This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഒറാവോണ്‍
സര്‍വ്വവിജ്ഞാനകോശം സംരംഭത്തില്‍ നിന്ന്
Mksol (സംവാദം | സംഭാവനകള്‍)
(പുതിയ താള്‍: == ഒറാവോണ്‍ == ബിഹാർ, ബംഗാള്‍, ഒഡീഷ എന്നീ സംസ്ഥാനങ്ങളുടെ ചില ഭാഗ...)
അടുത്ത വ്യത്യാസം →
06:49, 15 ജൂണ്‍ 2014-നു നിലവിലുണ്ടായിരുന്ന രൂപം
ഒറാവോണ്‍
ബിഹാർ, ബംഗാള്‍, ഒഡീഷ എന്നീ സംസ്ഥാനങ്ങളുടെ ചില ഭാഗങ്ങളിൽ താമസിക്കുന്ന ഒരു ആദിവാസിവർഗം. ബിഹാറിൽ ഛോട്ടാനാഗ്‌പൂരിലാണ്‌ ഇവരെ ഏറ്റവുമധികം കാണുന്നത്‌. കുറുഖുകള്‍ എന്നു സ്വയം വിളിക്കുന്ന ഈ ജനവിഭാഗം ഗോണ്ഡിയോടും ഡക്കാണിലെ മറ്റു ഗിരിവർഗഭാഷകളോടും സാദൃശ്യമുള്ള ഒറാവോണ്‍ എന്ന ദ്രാവിഡഭാഷയാണ്‌ സംസാരിക്കുന്നത്‌. ഒറാവോണ്‍ വർഗക്കാർ ഒരുകാലത്ത്‌ റോത്താസ്‌ പീഠഭൂമിയിൽ നിവസിച്ചിരുന്നെങ്കിലും മറ്റു ജനവിഭാഗങ്ങള്‍ അവരെ അവിടെനിന്നും ആട്ടിയോടിച്ചു. തത്‌ഫലമായി അവർ ഛോട്ടാനാഗ്‌പൂരിലേക്കു കുടിയേറുകയും മുണ്ഡാഭാഷ സംസാരിക്കുന്ന വർഗക്കാരുടെ പ്രാന്തപ്രദേശങ്ങളിൽ അധിവാസമുറപ്പിക്കുകയും ചെയ്‌തു. 1997-ലെ കണക്കുപ്രകാരം 18,34,000 ആണ്‌ ഒറാവോണ്‍ വർഗക്കാരുടെ ജനസംഖ്യ. ഇവരിൽ നല്ലൊരു ശതമാനം ക്രിസ്‌തുമതത്തിലേക്ക്‌ പരിവർത്തനം ചെയ്യപ്പെട്ടവരാണ്‌. മതപരിവർത്തനം ചെയ്യപ്പെട്ടവർ പൊതുവേ വിദ്യാസമ്പന്നരുമാണ്‌. പട്ടണപ്രദേശങ്ങളിൽ താമസിക്കുന്നവരും ക്രിസ്‌തുമതത്തിലേക്ക്‌ പരിവർത്തനം ചെയ്യപ്പെട്ടവരുമായ ഒറാവോണുകള്‍ തങ്ങളുടെ മാതൃഭാഷയായി ഹിന്ദിയാണ്‌ സ്വീകരിച്ചിട്ടുള്ളത്‌. ജന്തുക്കള്‍, ചെടികള്‍, ധാതുക്കള്‍ തുടങ്ങിയ കുലചിഹ്നങ്ങളുമായി ബന്ധപ്പെടുത്തി ഒറാവോണ്‍ വർഗത്തെ പല ഗോത്രങ്ങളായി തിരിച്ചിട്ടുണ്ട്‌. ഒരേ ഗോത്രത്തിൽപ്പെട്ടവർ പരസ്‌പരം വിവാഹബന്ധത്തിൽ ഏർപ്പെടരുതെന്നാണ്‌ ആചാരം. ഓരോ ഗ്രാമത്തിനും ഓരോ ഗ്രാമത്തലവനും പുരോഹിതനുമുണ്ട്‌. പൗരോഹിത്യത്തിനുള്ള അവകാശം പരമ്പരാഗതമായാണ്‌ ലഭിക്കുക. അടുത്തടുത്തുള്ള ഗ്രാമങ്ങള്‍ കൂട്ടിച്ചേർത്തുണ്ടാക്കിയ ഗ്രാമക്കൂട്ടം "പറ' (Parha) എന്ന പേരിൽ അറിയപ്പെടുന്നു. തെരഞ്ഞെടുക്കപ്പെട്ട ഒരു കൗണ്‍സിലാണ്‌ ഇതിന്റെ ഭരണകാര്യങ്ങള്‍ നിർവഹിക്കുന്നത്‌. സാമൂഹികജീവിതത്തിലെ ഒരു സവിശേഷതയാണ്‌ അവിവാഹിതരായ പുരുഷന്മാർക്കുവേണ്ടി മാത്രമുള്ള ശയ്യാഗൃഹം (dormitory).
ഒറാവോണുകള്‍ പരമ്പരാഗതമായി വിശ്വസിച്ചുപോരുന്ന മതം അനുസരിച്ച്‌ "ധർമേ' ആണ്‌ അവരുടെ പ്രധാന ആരാധനാമൂർത്തി. ചില ദുർദേവതകളും ഇവരുടെ ആരാധനാപാത്രങ്ങളായുണ്ട്‌. ആഭിചാരം, ദുർമന്ത്രവാദം എന്നിവയിൽ ഇവർ അങ്ങേയറ്റം വിശ്വസിക്കുന്നു. ഇവരുടെ മതാനുഷ്‌ഠാനങ്ങളെയും വിശ്വാസത്തെയും ഹിന്ദുമതം സ്വാധീനിച്ചിട്ടുണ്ട്‌. ഒറാവോണുകളുടെ പരമ്പരാഗതമായ മതസമ്പ്രദായത്തിനുള്ളിൽ, ക്രിസ്‌തുമതത്തിൽ നിന്നും ബ്രാഹ്മണമതത്തിൽ നിന്നും പ്രചോദനം ഉള്‍ക്കൊണ്ട്‌ സാമ്പത്തികക്ലേശങ്ങള്‍ പരിഹരിക്കുക, മതപരിഷ്‌കരണം സാധിക്കുക എന്നീ ലക്ഷ്യങ്ങള്‍ മുന്‍നിർത്തി അനവധി നീക്കങ്ങള്‍ നടക്കുകയുണ്ടായി. ആധുനിക വിദ്യാഭ്യാസത്തിന്റെയും സംസ്‌കാരത്തിന്റെയും ആവിർഭാവത്തോടുകൂടി സാക്ഷരത്വം നേടിയ ഒറാവോണുകള്‍ ബംഗാളിന്റെയും ബിഹാറിന്റെയും ഒറീസയുടെയും ഗിരിവർഗപ്രദേശങ്ങള്‍ ചേർത്ത്‌ തങ്ങള്‍ക്കു സ്വയംഭരണാധികാരമുള്ള ഒരു പ്രദേശം അനുവദിച്ചുകിട്ടണമെന്ന്‌ വാദിച്ചുതുടങ്ങിയിട്ടുണ്ട്‌.
