This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഐബീരിയ
സര്‍വ്വവിജ്ഞാനകോശം സംരംഭത്തില്‍ നിന്ന്
Mksol (സംവാദം | സംഭാവനകള്‍)
(പുതിയ താള്‍: == ഐബീരിയ == == Iberia == കാക്കസസ്‌ പർവതനിരകള്‍ക്കു തെക്ക്‌, കരിങ്കടല...)
അടുത്ത വ്യത്യാസം →
18:10, 21 ഏപ്രില്‍ 2014-നു നിലവിലുണ്ടായിരുന്ന രൂപം
ഐബീരിയ
Iberia
കാക്കസസ്‌ പർവതനിരകള്‍ക്കു തെക്ക്‌, കരിങ്കടലിനും കാസ്‌പിയന്‍ കടലിനും ഇടയ്‌ക്കുള്ള ഭൂഭാഗത്ത്‌ നിലവിലിരുന്ന ഒരു പുരാതന രാജ്യം. ബി. സി. 6-4 ശതകങ്ങള്‍ക്കിടയ്‌ക്ക്‌ ഇത്‌ സ്ഥാപിതമായി. ബി. സി. 65 വരെ സ്വതന്ത്രാവസ്ഥയിൽ തുടർന്ന ഐബീരിയയെ റോമന്‍ സൈന്യാധിപനായിരുന്ന പോംപീ (ബി.സി. 106-48) റോമാസാമ്രാജ്യത്തിന്റെ ആധിപത്യത്തിന്‍ കീഴിലാക്കി. എ. ഡി. 5-6 ശതകങ്ങളിലെ ബൈസാന്തിയന്‍-സസ്സാനിയന്‍ അധികാരവടംവലികളിൽ ഐബീരിയയും ഭാഗഭാക്കായിരുന്നു. പില്‌ക്കാലത്ത്‌ പേർഷ്യയിലെ രാജാവായിരുന്ന കോസ്‌റോസ്‌ ക ഐബീരിയയിലെ രാജസ്ഥാനത്തെ അധികാരഭ്രഷ്‌ടമാക്കിയതോടെ ഈ രാജ്യം നാമാവശേഷമായി. 8-ാം ശതകത്തിനുശേഷം ഐബീരിയ പ്രദേശം ജോർജിയയോടു കൂട്ടിച്ചേർത്തു; ഐബീരിയയുടെ പില്‌ക്കാല ചരിത്രം ജോർജിയന്‍ എസ്‌. എസ്‌. ആർ. ചരിത്രത്തിന്റെ ഭാഗമാണ്‌.
ഇന്ന്‌ ഐബീരിയ എന്നു വിളിക്കപ്പെടുന്നത്‌ തെക്ക്‌പടിഞ്ഞാറ്‌ യൂറോപ്പിലെ സ്‌പെയിനും പോർച്ചുഗലും ഉള്‍പ്പെടുന്ന ഉപദ്വീപി (Spanish peninsula) നെയാണ്‌. സ്‌പെയിനിന്റെ ദക്ഷിണപൂർവമേഖലകളെ ചരിത്രാതീതകാലത്ത്‌ അധിവസിച്ചിരുന്ന പ്രാകൃതജനവർഗ (Pre-Celtish Neolithic race) ത്തിന്‌ നരവംശശാസ്‌ത്രജ്ഞന്‍മാർ ഐബീരിയന്‍ എന്ന പേരാണ്‌ നല്‌കിയിട്ടുള്ളത്‌. ഐബീരസ്‌ (Iberus-Ebros)നദിയിൽ നിന്നാണ്‌ ഈ പേർ നിഷ്‌പന്നമായിട്ടുള്ളത്‌. ഇക്കാരണത്താൽ ഈ മേഖലയുള്‍ക്കൊണ്ട ഭൂഭാഗം ഐബീരിയാ ഉപദ്വീപ്‌ എന്നു വിളിക്കപ്പെട്ടു. വിസ്‌തീർണം 580000 ചതുരശ്രകിലോമീറ്ററാണ്‌. സ്‌പാനീഷ്‌ പോർച്ചുഗീസ്‌, കറ്റാലന്‍, ഗലീഷ്യന്‍, ബാസ്‌ക്‌ എന്നിവയാണ്‌ ഇവിടത്തെ പ്രധാനഭാഷകള്‍.
ഐബീരിയാ ഉപദ്വീപിന്റെ അതിർത്തിയിൽ 85 ശതമാനത്തോളം അത്‌ലാന്തിക്‌ സമുദ്രവും മെഡിറ്ററേനിയന്‍ കടലുമാണ്‌; വടക്കേ അതിര്‌ പിരണീസ്‌ പർവതനിരയും. ഉപദ്വീപിന്റെ 70 ശതമാനത്തോളം 610 മീറ്ററിലേറെ ഉയരമുള്ള ഉന്നതമേഖലയാണ്‌. മെസീത എന്നു വിളിക്കപ്പെടുന്ന ഈ പീഠഭൂമി പടിഞ്ഞാറോട്ടും തെക്ക്‌പടിഞ്ഞാറോട്ടും ചാഞ്ഞിറങ്ങുന്ന മട്ടിലാണ്‌ കിടക്കുന്നത്‌. ഇവിടെ ഉദ്‌ഭവിച്ചൊഴുകുന്ന സാമാന്യം ദൈർഘ്യമുളള അഞ്ചു നദീവ്യൂഹങ്ങളുണ്ട്‌. ഉപദ്വീപിന്റെ പകുതിയിലേറെയും സസ്യാവൃതമാണ്‌. തുറസ്സായ കുറ്റിക്കാടുകളും പുൽമേടുകളും കുറവല്ല. കേവലം 10 ശതമാനം പ്രദേശങ്ങളാണ്‌ വനങ്ങളായി ഉള്ളത്‌. ഈ ഉപദ്വീപിന്റെ ഭാഗമായ കേപ്‌റോച്ച ആണ്‌ യൂറോപ്പ്‌ വന്‍കരയുടെ പശ്ചിമാഗ്രം.
