This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.

Reading Problems? see Enabling Malayalam

അസിഡൊഫിലസ് പാല്‍

സര്‍വ്വവിജ്ഞാനകോശം സംരംഭത്തില്‍ നിന്ന്

അസിഡൊഫിലസ് പാല്‍

Acidophilus milk

ഒരു പാല്‍ ഉത്പന്നം. ലാക്ടൊബാസിലസ് അസിഡൊഫിലസ് (Lactobacillus acidophilus) എന്ന ഇനം ബാക്ടീരിയ ഉപയോഗിച്ചു പുളിപ്പിച്ചെടുക്കുന്ന പാല്. പാലിന്റെ പരിരക്ഷണത്തിനുവേണ്ടി (preservation) നടത്തുന്ന ഒരു പ്രക്രിയയാണ് ഇത്. ഭക്ഷ്യസാധനങ്ങള്‍ ചീഞ്ഞളിഞ്ഞു കെട്ടുപോകാതിരിക്കാന്‍ പല പരിരക്ഷണമാര്‍ഗങ്ങളുണ്ട്-ചൂടാക്കുക, തണുത്ത അറകളില്‍ സൂക്ഷിക്കുക, തണുപ്പിച്ചു മരവിപ്പിക്കുക, രാസവസ്തുക്കളുപയോഗിക്കുക, ഉണക്കി ജലാംശം കളയുക എന്നിങ്ങനെ. ഈ അനേകമാര്‍ഗങ്ങളുള്ളതില്‍ പാലിനു പറ്റിയ ഒരു മാര്‍ഗമാണ് പുളിപ്പിക്കല്‍ അഥവാ കിണ്വനം (fermentation). പുളിപ്പിക്കുന്നതിന് അനുയോജ്യമായ ഓര്‍ഗാനിക് അമ്ളങ്ങള്‍ ഉപയോഗിക്കാം-വിശേഷിച്ചും ലാക്ടിക് ആസിഡ്. അമ്ലത്തിനു പകരം മേല്‍ പ്രസ്താവിച്ച തരം ബാക്ടീരിയത്തിന്റെ സംവര്‍ധലായനി (culture solution) ചേര്‍ത്താലും മതി. ബാക്ടീരിയ ഉത്പാദിപ്പിക്കുന്ന അമ്ളമാണ് പാലിനെ പുളിപ്പിക്കുന്നത്. പദാര്‍ഥങ്ങളെ ചീഞ്ഞ് അളിയിക്കുന്ന അണുജീവികള്‍ക്കു അമ്ളസാന്നിധ്യത്തില്‍ ജീവിക്കാന്‍ സാധ്യമല്ലാത്തതിനാല്‍ പാല് കേടുവരാതെ ഈ പ്രക്രിയമൂലം പരിരക്ഷിക്കപ്പെടുന്നു. പാസ്ചറൈസേഷന്‍ നടത്തിയ പാലില്‍ ശുദ്ധമായ ബാക്ടീരിയ-സംവര്‍ധലായനി ചേര്‍ത്തു 37.8°C-ല്‍ ഇരുപത്തിനാലു മണിക്കൂര്‍ സൂക്ഷിച്ച് അസിഡൊഫിലസ് പാല്‍ ലഭ്യമാക്കുന്നു. ലാക്ടോസ് അല്ലെങ്കില്‍ ഗ്ളൂക്കോസ് ചേര്‍ത്തു കുപ്പികളിലാക്കി ഇത് തണുപ്പിച്ചുവയ്ക്കുന്നു.

യോഹര്‍ട്ട് (Yogurt) ഉണ്ടാക്കുന്നതും ഈ ബാക്ടീരിയ ഉപയോഗിച്ചു പാല്‍ പുളിപ്പിച്ചാണ്. മറ്റൊരിനം പുളിപ്പിച്ച പാലാണ് മോര്. പാല് പുളിപ്പിച്ചു പരിരക്ഷിക്കപ്പെടുന്ന സമ്പ്രദായത്തിനു വളരെ പഴക്കമുണ്ട്. ഒരിടത്തു സ്ഥിരമായി താമസിക്കാതെ സഞ്ചാരശീലരായി ജീവിച്ചിരുന്ന ആട്ടിടയന്‍മാര്‍ക്കും മാട്ടിടയന്‍മാര്‍ക്കും ഏതെങ്കിലും ഒരു ക്ഷീരസംരക്ഷണോപായം പ്രാവര്‍ത്തികമാക്കാതെ നിവൃത്തിയില്ലാതിരുന്നതുകൊണ്ടാണ് ഈ രീതിക്കു പഴക്കം കാണുന്നത്. മാത്രമല്ല, പുളിപ്പിച്ച പാലിന് ആരോഗ്യസംവര്‍ധകത്വവും ഉള്ളതായി പരീക്ഷണങ്ങള്‍ തെളിയിച്ചിരിക്കുന്നു. ജീവകം സി, ജീവകം ബി. കോംപ്ളെക്സ് എന്നിവ സാധാരണ പാലിലുള്ളതിനെക്കാള്‍ അസിഡൊഫിലസ് പാലില്‍ അധികമുണ്ടായിരിക്കും. കുടല്‍രോഗികളെ ചികിത്സിക്കുമ്പോള്‍ ഇത്തരം പാല് ഭക്ഷിക്കാന്‍ നിര്‍ദേശിക്കാറുണ്ട്. നോ: ഭക്ഷ്യപരിരക്ഷണം

താളിന്റെ അനുബന്ധങ്ങള്‍
സ്വകാര്യതാളുകള്‍