സര്‍വ്വവിജ്ഞാനകോശം സംരംഭത്തില്‍ നിന്ന്

ഡോഡ്ജ് സഹോദരന്മാര്‍

Dodge Brothers

ഓട്ടൊമൊബൈല്‍ എന്‍ജിനീയര്‍മാരായ അമേരിക്കന്‍ സഹോദരന്മാര്‍. ജോണ്‍ ഫ്രാന്‍സിസ് ഡോഡ്ജ് 1864 ഒ. 25-നും ഹൊറേസ് എല്‍ജിന്‍ ഡോഡ്ജ് 1868 മേയ് 17-നും മിഷിഗനിലെ നൈല്‍സില്‍ ജനിച്ചു. ഇവര്‍ അമേരിക്കന്‍ മോട്ടോര്‍ വാഹന നിര്‍മാണ മേഖലയില്‍ നൂതന സാങ്കേതിക രീതികള്‍ പ്രാവര്‍ത്തികമാക്കി. സൈക്കിള്‍, ഓട്ടൊമൊബൈല്‍ ഘടകങ്ങള്‍ എന്നിവയുടെ നിര്‍മാണത്തിനായി മിഷിഗനിലെ ഹാമ്ട്രാമ്കില്‍ 1910-ല്‍ ഡോഡ്ജ് ബ്രദേഴ്സ് കമ്പനി സ്ഥാപിക്കപ്പെട്ടു. ഫോര്‍ഡ്, ഓള്‍ഡ്സ് എന്നീ മോട്ടോര്‍ കമ്പനികള്‍ക്കുവേണ്ടി എന്‍ജിനും ഇതര ഓട്ടൊ സ്പെയറുകളും തയ്യാറാക്കിയ ശേഷം 1913-ഓടെ സ്വന്തം നിലയില്‍ കാറുകള്‍ നിര്‍മിച്ചു തുടങ്ങി. ആദ്യത്തെ ഡോഡ്ജ് മോട്ടോര്‍ വാഹനം 1914 ന. 14-ന് പുറത്തിറക്കി. അമേരിക്കയില്‍ ആദ്യമായി ഉരുക്കുകൊണ്ടുള്ള കാര്‍ വിപണിയിലെത്തിക്കുവാന്‍ സാധിച്ചു എന്ന യശസ്സ് ഇവര്‍ക്കു ലഭിച്ചു.

1.ജോണ്‍ ഫ്രാന്‍സിസ് ഡോഡ്ജ് 2.ഹൊറേസ് എല്‍ജിന്‍ ഡോഡ്ജ്

1920 ജനു. 14-ന് ജോണ്‍ ഫ്രാന്‍സിസ് ഡോഡ്ജും ഡി. 10-ന് ഹൊറേസ് എല്‍ജിന്‍ ഡോഡ്ജും ന്യൂയോര്‍ക്കില്‍ അന്തരിച്ചു. 1928-ല്‍ അമേരിക്കയിലെ ചെസ്ലെര്‍ കോര്‍പ്പറേഷന്‍ സ്വന്തമാക്കിയ ഡോഡ്ജ് കമ്പനി ഇപ്പോഴും സജീവമായി പ്രവര്‍ത്തിച്ചു വരുന്നു.