This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
അല്‍മോറ
സര്‍വ്വവിജ്ഞാനകോശം സംരംഭത്തില്‍ നിന്ന്
അല്‍മോറ
ഉത്തരാഞ്ചല്‍ സംസ്ഥാനത്തിന്റെ വടക്കേ അതിര്‍ത്തിയില്‍ സ്ഥിതിചെയ്യുന്ന ഒരു ജില്ലയും അതിന്റെ ആസ്ഥാനനഗരവും. ഡല്‍ഹിക്ക് 256 കി.മീ. വ.കിഴക്കായി കുമായോണ്‍ മലകളുടെ താഴ്വാരത്തില്‍ സമുദ്രനിരപ്പില്‍നിന്ന് സു. 1,650 മീ. ഉയരത്തില്‍ സ്ഥിതിചെയ്യുന്നു. എ.ഡി. 1560-ല്‍ കുമാവു വംശത്തിലെ കല്യാണ്‍ചന്ദ് എന്ന രാജാവാണ് ഈ നഗരം സ്ഥാപിച്ചത്. വളരെക്കാലം പ്രസ്തുത രാജവംശത്തിന്റെ ആസ്ഥാനം ഇവിടെത്തന്നെയായിരുന്നു. ഉയര്‍ന്നു കാണുന്ന മലകള്‍ നഗരത്തിന്റെ പ്രകൃതിസൗന്ദര്യം വര്‍ധിപ്പിക്കുന്നു; ഓരോ മലമുകളിലും ക്ഷേത്രങ്ങള്‍ നിര്‍മിക്കപ്പെട്ടിട്ടുണ്ട്. ഒരു കോളജ് ഉള്‍പ്പെടെ നിരവധി വിദ്യാലയങ്ങളും ഒരു സുഖവാസകേന്ദ്രവും സന്ന്യാസിമഠങ്ങളും ഈ നഗരത്തിലുണ്ട്. ജവാഹര്‍ലാല്‍ നെഹ്റു തുടങ്ങിയുള്ള അനവധി സ്വാതന്ത്ര്യ‌സമരസേനാനികളെ പാര്‍പ്പിച്ചിരുന്ന ഒരു ജയിലും ഇവിടെ ഉണ്ട്. 1815-ല്‍ ബ്രിട്ടീഷ് ഗവണ്‍മെന്റും നേപ്പാളും തമ്മില്‍ ഒരു യുദ്ധം ഇവിടെവച്ച് നടന്നു.
കുമായോണ്‍ ഡിവിഷനില്‍ ഉള്‍പ്പെട്ട അല്‍മോറജില്ല, ഗംഗാ, ഘാഘ്‍ര എന്നീ നദികളുടെ തടപ്രദേശം ഉള്‍ ക്കൊള്ളുന്നു. മലകള്‍നിറഞ്ഞ് നിമ്നോന്നത ഭൂപ്രകൃതിയാണ് ഈ പ്രദേശത്തിനുള്ളത്. വിസ്തീര്‍ണം 7,026 ച. കി.മീ; ജനസംഖ്യ 8,24,184 (1991). ഗോതമ്പ്, നെല്ല്, പഞ്ഞപ്പുല്ല് (റാഗി) തുടങ്ങിയവ ഈ പ്രദേശത്തു കൃഷി ചെയ്യപ്പെടുന്നു. തേയിലത്തോട്ടങ്ങളും ധാരാളമുണ്ട്. വടക്കന്‍പ്രദേശങ്ങള്‍ മഞ്ഞുമൂടിക്കിടക്കുന്നു. ചെമ്പ്, ഇരുമ്പ് എന്നീ ലോഹങ്ങളുടെ അയിര്‍നിക്ഷേപങ്ങള്‍ ഇവിടെ കണ്ടെത്തിയിട്ടുണ്ട്. റാണിഘട്ട് സാനിട്ടോറിയവും മായാവതി ആശ്രമവും ഈ ജില്ലയില്‍ സ്ഥിതിചെയ്യുന്നു. പ്രസിദ്ധ ഭാരതീയ നര്‍ത്തകനായ ഉദയശങ്കര്‍ സ്ഥാപിച്ചിട്ടുള്ള (1936) ഒരു നൃത്തകലാകേന്ദ്രവും ഇവിടെ ഉണ്ട്.
