സര്‍വ്വവിജ്ഞാനകോശം സംരംഭത്തില്‍ നിന്ന്
അഗസ്റ്റിന്‍ ജോസഫ് (1910 - 65)
മലയാള നാടക-സിനിമാ നടനും സംഗീതജ്ഞനും സിനിമാ പിന്നണി ഗായകനും. പ്രശസ്ത മലയാള സിനിമാ പിന്നണിഗായകനായ യേശുദാസിന്റെ പിതാവായ ഇദ്ദേഹം 1910 മാ. 24-ാം തീയതി അഗസ്തിയുടേയും ത്രേസ്യാമ്മയുടേയും പുത്രനായി മട്ടാഞ്ചേരിയില്‍ ജനിച്ചു. കര്‍ണാടക സംഗീതത്തില്‍ അവഗാഹം നേടിയ അഗസ്റ്റിന്‍ ജോസഫ് ഓച്ചിറ പരബ്രഹ്മോദയം നാടകസഭയിലൂടെ നടനായി അഭിനയരംഗത്ത് എത്തി. സഭ അവതരിപ്പിച്ച കരുണ എന്ന നാടകത്തിലെ അഗസ്റ്റിന്‍ ജോസഫിന്റെ അഭിനയം ശ്രദ്ധേയമായിരുന്നു. തുടര്‍ന്ന് നിരവധി നാടകസഭകളില്‍ അഭിനയിച്ച ഇദ്ദേഹം നല്ലതങ്ക, വേലക്കാരന്‍ തുടങ്ങിയ മലയാള ചലച്ചിത്രങ്ങളില്‍ അഭിനയിക്കുകയും ചില ചിത്രങ്ങള്‍ക്കുവേണ്ടി ഗാനങ്ങള്‍ ആലപിക്കുകയും ചെയ്തു. 1965 ഫെ. 3-ന് ചെന്നൈയില്‍ അന്തരിച്ചു.
