This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഓഡിനന്‍സ്‌
സര്‍വ്വവിജ്ഞാനകോശം സംരംഭത്തില്‍ നിന്ന്
Mksol (സംവാദം | സംഭാവനകള്‍)
(പുതിയ താള്‍: == ഓഡിനന്‍സ്‌ == == Ordinance == നിയമനിർമാണസഭകള്‍ സമ്മേളിക്കാത്ത അവസരങ...)
അടുത്ത വ്യത്യാസം →
09:18, 15 ജൂണ്‍ 2014-നു നിലവിലുണ്ടായിരുന്ന രൂപം
ഓഡിനന്‍സ്‌
Ordinance
നിയമനിർമാണസഭകള്‍ സമ്മേളിക്കാത്ത അവസരങ്ങളിൽ ഭരണത്തലവന്മാർ പ്രഖ്യാപിക്കുന്ന അടിയന്തര നിയമങ്ങള്‍. ഓഡിനന്‍സ്‌ എന്ന പദത്തിന്റെ സാമാന്യമായ അർഥം, അധികാരസ്വഭാവമുള്ള കല്‌പന അല്ലെങ്കിൽ നിർദേശം, ഒരു ഗവണ്‍മെന്റ്‌ അധികാരസ്ഥാനം പുറപ്പെടുവിക്കുന്ന ഒരു നിയമം എന്നൊക്കെയാണ്‌. ബ്രിട്ടന്റെ ചരിത്രത്തിൽ പല സന്ദർഭങ്ങളിലായി, രാജാവിന്റെയോ പ്രഭുസഭയുടെയോ കോമണ്‍സ്‌ സഭയുടെയോ അനുമതി കൂടാതെ നിലവിൽ കൊണ്ടുവന്നിരുന്ന നിയമങ്ങള്‍ക്ക്‌ ഈ പേര്‌ ഉപയോഗിച്ചിരുന്നു. രാജാധികാരത്തിനു താഴെയുള്ള ചില സ്ഥാനങ്ങള്‍ പുറപ്പെടുവിക്കുന്ന ചില ചട്ടങ്ങളെയും ഓഡിനന്‍സ്‌ എന്നു പറഞ്ഞിരുന്നു. അർഥവും വ്യാപ്‌തിയും. യു.എസ്‌. കോണ്‍ഗ്രസ്‌ അവിടത്തെ "ആർട്ടിക്കിള്‍സ്‌ ഒഫ്‌ കോണ്‍ഫെഡറേഷന്റെ' കീഴിൽ പാസാക്കിയിരുന്ന ചില നിയമങ്ങള്‍ക്കും ഈ പേരു പറഞ്ഞിരുന്നു. ഇന്ത്യന്‍ ഭരണഘടനയനുസരിച്ച്‌ രാഷ്‌ട്രപതിയോ ഗവർണറോ പുറപ്പെടുവിക്കുന്ന താല്‌ക്കാലിക നിയമത്തിനാണ്‌ ഇപ്പോള്‍ ഓഡിനന്‍സ്‌ എന്നു പറയുന്നത്‌.
ഇന്ത്യന്‍ നിയമം. ഇന്ത്യയുടെ രാഷ്‌ട്രപതിക്കുള്ള അധികാരങ്ങളുടെ കൂട്ടത്തിൽ പ്രധാനമായ ഒന്ന്‌, ഭരണഘടനയിലെ 123-ാം അനുച്ഛേദത്തിന്‍കീഴിൽ, പാർലമെന്റിന്റെ ഒഴിവുകാലത്ത്‌ ഓഡിനന്‍സുകള്‍ പുറപ്പെടുവിക്കുന്നതിനുള്ള അധികാരമാണ്‌. പാർലമെന്റിന്റെ ഇരുസഭകളും സമ്മേളനത്തിലായിരിക്കുമ്പോള്‍ ഓഡിനന്‍സുകള്‍ പ്രഖ്യാപിക്കാന്‍ പാടുള്ളതല്ല. 123-ാം അനുച്ഛേദമനുസരിച്ച്‌ താന്‍ സത്വരനടപടി കൈക്കൊള്ളേണ്ട പരിതഃസ്ഥിതികള്‍ ഉണ്ടായിരുന്നാൽ രാഷ്‌ട്രപതിക്ക്‌ ഓഡിനന്‍സുകള്‍ പ്രഖ്യാപിക്കാം. അവയ്‌ക്ക്‌ പാർലമെന്റിന്റെ ഒരു ആക്‌റ്റിനുള്ള പ്രാബല്യവും പ്രഭാവവും ഉണ്ടായിരിക്കുന്നതാണ്‌. എന്നാൽ അങ്ങനെയുള്ള ഓരോ ഓഡിനന്‍സും പാർലമെന്റിന്റെ ഇരുസഭകളിൽ ഓരോന്നിന്റെയും മുമ്പാകെ വയ്‌ക്കേണ്ടതുണ്ട്‌. അത്‌ പാർലമെന്റിന്റെ പുനഃസമ്മേളനം മുതൽ ആറ്‌ ആഴ്‌ച അവസാനിക്കുമ്പോഴോ, ആ കാലാവധി അവസാനിക്കുന്നതിനു മുമ്പ്‌ അതിനെ നിരാകരിച്ചുകൊണ്ടുള്ള പ്രമേയങ്ങള്‍ ഇരുസഭകളാലും പാസ്സാക്കപ്പെടുന്നുവെങ്കിൽ ആ പ്രമേയങ്ങളിൽ രണ്ടാമത്തേത്‌ പാസ്സാക്കപ്പെടുമ്പോഴോ പ്രവർത്തനരഹിതമാകുന്നതാണ്‌. രാഷ്‌ട്രപതിക്ക്‌, താന്‍ പ്രഖ്യാപിച്ച ഓഡിനന്‍സിനെ ഏതു സമയത്തും പിന്‍വലിക്കാം. പാർലമെന്റിന്റെ സഭകള്‍ വ്യത്യസ്‌ത തീയതികളിൽ വീണ്ടും സമ്മേളിക്കാന്‍ വിളിച്ചുകൂട്ടുന്നുവെങ്കിൽ ആറ്‌ ആഴ്‌ചക്കാലം എന്നത്‌ ആ തീയതികളിലെ ഒടുവിലത്തെ തീയതി മുതൽക്കുള്ള ആറ്‌ ആഴ്‌ചക്കാലമായി കണക്കാക്കപ്പെടും. ഈ അനുച്ഛേദത്തിന്‍കീഴിൽ പ്രഖ്യാപിക്കപ്പെടുന്ന ഒരു ഓഡിനന്‍സിൽ, പാർലമെന്റിന്‌, ഈ ഭരണഘടനയുടെ കീഴിൽ അധിനിയമം ചെയ്യാന്‍ ക്ഷമതയില്ലാത്ത ഏതിനെയെങ്കിലും വ്യവസ്ഥ ചെയ്യുന്നുവെങ്കിൽ അത്‌ ശൂന്യമായിരിക്കുന്നതാണ്‌. ഓഡിനന്‍സ്‌ പ്രഖ്യാപിക്കാനുള്ള ഈ വ്യവസ്ഥ, ഗവണ്‍മെന്റ്‌ ഒഫ്‌ ഇന്ത്യാ ആക്‌റ്റ്‌ 1935-ലെ 42-ാം വകുപ്പിന്‍കീഴിൽ ഗവർണർ ജനറലിനു നല്‌കിയിരിക്കുന്ന അധികാരങ്ങള്‍ക്ക്‌ ഏറെക്കുറെ സദൃശമായതാണ്‌. ഈ അധികാരം രാഷ്‌ട്രപതി പ്രയോഗിക്കുന്നത്‌ മന്ത്രിസഭയുടെ ഉപദേശാനുസൃതമായിരിക്കണം.
രാഷ്‌ട്രപതിക്ക്‌ 123-ാം അനുച്ഛേദം നല്‌കുന്ന അധികാരത്തിനു സദൃശമായ അധികാരം, ഒരു സ്റ്റേറ്റിനെ സംബന്ധിച്ചിടത്തോളം, അതിന്റെ ഗവർണർക്കും പ്രയോഗിക്കാവുന്നതാണ്‌. ഗവർണറുടെ നിയമ നിർമാണാധികാരത്തെക്കുറിച്ചു പ്രതിപാദിക്കുന്നത്‌ 213-ാം അനുച്ഛേദത്തിലാണ്‌. ഈ അനുച്ഛേദമനുസരിച്ച്‌ ഒരു സ്റ്റേറ്റിലെ നിയമസഭ സമ്മേളനത്തിലായിരിക്കുമ്പോളൊഴികെയോ, നിയമനിർമാണ മണ്ഡലത്തിന്റെ ഇരുസഭകളും സമ്മേളനത്തിലായിരിക്കുമ്പോളൊഴികെയോ, ഏതെങ്കിലും സമയത്ത്‌, താന്‍ സത്വരനടപടിയെടുക്കുന്നതിനാവശ്യമാകുന്ന പരിതഃസ്ഥിതികളുണ്ടെന്നു ഗവർണർക്കു ബോധ്യമാകുന്നുണ്ടെങ്കിലോ, അപ്പോള്‍ ആവശ്യപ്പെടുന്നുവെന്നു തനിക്കു ബോധ്യമുള്ള ഓഡിനന്‍സുകള്‍ അദ്ദേഹത്തിന്‌ പ്രഖ്യാപിക്കാവുന്നതാണ്‌. എന്നാൽ അങ്ങനെയുള്ള ഓഡിനന്‍സുകള്‍ പ്രഖ്യാപിക്കുന്നതിന്‌ ചില പരിമിതികളുണ്ട്‌. അതിലെ വ്യവസ്ഥകള്‍ അടങ്ങിയ ഒരു ബില്ലിന്‌, അതു നിയമനിർമാണ മണ്ഡലത്തിൽ അവതരിപ്പിക്കാന്‍, ഭരണഘടനയുടെ കീഴിൽ രാഷ്‌ട്രപതിയുടെ മുന്‍കൂട്ടിയുള്ള അനുമതി ആവശ്യമാണെങ്കിൽ, അല്ലെങ്കിൽ അതേ വ്യവസ്ഥകള്‍ അടങ്ങിയ ഒരു ബിൽ രാഷ്‌ട്രപതിയുടെ പരിഗണനയ്‌ക്കു നീക്കിവയ്‌ക്കുന്നത്‌ ആവശ്യമാണെന്ന്‌ അദ്ദേഹം കരുതുന്നുവെങ്കിൽ, അല്ലെങ്കിൽ അതേ വ്യവസ്ഥകള്‍ അടങ്ങിയ ആ സ്റ്റേറ്റിലെ നിയമനിർമാണ മണ്ഡലത്തിന്റെ ഒരു ആക്‌റ്റ്‌ രാഷ്‌ട്രപതിയുടെ പരിഗണനയ്‌ക്കായി നീക്കിവയ്‌ക്കപ്പെട്ടിട്ട്‌ അതിന്‌ രാഷ്‌ട്രപതിയുടെ അനുമതി ലഭിച്ചിരുന്നില്ലെങ്കിൽ, ഈ ഭരണഘടനയുടെ കീഴിൽ അത്‌ അസാധ്യമാകുമായിരുന്നുവെങ്കിൽ ഗവർണർക്ക്‌ രാഷ്‌ട്രപതിയുടെ ആദേശങ്ങള്‍കൂടാതെ ഏതെങ്കിലും ഓഡിനന്‍സ്‌ പ്രഖ്യാപിക്കാന്‍ പാടില്ല. ഇത്തരത്തിലുള്ള ഒരു ഓഡിനന്‍സിന്‌, ഗവർണറുടെ അനുമതി ലഭിച്ചിട്ടുള്ള, സ്റ്റേറ്റിലെ നിയമനിർമാണ മണ്ഡലത്തിന്റെ ഒരു ആക്‌റ്റിനുള്ള പ്രാബല്യവും പ്രഭാവവും തന്നെയുണ്ടായിരിക്കും. എന്നാൽ അങ്ങനെയുള്ള ഓരോ ഓഡിനന്‍സും ആ സ്റ്റേറ്റിലെ നിയമസഭയുടെ മുമ്പാകെയോ, അല്ലെങ്കിൽ ആ സ്റ്റേറ്റിൽ ഒരു നിയമസമിതിയുണ്ടെങ്കിൽ ഇരു സഭകളുടെയും മുമ്പാകെയോ വയ്‌ക്കപ്പെടേണ്ടതും, നിയമനിർമാണ മണ്ഡലത്തിന്റെ പുനഃസമ്മേളനം മുതൽ ആറ്‌ ആഴ്‌ച അവസാനിക്കുമ്പോഴോ, ആ കാലാവധി അവസാനിക്കുന്നതിന്‌ മുമ്പ്‌ അതിനെ നിരാകരിച്ചുകൊണ്ടുള്ള ഒരു പ്രമേയം ആ നിയമസഭയിൽ പാസാക്കപ്പെടുകയും നിയമസമിതിയുണ്ടെങ്കിൽ അതിനാൽ അനുകൂലിക്കപ്പെടുകയും ചെയ്യുന്നുവെങ്കിൽ, അതാതു സംഗതിപോലെ, ആ പ്രമേയം പാസ്സാക്കപ്പെടുമ്പോഴോ നിയമസമിതിയാൽ ആ പ്രമേയം അനുകൂലിക്കപ്പെടുമ്പോഴോ പ്രവർത്തനരഹിതമാകുന്നതാണ്‌. ഗവർണർക്ക്‌ ഒരു ഓഡിനന്‍സ്‌ ഏതു സമയത്തും പിന്‍വലിക്കാവുന്നതാണ്‌. ഒരു നിയമസമിതിയുള്ള സ്റ്റേറ്റിന്റെ നിയമനിർമാണ മണ്ഡലത്തിന്റെ സഭകള്‍ വ്യത്യസ്‌ത തീയതികളിൽ, വീണ്ടും സമ്മേളിക്കാന്‍ വിളിച്ചുകൂട്ടുന്നുവെങ്കിൽ മേല്‌പറഞ്ഞ ആറാഴ്‌ചക്കാലം ആ തീയതികളിൽ ഒടുവിലത്തേതുമുതൽ കണക്കാക്കപ്പെടും. ഇങ്ങനെയുള്ള ഒരു ഓഡിനന്‍സ്‌, ഗവർണറാൽ അനുമതി നല്‌കപ്പെട്ട, സ്റ്റേറ്റിലെ നിയമനിർമാണമണ്ഡലത്തിന്റെ ഒരു ആക്‌റ്റിൽ അധിനിയമം ചെയ്യപ്പെട്ടാൽ സാധുവാകാത്ത ഏതെങ്കിലും വ്യവസ്ഥ ചെയ്യുന്നുവെങ്കിൽ അങ്ങനെ ചെയ്യുന്നിടത്തോളം അതു ശൂന്യമായിരിക്കുന്നതാണ്‌. എന്നാൽ സമവർത്തിലിസ്റ്റിൽ(concurrent list)എണ്ണിപ്പറഞ്ഞിട്ടുള്ള ഒരു വിഷയം സംബന്ധിച്ച പാർലമെന്റിന്റെ ഒരു ആക്‌റ്റിനോ, നിലവിലുള്ള നിയമത്തിനോ വിരുദ്ധമായ, ഒരു സ്റ്റേറ്റിന്റെ നിയമനിർമാണമണ്ഡലത്തിന്റെ ഒരു ആക്‌റ്റിന്റെ പ്രഭാവത്തെ സംബന്ധിക്കുന്ന ഈ ഭരണഘടനയിലുള്ള വ്യവസ്ഥകളുടെ ആവശ്യങ്ങള്‍ക്ക്‌, രാഷ്‌ട്രപതിയുടെ ആദേശങ്ങള്‍ക്ക്‌ അനുസൃതമായി ഈ അനുച്ഛേദത്തിന്‍ കീഴിൽ പ്രഖ്യാപിക്കപ്പെടുന്ന ഒരു ഓഡിനന്‍സ്‌ രാഷ്‌ട്രപതിയുടെ പരിഗണനയ്‌ക്കായി നീക്കിവയ്‌ക്കപ്പെടുകയും അദ്ദേഹത്താൽ അനുമതി നല്‌കപ്പെടുകയും ചെയ്‌തിട്ടുള്ള, ആ സ്റ്റേറ്റിലെ നിയമനിർമാണമണ്ഡലത്തിന്റെ ഒരു ആക്‌റ്റായി കരുതപ്പെടുന്നതാകുന്നു.
ഈ അനുച്ഛേദത്തിന്‍കീഴിൽ ഗവർണർ ഒരു ഓഡിനന്‍സ്‌ പ്രഖ്യാപിക്കുന്നത്‌ മന്ത്രിസഭയുടെ ഉപദേശമനുസരിച്ചായിരിക്കുന്നതാണ്‌. ഗവർണറുടെ ഈ അധികാരം ഗവണ്‍മെന്റ്‌ ഒഫ്‌ ഇന്ത്യാ ആക്‌റ്റ്‌, 1935-ലെ 88-ഉം വകുപ്പിന്‍കീഴിൽ ബ്രിട്ടീഷ്‌ ഇന്ത്യയിലെ ഒരു പ്രവിശ്യാഗവർണർക്കുണ്ടായിരുന്ന അധികാരത്തിന്‌ ഏതാണ്ട്‌ സദൃശമായതാണ്‌. ഏതെങ്കിലും ആവശ്യത്തിന്‌ ഓഡിനന്‍സ്‌ പ്രഖ്യാപിച്ചാൽ താമസിയാതെതന്നെ പാർലമെന്റോ നിയമനിർമാണ മണ്ഡലമോ, അതാതു സംഗതിപോലെ ആ ഓഡിനന്‍സിലെ വ്യവസ്ഥകള്‍ ഉള്‍ക്കൊള്ളിച്ചുകൊണ്ട്‌ സാധാരണഗതിയിലുള്ള ആക്‌റ്റുകള്‍ പാസ്സാക്കുകയാണ്‌ ചെയ്യുന്നത്‌.
(എം. പ്രഭ)
