This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam

സര്‍വ്വവിജ്ഞാനകോശം സംരംഭത്തില്‍ നിന്ന്

14:51, 22 ജൂണ്‍ 2015-നു നിലവിലുണ്ടായിരുന്ന രൂപം

കൊക്കോസ് ദ്വീപുകള്‍

Cocos Islands

ഇന്ത്യന്‍ സമുദ്രത്തില്‍ ആസ്റ്റ്രേലിയക്കും ശ്രീലങ്കയ്ക്കും ഏതാണ്ട് മധ്യഭാഗത്തായി സ്ഥിതി ചെയ്യുന്ന 27 പവിഴപ്പുറ്റു ദ്വീപുകളുടെ സമൂഹം. ഇവ കീലിംഗ് ദ്വീപുകളെന്ന പേരിലും അറിയപ്പെടുന്നുണ്ട്. തെക്ക് അക്ഷാംശം 12⁰05' മുതല്‍ കിഴക്ക് രേഖാംശം 96⁰ 53' വരെയാണു സ്ഥാനം. ഈ ദ്വീപുകളുടെ മൊത്തം വിസ്തീര്‍ണം 14.2 ച.കി.മീ. മാത്രമാണ്. ദ്വീപുകളുടെ വലുപ്പം 0.4 കിലോമീറ്ററിനും 8 കിലോമീറ്ററിനും ഇടയ്ക്കാണ്. വെറും മണ്‍കൂനകളെപ്പോലെ തോന്നിക്കുന്ന ദ്വീപുകളും ഇവയില്‍ കാണാം. ഈ ദ്വീപുകളുടെ ഭരണം നടത്തുന്നത് ആസ്ട്രേലിയന്‍ ഗവണ്‍മെന്റാണ്.

ഇവയില്‍ രണ്ടു ദ്വീപുകളില്‍ മാത്രമേ ജനവാസമുള്ളൂ. 2010 ജൂണ്‍ 30-ലെ കണക്കനുസരിച്ച് ഇവിടെ വസിക്കുന്നവരുടെ ജനസംഖ്യ 596 മാത്രമാണ്.

വളരെ സുഖപ്രദമായ കാലാവസ്ഥയാണ് ഈ ദ്വീപുകളിലുള്ളത്. താപനില 20^{0</sup -31.10</sup C -നുള്ളിലാണ്. ദ്വീപുകളുടെ മിക്ക ഭാഗങ്ങളും തെങ്ങിന്‍തോപ്പുകള്‍ കൊണ്ടു നിബിഡമായിരിക്കുന്നു. കൊപ്രാ, വെളിച്ചെണ്ണ, തേങ്ങ എന്നിവയാണ് പ്രധാന കയറ്റുമതിയിനങ്ങള്‍. ഈ ദ്വീപുകളുടെ സാമ്പത്തിക രംഗം പൂര്‍ണമായും തേങ്ങയെയും അതിന്റെ ഉത്പന്നങ്ങളെയും ആശ്രയിച്ചിരിക്കുന്നു.}

1609-ല്‍ ക്യാപ്റ്റന്‍ വില്യം കീലിംഗ് ആണ് ഈ ദ്വീപുകളെ കണ്ടെത്തിയത്. ഇവയ്ക്കു കീലിംഗ് ദ്വീപുകള്‍ എന്ന പേരു ലഭിച്ചതും ഇതുമൂലമാണ്. ഇതിനുശേഷം 1826-ല്‍ അലക്സാണ്ടര്‍ ഹരേ എന്ന സഞ്ചാരി ഏതാനും സ്ത്രീകളുമായി ഇവിടെ താമസമാക്കി. അതിനടുത്ത വര്‍ഷം സ്കോട്ടിഷ്-നാവികനായ ജോണ്‍ ക്ളൂണിസ് റോസ് ഏതാനും മലയാക്കാരോടൊപ്പം ദ്വീപില്‍ കുടിയേറിപ്പാര്‍ത്തു. ഏതാനും വര്‍ഷങ്ങള്‍ക്കുശേഷം 175 പേരടങ്ങുന്ന ദ്വീപുവാസികളുടെ നേതൃത്വം ഇദ്ദേഹം ഏറ്റെടുത്തു. 1857-ല്‍ കൊക്കോസ് ദ്വീപുകള്‍ ബ്രിട്ടീഷ് അധീശപ്രദേശമായി. 1955-ല്‍ മാത്രമാണ് ബ്രിട്ടീഷ് ഭരണകൂടം ഇതിന്റെ ഭരണച്ചുമതല ആസ്റ്റ്രേലിയയ്ക്കു കൈമാറിയത്. ഒന്നും രണ്ടും ലോകയുദ്ധങ്ങളില്‍ ഈ ദ്വീപസമൂഹം ജര്‍മന്‍കാരുടെയും ജപ്പാന്‍കാരുടെയും ആക്രമണങ്ങള്‍ക്ക് വിധേയമായിരുന്നു.

പരിണാമശാസ്ത്രത്തിന്റെ പിതാവായി അറിയപ്പെടുന്ന ചാള്‍സ് ഡാര്‍വിന്‍ തന്റെ ആഗോളശാസ്ത്രപര്യവേക്ഷണത്തിനിടയില്‍ 1836-ല്‍ കൊക്കോസ് ദ്വീപും സന്ദര്‍ശിച്ചതായി രേഖപ്പെടുത്തിയിട്ടുണ്ട്.

കൊക്കോസ് ദ്വീപ്. പസിഫിക് സമുദ്രത്തില്‍ കോസ്റ്റാറിക്കയില്‍ നിന്നും 480 കി മീ. ദൂരെയായി 78 ച. കി.മീ. വിസ്തീര്‍ണമുള്ള മറ്റൊരു ദ്വീപും കൊക്കോസ് എന്ന പേരിലറിയപ്പെടുന്നുണ്ട്. 1997-ല്‍ യുണെസ്കൊ ഇവിടം ലോകപൈതൃകമേഖലയായി പ്രഖ്യാപിച്ചു. 'നിധികളുടെ കലവറ' എന്ന പേരിലറിയപ്പെടുന്ന ഈ ദ്വീപ് പല കഥകളിലും സ്ഥാനം പിടിച്ചിട്ടുണ്ട്. ഈ ദ്വീപില്‍ 100,000,000 ഡോളര്‍ കുഴിച്ചിട്ടിട്ടുണ്ടെന്ന ഒരു വിശ്വാസം നിലവിലുണ്ട്. തന്മൂലം ഈ ദ്വീപില്‍ സന്ദര്‍ശനം നടത്തുവാന്‍ കോസ്റ്റാറിക്കാ ഭരണകൂടത്തിന്റെ അനുമതി ആവശ്യമാണ്. 'കിട്ടുന്നതില്‍ പകുതി സര്‍ക്കാരിനു നല്കാം' എന്ന ഉപാധിയോടുകൂടി മാത്രമേ നിധി കുഴിച്ചെടുക്കുവാനുള്ള അനുവാദം നല്കുകയുള്ളൂ. ഭാഗ്യാന്വേഷികളായ നിരവധി ആളുകള്‍ നിധി കണ്ടെടുക്കാന്‍ ശ്രമിച്ചിട്ടുണ്ടെങ്കിലും ഇതു വരെ ആരും ഫലപ്രാപ്തിയിലെത്തിയിട്ടില്ല.

ജ്വാലാമുഖീയ - ഉദ്ഭവച്ചരിത്രമാണ് കൊക്കോസ് ദ്വീപിനുള്ളത്. 850-ഓളം മീ. ഉയരമുള്ള രണ്ടു കുന്നുകള്‍ ചേര്‍ന്ന ആകൃതിയാണ് ദ്വീപിനുള്ളത്. ഈ കുന്നുകളുടെ ചരിവുകള്‍ കടലിലേക്ക് ഇറങ്ങിക്കിടക്കുന്നു. പാമ്പ്, എലി, കൊതുക് എന്നിവ ഈ ദ്വീപില്‍ വളരാറില്ല. എന്നാല്‍ പന്നികളും കന്നുകാലികളും കുരങ്ങന്മാരും നിരവധിയിനം പക്ഷികളും ഇവിടെ വളരുന്നു. നായാട്ടും മത്സ്യബന്ധനവുമാണ് തദ്ദേശീയരുടെ പ്രധാന വരുമാനമാര്‍ഗങ്ങള്‍.

പതിനാറാം ശതകത്തില്‍ ഈ ദ്വീപ് കണ്ടുപിടിക്കപ്പെട്ടപ്പോള്‍ ഇവിടെ ജനവാസമില്ലായിരുന്നു. 1818-ഓടുകൂടി മാത്രമാണ് ഇവിടേക്ക് ജനങ്ങള്‍ കുടിയേറിത്തുടങ്ങിയത്. 1888 മുതല്‍ ദ്വീപ് കോസ്റ്റാറിക്കാ ഭരണകൂടത്തിന്റെ അധീനതയിലാണ്.