This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇന്നസ്‌, ജോർജ്‌ (1825 - 94)
സര്‍വ്വവിജ്ഞാനകോശം സംരംഭത്തില്‍ നിന്ന്
ഇന്നസ്‌, ജോര്‍ജ്‌ (1825 - 94)
Inness, George
യു.എസ്‌. ചിത്രകാരന്‍. 1825-ല്‍ ന്യൂയോര്‍ക്കിലെ ന്യൂബര്‍ഗിനു സമീപം ജനിച്ചു. അമേരിക്കന്‍വന്‍കരയുടെ ഭൂമിശാസ്‌ത്രപരമായ ചിത്രങ്ങളും, ഭൂദൃശ്യങ്ങളും വസ്‌തുനിഷ്‌ഠമായും സ്‌പഷ്‌ടമായും വരയ്‌ക്കുന്നതില്‍ പ്രഗല്‌ഭരായിരുന്ന "ഹഡ്‌സണ്‍റിവര്‍ സ്‌കൂള്‍' ചിത്രകാരന്മാരുടെ തലമുറയില്‍പ്പെട്ടയാളാണ്‌ ഇന്നസ്‌. 1841-ല്‍ ഷെര്‍മന്‍ ആന്‍ഡ്‌ സ്‌മിത്ത്‌ എന്ന ഭൂപടനിര്‍മാണസ്ഥാപനത്തില്‍ പ്രായോഗികപരിശീലനം നേടുവാനായി ചേര്‍ന്ന ഇന്നസ്‌ തുടര്‍ന്ന്‌ ഫ്രഞ്ചു ചിത്രകാരനായ റെജിഫ്രാന്‍സ്വാ ഗിഗ്നോയുടെ സ്റ്റുഡിയോവില്‍ ജോലിയില്‍ പ്രവേശിച്ചു (1844). 1850-കളില്‍ യൂറോപ്പില്‍ പര്യടനം നടത്തിയ ഇദ്ദേഹത്തിന്‌ ഷീന്‍ബാപ്‌റ്റിസ്‌ത്‌ കാമല്‍കൊറൊട്‌, ഷീന്‍ഫ്രാന്‍സ്വാ മില്ലെ എന്നീ ബാര്‍ബിസണ്‍ ചിത്രകാരന്മാരുമായി ബന്ധപ്പെടാനും അവരുടെ കലാരൂപങ്ങള്‍ അടുത്തറിയാനും അവസരമുണ്ടായി. അവരുടെ കൃതികളെ ഇന്നസ്‌ ആദരിച്ചിരുന്നുവെങ്കിലും അവരുടെ ശൈലി അനുകരിക്കാതിരിക്കാന്‍ പ്രത്യേകം ശ്രദ്ധിച്ചിരുന്നു.
ഭൂദൃശ്യങ്ങള്‍ വരയ്‌ക്കുമ്പോള്‍ ഭൂമിശാസ്‌ത്രപരമായ വിശദീകരണത്തെക്കാള്‍ ദേശാഭിമാന വ്യഞ്‌ജകമായ പ്രതിപാദനമാണ്‌ ഇന്നസ്‌ ലക്ഷ്യമാക്കിയിരുന്നത്‌. തോമസ്‌ കോള്‍, ആഷെര്‍ ബി. ഡുറന്റ്‌, ഫ്രെഡറിക്‌ചര്‍ച്ച്‌ എന്നീ റിവര്‍സ്‌കൂള്‍ പ്രതിനിധികളുടെ സംഭാവനയായ നൈസര്‍ഗികത (naturalism) ഇന്നസ്‌ സ്വായത്തമാക്കി. ഇന്നസിന്റെ "പീസ്‌ ആന്‍ഡ്‌ പ്ലെന്റി' എന്ന ചിത്രം (1865) ഹഡ്‌സണ്‍റിവര്‍ സ്‌കൂളുമായുള്ള ഇദ്ദേഹത്തിന്റെ ബന്ധത്തെ സൂചിപ്പിക്കുന്നു. ഈ ചിത്രത്തില്‍ യു.എസ്സിലെ വിസ്‌തൃതവും മനോഹരവുമായ കൃഷിസ്ഥലങ്ങള്‍ ചിത്രീകരിച്ചിട്ടുണ്ട്‌. ഇംപ്രഷനിസ്റ്റ്‌ സിദ്ധാന്തങ്ങളെ എതിര്‍ത്തിരുന്നുവെങ്കിലും ദേശീയകലയില്‍ ഇംപ്രഷനിസത്തിനുള്ള സ്വാധീനത മുന്‍കൂട്ടിക്കണ്ടത്‌ ഇന്നസാണ്‌. "സണ്‍സെറ്റ്‌ ഇന്‍ ദ വുഡ്‌സ്‌' ഇദ്ദേഹത്തിന്റെ അവസാനത്തെ രചനയാണ്‌. പച്ചപ്പുല്ലുകൊണ്ട്‌ നിറഞ്ഞ ഒരു വനത്തിലെ സായംസന്ധ്യയാണ്‌ ഈ ചിത്രത്തിന്റെ വിഷയം. റിയലിസം, ഹഡ്‌സണ്‍ റിവര്‍സ്‌കൂള്‍ ശൈലി എന്നിവയില്‍നിന്നൊക്കെ വ്യത്യസ്‌തമായ ഒരു പ്രത്യേക ശൈലി ഇന്നസിന്‌ ഉണ്ടായിരുന്നുവെന്ന്‌ ഈ ചിത്രം തെളിയിക്കുന്നു.
1894-ല്‍ സ്‌കോട്ട്‌ലന്‍ഡില്‍ നിര്യാതനായി.
