This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇന്ത്യന്‍ ആന്റിക്വറി
സര്‍വ്വവിജ്ഞാനകോശം സംരംഭത്തില്‍ നിന്ന്
Mksol (സംവാദം | സംഭാവനകള്‍)
(പുതിയ താള്‍: == ഇന്ത്യന്‍ ആന്റിക്വറി == പുരാതത്വസംബന്ധിയായ വിഷയങ്ങള്ക്ക്...)
അടുത്ത വ്യത്യാസം →
08:49, 15 മാര്‍ച്ച് 2014-നു നിലവിലുണ്ടായിരുന്ന രൂപം
ഇന്ത്യന്‍ ആന്റിക്വറി
പുരാതത്വസംബന്ധിയായ വിഷയങ്ങള്ക്ക് പ്രതേ്യകപ്രാധാന്യം നൽകി പ്രസിദ്ധപ്പെടുത്തിയിരുന്ന ഒരു വാർഷിക ഗവേഷണപത്രിക. ഭാരതീയദർശനം, ഭാഷ, സാഹിത്യം, മതം, നാടന്‍പാട്ടുകള്‍, നാടന്‍കലകള്‍, നാണയവിജ്ഞാനീയം, നരവംശശാസ്‌ത്രം, ചരിത്രം, ആചാരാനുഷ്‌ഠാനങ്ങള്‍, കല, പുരാണം, പുരാവസ്‌തുശാസ്‌ത്രം, ഭൂമിശാസ്‌ത്രം, ശിലാലിഖിതവിജ്ഞാനീയം എന്നീ വിഷയങ്ങളെക്കുറിച്ചുള്ള ലേഖനങ്ങളും ഗവേഷണപ്രബന്ധങ്ങളുമായിരുന്നു ഇതിലെ ഉള്ളടക്കം. റോയൽ ആന്ത്രാപ്പോളജിക്കൽ ഇന്‍സ്റ്റിറ്റ്യൂട്ട്‌ ഒഫ്‌ ബ്രിട്ടന്റെ ആഭിമുഖ്യത്തിൽ പ്രസിദ്ധീകരണം തുടങ്ങിയ ഇന്ത്യന്‍ ആന്റിക്വറിയുടെ പ്രഥമവാല്യം 1872-ൽ പ്രകാശനം ചെയ്യപ്പെട്ടു. ഭാരതീയദർശനത്തിലും സംസ്‌കാരത്തിലും പാശ്ചാത്യലോകം അതിയായ താത്‌പര്യം കാണിച്ചകാലത്ത്‌ ആരംഭിച്ച ഈ പത്രിക ഇന്തോളജി, ഇന്ത്യന്‍ പുരാവസ്‌തുശാസ്‌ത്രം എന്നീ വിജ്ഞാനശാഖകള്‍ക്കാണ്‌ കൂടുതൽ പ്രാമുഖ്യം നൽകിയത്‌. ഏഷ്യാറ്റിക്‌ സൊസൈറ്റി അംഗം, ബോംബെ സർവകലാശാല ഫെലോ, ഇന്ത്യാ ഗവണ്‍മെന്റിന്റെ പുരാവസ്‌തു സർവേയർ എന്നീ നിലകളിൽ പ്രശസ്‌തനും റോക്ക്‌ ടെമ്പിള്‍സ്‌ ഒഫ്‌ എലിഫന്റ, ടെമ്പിള്‍സ്‌ ഒഫ്‌ ശത്രുഞ്‌ജയാ, ഫോട്ടോഗ്രാഫ്‌സ്‌ ഒഫ്‌ ആർക്കിടെക്‌ചർ ആന്‍ഡ്‌ സീനറി ഇന്‍ ഗുജറാത്ത്‌ ആന്‍ഡ്‌ രജപുട്ടാണ എന്നീ ഗ്രന്ഥങ്ങളുടെ രചയിതാവുമായ ഡോ. ജയിംസ്‌ ബർഗസ്‌ ആയിരുന്നു ഈ പ്രസിദ്ധീകരണത്തിന്റെ ആദ്യത്തെ എഡിറ്റർ. ഇന്തോളജി വിഭാഗത്തിലെ രത്‌നം എന്നുവിശേഷിപ്പിക്കപ്പെട്ടിരുന്ന ഈ പത്രികയുടെ പത്രാധിപരായി ഡോ. ബർഗസിനുശേഷം ജോണ്‍ ഫെയ്‌ത്‌ഫുള്‍ ഫ്‌ളീറ്റ്‌, റിച്ചാഡ്‌ കാർണാക്‌ ടെമ്പിള്‍, പ്രാഫ. ദേവദത്ത രാമകൃഷ്‌ണ ഭണ്ഡാർകർ, സ്റ്റീഫന്‍ മെറെഡിത്ത്‌ എഡേ്വർഡ്‌സ്‌, എസ്‌. കൃഷ്‌ണസ്വാമി അയ്യങ്കാർ, ഇ.എ.ഡബ്‌ള്യു. ഓഡം തുടങ്ങിയ പ്രശസ്‌ത പണ്ഡിതന്മാർ സേവനമനുഷ്‌ഠിച്ചിട്ടുണ്ട്‌. ഇന്ത്യയുടെ ദാർശനികപാരമ്പര്യം, ചരിത്രം, സാഹിത്യം തുടങ്ങിയവയെ പുറംലോകത്തിന്‌ തുറന്നുകൊടുത്ത ഈ ഗവേഷണപത്രികയിലേക്ക്‌ ആദ്യകാലത്ത്‌ ലേഖനങ്ങള്‍ രചിച്ചിരുന്നത്‌ പ്രധാനമായും ബ്രിട്ടീഷ്‌ ഉദ്യോഗസ്ഥരായിരുന്നെങ്കിലും പില്‌ക്കാലത്ത്‌ അനേകം ഇന്ത്യാക്കാരും മറ്റ്‌ യൂറോപ്യരും ഗഹനമായ സംഭാവനകളിലൂടെ ഈ പത്രികയെ സമ്പന്നമാക്കി. പാശ്ചാത്യ-പൗരസ്‌ത്യ സംസ്‌കാരങ്ങള്‍ തമ്മിലുള്ള ആശയവിനിമയം സുഗമമാക്കുന്നതിൽ പ്രധാന പങ്കുവഹിച്ച ഇന്ത്യന്‍ ആന്റിക്വറിയുടെ പ്രസിദ്ധീകരണം 1933-ൽ അവസാനിച്ചു. ഡൽഹിയിലെ ഇന്തോളജിക്കൽ ബുക്ക്‌ റീപ്രിന്റ്‌ കോർപ്പറേഷന്‍ 1872 മുതൽ 1933 വരെ പ്രകാശനം ചെയ്യപ്പെട്ട എല്ലാ വാല്യങ്ങളും അവയുടെ സൂചികയും പുനഃപ്രസിദ്ധീകരിച്ചിട്ടുണ്ട്‌.
