This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഈസ്റ്റ്‌മാന്‍, ജോർജ്‌ (1854 - 1932)
സര്‍വ്വവിജ്ഞാനകോശം സംരംഭത്തില്‍ നിന്ന്
ഈസ്റ്റ്‌മാന്‍, ജോർജ്‌ (1854 - 1932)
Eastman, George
യു.എസ്‌. വ്യവസായ പ്രമുഖന്‍. ന്യൂയോര്‍ക്കിലെ വാട്ടര്‍ വില്ലയില്‍ 1854 ജൂല. 12-ന്‌ ജനിച്ചു. സ്‌കൂള്‍ വിദ്യാഭ്യാസത്തിനുശേഷം ഒരു ഇന്‍ഷ്വറന്‍സ്‌ കമ്പനിയില്‍ കുറച്ചുകാലം ജോലി ചെയ്‌തിരുന്നു. ഫോട്ടോഗ്രാഫിക്‌ പദാര്‍ഥങ്ങള്‍, ക്യാമറകള്‍ എന്നിവയുടെ നിര്‍മാണത്തില്‍ പല നൂതനസാങ്കേതിക മാര്‍ഗങ്ങളും ആവിഷ്‌കരിച്ച ഈസ്റ്റ്‌മാന്‍ 1880-ല്‍ ഫോട്ടോഗ്രാഫിക്ക്‌ ആവശ്യമായ ഡ്രപ്ലേറ്റുകളുണ്ടാക്കുന്നതിനുള്ള ഒരു സാങ്കേതിക പ്രക്രിയ കണ്ടുപിടിച്ചു. തുടര്‍ന്ന്‌ വ്യാവസായികാടിസ്ഥാനത്തില്‍ ഡ്രപ്ലേറ്റുകളുടെ നിര്‍മാണം തുടങ്ങി. 1884-ല്‍ ഇദ്ദേഹത്തിന്റെ "ദി ഈസ്റ്റ്‌മാന്‍ ഡ്രപ്ലേറ്റ്‌ ആന്‍ഡ്‌ ഫിലിം കമ്പനി' നിര്‍മിച്ച കൊഡാക്‌ ക്യാമറ 1888-ല്‍ വില്‌പനയ്‌ക്കെത്തി. 1927 ആയപ്പോഴേക്കും യു.എസ്സിലെ ഫോട്ടോഗ്രാഫിക്‌ വ്യവസായം ഇദ്ദേഹത്തിന്റെ കുത്തകയായിത്തീര്‍ന്നു. സുതാര്യഫിലിമി (transparent film)ന്റെ ആവിഷ്‌കര്‍ത്താവ്‌ എന്ന നിലയില്‍ ഈസ്റ്റ്‌മാന്‍ പ്രശസ്‌തനായി. ഉത്‌പാദനത്തില്‍ തൊഴിലാളികളുടെ കഴിവു മുഴുവന്‍ പ്രയോഗിക്കുന്നതിനുവേണ്ടി അവര്‍ക്ക്‌ ലാഭവിഹിതം നല്‌കുന്ന സമ്പ്രദായം ആദ്യമായി നടപ്പാക്കിയത്‌ ഇദ്ദേഹമാണ്‌. 1924-ല്‍ സമ്പാദ്യത്തിന്റെ നേര്‍പ്പകുതി റോച്ചസ്റ്റര്‍ സര്‍വകലാശാല മുതലായ വിദ്യാഭ്യാസസ്ഥാപനങ്ങള്‍ക്കും മനുഷ്യസ്‌നേഹപരമായ പ്രവര്‍ത്തനങ്ങള്‍ക്കും ഈസ്റ്റ്‌മാന്‍ വിട്ടുകൊടുത്തു. വ്യവസായപ്രമുഖന്‍, മഹാനായ ഒരു മനുഷ്യസ്‌നേഹി എന്നീ നിലകളില്‍ ഇദ്ദേഹം സമാദരണീയനാണ്‌. 1932 മാ. 14-ന്‌ ഈസ്റ്റ്‌മാന്‍ അജ്ഞാതകാരണത്താല്‍ ആത്മഹത്യ ചെയ്‌തു.
