്കു ബൈബിള്‍ തര്‍ജുമ ചെയ്യപ്പെട്ടതോടെ അര്‍മീനിയന്‍സഭ കാല്‍സിഡോണ്‍ കൌണ്‍സിലിനെ തുറന്ന് എതിര്‍ക്കാന്‍ തുടങ്ങി. മോണോഫിസൈറ്റ് സിദ്ധാന്തങ്ങളോട് ഈ സഭയ്ക്കു യോജിപ്പുണ്ടായിരുന്നു. അഞ്ചാം ശ.-ത്തോടുകൂടി ഈ സഭയ്ക്കു പരിപൂര്‍ണസ്വാതന്ത്ര്യം ലഭിച്ചു. അതോടെ ഗ്രീക് ഓര്‍ത്തഡോക്സ് സഭയും അര്‍മീനിയന്‍ അപ്പോസ്തലിക സഭയും തമ്മിലും പിളര്‍പ്പുണ്ടായി. ഒരു ദേശീയസ്ഥാപനം എന്ന നിലയ്ക്ക് അര്‍മീനിയന്‍ ചരിത്രത്തില്‍ ഈ സഭ വലിയൊരു പങ്കു വഹിച്ചിട്ടുണ്ട്. രാഷ്ട്രീയമായും ആത്മീയമായും ഉള്ള നേതൃത്വം ഈ സഭ നല്കിയിരുന്നു. ഈ കാരണങ്ങളാല്‍ ഇതിന്റെ ആധിപത്യം നൂറ്റാണ്ടുകളോളം നിലനിന്നു. 20-ാം ശ.-ത്തിന്റെ മധ്യത്തിലും സ്ഥിതി വ്യത്യസ്തമായിരുന്നില്ല. 428-29 കാലത്ത് അര്‍മീനിയാരാജ്യം അധഃപതിച്ചപ്പോള്‍ ദേശീയൈക്യത്തിന്റെ പ്രതീകമായി നിന്നത് ഈ സഭയുടെ അധികാരിയായിരുന്നു.
അര്‍മീനിയന്‍ സഭ ആരാധനാക്രമത്തിനു വലിയ പ്രാധാന്യം കല്പിക്കുന്നു. അര്‍മീനിയന്‍ഭാഷയിലാണ് ആരാധനാക്രമങ്ങളെങ്കിലും പ്രഭാഷണങ്ങള്‍ പ്രാദേശികഭാഷയിലാണ് നടത്തുന്നത്.
അര്‍മീനിയന്‍ പള്ളികള്‍ സാധാരണയായി ദീര്‍ഘചതുരാകൃതിയിലും കിഴക്കോട്ടഭിമുഖമായും ആണ് പണിയുന്നത്. പടങ്ങളോ വിഗ്രഹങ്ങളോ അപൂര്‍വമായേ പള്ളികളില്‍ സ്ഥാപിക്കാറുള്ളു.
