This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇത്തക്ക
സര്‍വ്വവിജ്ഞാനകോശം സംരംഭത്തില്‍ നിന്ന്
ഇത്തക്ക
യവനേതിഹാസങ്ങളില്‍ പരാമൃഷ്‌ടമായതും ആധുനിക ഗ്രീസിന്റെ അധികാരാതിര്‍ത്തിയില്‍പ്പെടുന്നതുമായ ഒരു ദ്വീപ്‌. ഇത്‌ അയോണിയന്‍ ദ്വീപസമൂഹത്തില്‍പ്പെടുന്നു. യു.എസ്സിലെ ഒരു നഗരവും ഈ പേരില്‍ അറിയപ്പെടുന്നു.
1. ഹോമറിന്റെ ഒഡിസ്സിയിലെ കഥാനായകന്റെ ജീവിതവുമായി ബന്ധപ്പെട്ട ഭൂവിഭാഗമെന്നനിലയില്‍ പ്രസിദ്ധമായ ഇത്തക്ക അയോണിയന്‍ ദ്വീപസമൂഹങ്ങളില്‍ ഉള്‍പ്പെട്ട ഒന്നാണ്‌. ഇക്കൂട്ടത്തിലുള്ള മറ്റ്‌ ആറ്‌ ദ്വീപുകളും "ഉഷസ്സിന്റെയും സൂര്യന്റെയും നേരെ നോക്കിയിരിക്കുന്നവ'യാണെങ്കില്‍ ഇത്തക്കാ "ഏറ്റവും അകലെ ഇരുട്ടിന്റെ തൊട്ടടുത്ത്‌' സ്ഥിതിചെയ്യുന്നുവെന്നാണ്‌ ഹോമര്‍ പറയുന്നത്‌. കല്‌പനാസുന്ദരമായി ഒഡീസ്സിയില്‍ വര്‍ണിതമായ ഈ ദ്വീപായിരുന്നു ഒഡിസ്യുസിന്റെ ആസ്ഥാനം. ടെലമാക്കസിന്റെ കാമുകന്മാര്‍ ഈ ദ്വീപില്‍ ഒരു ഭാഗത്ത്‌ ഒളിച്ചിരുന്നു. ഈ ദ്വീപിനെയും ഇവിടെയുള്ള ചില പ്രദേശങ്ങളെയും പുരാണസംഭവങ്ങളുമായി കൂട്ടിയിണക്കാനുള്ള പുരാവസ്‌തുശാസ്‌ത്രജ്ഞന്മാരുടെ ശ്രമങ്ങള്‍ തുടര്‍ന്നുകൊണ്ടിരിക്കുന്നതേയുള്ളൂ. ബ്രിട്ടിഷ്‌ പുരാവിത്തുകള്‍ നടത്തിയ ഉത്‌ഖനനങ്ങളുടെ ഫലമായി ബി.സി. 800-നോടടുപ്പിച്ച്‌ ഇവിടെ കൊരിന്ത്യന്‍ അധിവാസം പ്രബലമായിരുന്നതായി തെളിഞ്ഞിട്ടുണ്ട്‌. "ഫാന്‍', "വാല്‍ഡികം പേറ്‌', "തിയാകി' എന്നീ പേരുകളിലായിരുന്നു ഇത്തക്കായ്‌ക്കുള്ള പ്രാചീനകാലപ്രശസ്‌തി.
ആധുനികകാലത്ത്‌ ഗ്രീക്ക്‌ഭാഷയില്‍ "ഇതക' എന്ന്‌ വിളിച്ചുവരുന്ന ഈ ദ്വീപിന്റെ വിസ്‌തീര്‍ണം ഏതാണ്ട്‌ 60 ച.കി.മീ. ആണ്‌. ദ്വീപില്‍ ഉടനീളം വ്യാപിച്ചിരിക്കുന്ന രണ്ടു പര്‍വതപങ്‌ക്തികളും ഇവയ്‌ക്കിടയിലുള്ള താഴ്‌വരയും ചേര്‍ന്ന ഈ ചെറുദ്വീപില്‍ ഇത്തക്കി എന്ന പേരോടുകൂടിയ ഒരു തുറമുഖവുമുണ്ട്‌. കൃഷിയോഗ്യമല്ലാത്ത ഈ ഭൂമിയില്‍ കുറഞ്ഞതോതില്‍ ഉത്‌പാദിപ്പിക്കപ്പെടുന്ന ഒലിവെച്ചയും വീഞ്ഞും കയറ്റി അയച്ചാണ്‌ ഈ ദ്വീപവാസികള്‍ ഭക്ഷ്യപദാര്‍ഥങ്ങള്‍ പകരംനേടുന്നത്‌.
1953-ലുണ്ടായ ഒരു ഭൂകമ്പത്തിന്റെ ഫലമായി അയോണിയന്‍ ദ്വീപസമൂഹം മിക്കവാറും തകര്‍ന്നെങ്കിലും ഏതാനും പട്ടണങ്ങള്‍ അവിടെ വീണ്ടും നിര്‍മിക്കപ്പെട്ടിട്ടുണ്ട്‌. (നോ: അയോണിയന്‍ ദ്വീപുകള്‍)
2. യു.എസ്സില്‍ ന്യൂയോര്‍ക്ക്‌ നഗരത്തിന്റെ ഭാഗമായ ഒരു പട്ടണം. 1862-ല്‍ സ്ഥാപിതമായ കോര്‍ണല്‍ സര്‍വകലാശാലയുടെ ആസ്ഥാനം ഇത്തക്കയിലാണ്‌.
