This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഔർവന്‍
സര്‍വ്വവിജ്ഞാനകോശം സംരംഭത്തില്‍ നിന്ന്
Mksol (സംവാദം | സംഭാവനകള്‍)
(പുതിയ താള്‍: == ഔർവന്‍ == മഹാഭാരതമനുസരിച്ച്‌ ഭൃഗുമഹർഷിയുടെ പുത്രനായ ച്യവനന...)
അടുത്ത വ്യത്യാസം →
05:41, 24 ജൂണ്‍ 2014-നു നിലവിലുണ്ടായിരുന്ന രൂപം
ഔർവന്‍
മഹാഭാരതമനുസരിച്ച്‌ ഭൃഗുമഹർഷിയുടെ പുത്രനായ ച്യവനന്‌ മനുപുത്രിയായ ആരുഷിയിൽ ഉണ്ടായ ഒരു ഋഷി. ഊരു ഭേദിച്ച്‌ വെളിയിൽ വന്നതുമൂലമാണ്‌ ഇദ്ദേഹത്തിന്‌ ഔർവന്‍ എന്ന പേര്‌ ലഭിച്ചത്‌. ഹേഹയ രാജാവായിരുന്ന കൃതവീര്യന്‍ സ്വകുല ഗുരുക്കളായ ഭൃഗുക്കള്‍ക്ക്‌ ധാരാളം പണം നല്‌കി. പിന്നീട്‌ ദാരിദ്യ്രത്തിൽ കഴിയേണ്ടിവന്ന കൃതവീര്യസന്തതികള്‍ സഹായത്തിനായി ഭാർഗവന്മാരെ സമീപിച്ചെങ്കിലും അവർ ഒഴിഞ്ഞുമാറുകയാണുണ്ടായത്‌. ഇക്കാരണത്താൽ ഭൃഗുവംശത്തിന്റെ ഉന്മൂലനാശം വരുത്തുമെന്ന്‌ ക്ഷത്രിയർ പ്രതിജ്ഞ ചെയ്‌തു. ക്ഷത്രിയരെ ഭയന്ന്‌ ആരുഷി തന്റെ ഗർഭത്തെ നൂറു വർഷം തുട(ഊരു)യിൽ ഒളിച്ചുവച്ചു. ഇക്കാലത്തിനിടയ്‌ക്ക്‌ ഗർഭസ്ഥശിശു വേദങ്ങളിൽ പാണ്ഡിത്യം നേടി. രഹസ്യം മനസ്സിലാക്കിയ ക്ഷത്രിയർ ആരുഷിയെ കണ്ടുപിടിച്ചു നശിപ്പിക്കാനൊരുങ്ങിയപ്പോള്‍ അവളുടെ ഊരുവിൽനിന്ന്‌ തേജസ്സു വമിപ്പിച്ചുകൊണ്ട്‌ ഒരു ശിശു പുറത്തുവന്നു. ഔർവന്റെ (ഈ ശിശു ഔർവന്‍ എന്ന പേരിലറിയപ്പെടുന്നു) തേജസ്സുകൊണ്ട്‌ ക്ഷത്രിയന്മാരുടെ കണ്ണുകള്‍ പൊട്ടിപ്പോയി.
സ്വകുലനാശകരായ ക്ഷത്രിയരെ ഒന്നടങ്കം സംഹരിക്കുവാന്‍, ഔർവന്‍ സർവസംഹാരാത്മകമായ തപസ്സാരംഭിച്ചപ്പോള്‍ ലോകങ്ങള്‍തന്നെ ദഹിച്ചുതുടങ്ങി. അപ്പോള്‍ പിതൃക്കളുടെ അപേക്ഷയനുസരിച്ച്‌ ഔർവന്‍ തന്റെ തപോമയമായ കോപാഗ്നിയെ സമുദ്രത്തിൽ നിക്ഷേപിച്ചു. അശ്വമുഖത്തിന്റെ രൂപം കൈക്കൊണ്ട്‌ സദാ ജ്വലിച്ചുകൊണ്ടിരിക്കുന്ന ഈ അഗ്നി ജലത്തെ വറ്റിച്ചു കളയുന്നതുകൊണ്ടാണ്‌ സമുദ്രത്തിൽ ജലം വർധിക്കാതിരിക്കുന്നതെന്നാണ്‌ ഐതിഹ്യം (നോ. ബഡവാഗ്നി). യുഗാവസാനത്തിൽ ഇത്‌ മുകളിൽവന്ന്‌ ലോകനാശം വരുത്തുമെന്ന്‌ വിശ്വസിക്കപ്പെടുന്നു.
ഔർവന്റെ സഹായത്താൽ സഗരന്‍ ഗരുഡസോദരിയായ സുമതിയെ വിവാഹം കഴിച്ച്‌ ശാപവിമുക്തയാക്കുകയും അയോധ്യയിൽ ചക്രവർത്തിയായി വാഴിക്കപ്പെടുകയും ചെയ്‌ത കഥ ബ്രഹ്മാണ്ഡപുരാണത്തിൽ വിസ്‌തരിച്ചിട്ടുണ്ട്‌. വൈദിക സാഹിത്യത്തിൽ ഔർവന്റെ പരമ്പരയിൽപ്പെട്ട ഒരു ഔർവനെക്കുറിച്ചു പ്രസ്‌താവമുണ്ട്‌. പ്രഥമമന്വന്തരമായ സ്വായംഭുവത്തിലെ സപ്‌തർഷികളിൽ പ്രമുഖനായ മറ്റൊരു ഔർവനും ആഗ്നേയപുരാണത്തിൽ പരാമൃഷ്‌ടനായിട്ടുണ്ട്‌.
