This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ടൈബര്‍ നദി
സര്‍വ്വവിജ്ഞാനകോശം സംരംഭത്തില്‍ നിന്ന്
ടൈബര്‍ നദി
Tiber river
മധ്യ ഇറ്റലിയിലെ ഒരു നദി. ഈ പ്രദേശത്തെ ഏറ്റവും നീളം കൂടിയ നദിയും ഇറ്റലിയിലെ മൂന്നാമത്തെ നീളം കൂടിയ നദിയുമാണിത്. പൗരാണിക കാലത്ത് ഇതിന്റെ പേര് ടൈബറിസ് (Tiberis) എന്നായിരുന്നു. ആധുനിക ഇറ്റാലിയന്‍ ഭാഷയില്‍ ഇത് ടെവിറെ (Tevere) എന്നാണറിയപ്പെടുന്നത്.
ഫ്ളോറന്‍സിന് 64 കി.മീ. കിഴക്കുമാറി കിഴക്കന്‍ ടസ്കനിയിലുള്ള ആപെനൈയ്ന്‍സിലാണ് നദിയുടെ ഉത്ഭവം. മിക്കവാറും തെക്കന്‍ ദിശയിലേക്കൊഴുകുന്ന നദി അമ്പ്രിയയും (Umbria) ലാറ്റിയ(Latium)മും കടന്ന് റോം നഗരത്തിലൂടെ ഒഴുകി ഓസ്റ്റിയയില്‍ വച്ച് ടൈറീനിയന്‍ കടലില്‍ നിപതിക്കുന്നു.
ചെറുകുന്നുകള്‍ തീര്‍ക്കുന്ന തടങ്ങളിലൂടെയും ഇടുങ്ങിയ താഴ്വാരങ്ങളിലൂടെയുമാണ് ടൈബര്‍ നദിയുടെ ഭൂരിഭാഗവും പ്രവഹിക്കുന്നത്. നദിക്ക് ഏകദേശം 405 കി.മീ. നീളമുണ്ടെങ്കിലും നദീമുഖത്തിനടുത്തായുള്ള കുറച്ചു ഭാഗങ്ങള്‍ മാത്രമേ ഗതാഗതയോഗ്യമായിട്ടുള്ളൂ. ഇവിടെ റോം മുതല്‍ കടല്‍ വരെയുള്ള 32 കി.മീ. ദൂരം ചെറുകപ്പലുകളുള്‍പ്പെടെയുള്ള നൗകകളുടെ ജലഗതാഗതത്തിനായി ഉപയോഗിക്കപ്പെടുന്നു. നദീമുഖത്തിനടുത്തായി ഒരു തുറമുഖവും ഏറെ ദൂരെയല്ലാതെ ഒരു അന്തര്‍ദേശീയ വിമാനത്താവളവും പ്രവര്‍ത്തിക്കുന്നുണ്ട്.
പ്രധാന പോഷകനദിയായ നീറ (Nera) നാര്‍നി (Narni)യ്ക്കടുത്തുവച്ച് ടൈബര്‍ നദിയുമായി ചേരുന്നു. അനീന്‍ (Aniene), ചീയാന (Chiana), പാഗ്ലിയ (Paglia) എന്നിവയാണ് മറ്റു പ്രധാന പോഷകനദികള്‍. ചിയാന നദിയും കനാലും ടൈബര്‍ നദിയെ ആര്‍നോ (Arno) നദിയുമായി ബന്ധിപ്പിക്കുന്നു.
ടൈബര്‍ നദിയിലെ ജലനിരപ്പിന് ഗണ്യമായ ഏറ്റക്കുറച്ചിലുകള്‍ ഉണ്ടാകാറുണ്ട്. മഞ്ഞുകാലത്തിന്റെ അവസാനഘട്ടത്തിലും വസന്തത്തിന്റെ ആദ്യഘട്ടത്തിലും നദിയിലെ ജലനിരപ്പ് ഗണ്യമായി ഉയരുകയാണ് പതിവ്. എന്നാല്‍ വേനല്‍ക്കാലമാവുമ്പോഴേക്കും നദി മിക്കവാറും വരണ്ട നിലയിലായിരിക്കും. മുമ്പു റോമിനു താഴെ വരുന്ന നദീഭാഗങ്ങളില്‍ വിസ്തൃതങ്ങളായ ചതുപ്പുനിലങ്ങള്‍ ഉണ്ടായിരുന്നു. എന്നാല്‍ 1800-കളുടെ അവസാനത്തോടെ ഇവയിലെ ജലം വറ്റിച്ച് കൃഷിക്ക് അനുയോജ്യമാക്കി മാറ്റി. നദീമുഖത്തിനടുത്തായി കൈവഴികള്‍ക്കിടയിലുള്ള ഭൂഭാഗം 'വിശുദ്ധ ദ്വീപ് (Sacred Island) എന്നും 'വീനസിന്റെ ദ്വീപ്' (Island of Venus) എന്നും അറിയപ്പെട്ടിരുന്നു.
