This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇനായത്തുള്ളാഖാന്‍ മഷ്‌രിഖി (1888 - 1963)
സര്‍വ്വവിജ്ഞാനകോശം സംരംഭത്തില്‍ നിന്ന്
ഇനായത്തുള്ളാഖാന്‍ മഷ്‌രിഖി (1888 - 1963)
ഇന്ത്യന്‍ ദേശീയ നേതാവ്‌. അല്ലാമ മഷ്‌രിഖി എന്ന പേരിലാണ്‌ അദ്ദേഹം അറിയപ്പെട്ടിരുന്നത്‌. അത്താമുഹമ്മദിന്റെ പുത്രനായി 1888 ആഗ. 25-ന്‌ അമൃതസരസ്സിലെ ഒരു പത്താന്‍ കുടുംബത്തില്‍ ജാതനായി. 19-ാമത്തെ വയസ്സില്‍ പഞ്ചാബ്‌ സര്‍വകലാശാലയില്‍നിന്നും ഗണിതശാസ്‌ത്രത്തില്‍ എം.എ.ബിരുദം നേടി. ഉപരിപഠനാര്‍ഥം ഇംഗ്ലണ്ടിലെത്തിയ ഇനായത്തുള്ളഖാന്‌ 1908-ല്‍ സ്‌കോളര്‍ഷിപ്പ്‌ ലഭിച്ചു. 1911-ല്‍ പൗരസ്‌ത്യഭാഷകളില്‍ ട്രിപ്പോസും (tripos), 1912-െല്‍ മെക്കാനിക്കല്‍ ട്രിപ്പോസും നേടി. ഇംഗ്ലണ്ടില്‍നിന്ന്‌ തിരിച്ചെത്തിയ ഇനായത്തുള്ള 1913-ല്‍ ഇസ്‌ലാമിക്‌ കോളജിന്റെ വൈസ്‌ പ്രിന്‍സിപ്പലായി ചാര്‍ജെടുത്തു. രണ്ടുകൊല്ലത്തിനകം അവിടത്തെ പ്രിന്‍സിപ്പലായി. 1922-ല്‍ വ.പ. അതിര്‍ത്തി പ്രവിശ്യയിലെ ഗവണ്‍മെന്റ്‌ ട്രയിനിംഗ്‌ കോളജിന്റെ പ്രിന്‍സിപ്പലായി നിയമിതനായി. 1931 വരെ ആ പദവി വഹിച്ചു.
1926-ല്‍ കെയിറോയില്‍ച്ചേര്‍ന്ന ഇസ്‌ലാമിക്ക്‌ സമ്മേളനത്തില്‍ ഇനായത്തുള്ളാഖാന്‍ അനൗദ്യോഗികമായി ഇന്ത്യയെ പ്രതിനിധീകരിച്ചു. 1931-ല്‍ അദ്ദേഹം "ഖക്‌സാര്‍' (ദൈവഭൃത്യന്‍) സംഘടന രൂപവത്‌കരിച്ചു. ഇന്ത്യന്‍ നാഷണല്‍ കോണ്‍ഗ്രസിനെ അദ്ദേഹം എതിര്‍ത്തു. അക്രമരാഹിത്യസമരത്തില്‍ക്കൂടി വിജയം കൈവരിക്കുമോ എന്ന കാര്യത്തിലും അദ്ദേഹം സംശയാലുവായിരുന്നു; മുസ്‌ലിം ലീഗിലും അദ്ദേഹം വിശ്വസിച്ചിരുന്നില്ല. മുസ്‌ലിം ദേശീയതയുടെ ഒരു വക്താവായിരുന്ന അദ്ദേഹം പാവപ്പെട്ടവര്‍ക്കും തൊഴിലാളിവര്‍ഗത്തിനും വേണ്ടി വാദിച്ചു; മുതലാളിത്തത്തെ അതിനിശിതമായി വിമര്‍ശിച്ചു. ഇസ്‌ലാമിക സോഷ്യലിസത്തിന്റെ പ്രചാരകനായിരുന്ന അദ്ദേഹത്തിന്റെ കക്ഷിയുടെ അടയാളം "മണ്‍വെട്ടി' ആയിരുന്നു. 1939-ലും 1940-43 കാലത്തും അദ്ദേഹം ജയിലില്‍ അടയ്‌ക്കപ്പെട്ടു. 1940-നുശേഷം അദ്ദേഹം ഹിന്ദു-മുസ്‌ലിം മൈത്രിയുടെ പ്രചാരകനായി മാറി. കോണ്‍ഗ്രസുമായി മാന്യമായ ഒത്തുതീര്‍പ്പിലെത്താന്‍ മുഹമ്മദാലി ജിന്നയെ അദ്ദേഹം ഉപദേശിച്ചിരുന്നു. അദ്ദേഹം 1963 ആഗ. 25-ന്‌ പാകിസ്‌താനില്‍വച്ച്‌ അന്തരിച്ചു.
