This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുബേരന്‍
സര്‍വ്വവിജ്ഞാനകോശം സംരംഭത്തില്‍ നിന്ന്
Mksol (സംവാദം | സംഭാവനകള്‍)
(പുതിയ താള്‍: == കുബേരന്‍ == ഹൈന്ദവവിശ്വാസപ്രകാരം അഷ്‌ടദിക്‌പാലകന്മാരിൽ വട...)
അടുത്ത വ്യത്യാസം →
11:19, 11 ജൂണ്‍ 2014-നു നിലവിലുണ്ടായിരുന്ന രൂപം
കുബേരന്‍
ഹൈന്ദവവിശ്വാസപ്രകാരം അഷ്‌ടദിക്‌പാലകന്മാരിൽ വടക്കേദിക്കിന്റെ അധിപതി. കുത്സിത(നിന്ദിത)മായ ബേര(ശരീര)ത്തോടുകൂടിയവന്‍ എന്നു പദാർഥം. കുബേരന്‍ ബ്രഹ്മാവിന്റെ പൗത്രനായ വിശ്രവസ്സിന്റെയും ഭരദ്വാജന്റെ പുത്രിയായ ഇളിബിള(ഇഡബിഡ)യുടെയും മകനാണ്‌; വൈശ്രവണന്‍ എന്നും ഐളബിളന്‍ എന്നും അറിയപ്പെടുന്നു. അളവറ്റ സമ്പത്തിനുടമയായ ഇദ്ദേഹത്തിനു ധനാധിപതി, വിത്തേശന്‍ എന്നിങ്ങനെയുള്ള പേരുകളും ഉള്ളതായി മഹാഭാരതത്തിൽ കാണുന്നു. കൃതയുഗത്തിൽ എല്ലാ ദേവന്മാരും ചേർന്നു കുബേരനെ സമുദ്രങ്ങളുടെയും നദികളുടെയും അധിപതിയാക്കി. പരമശിവന്‍ ഇദ്ദേഹത്തിന്റെ സുഹൃത്തായിത്തീർന്നു. ഇദ്ദേഹത്തിന്റെ തപസ്സുകൊണ്ടു പ്രസാദിച്ച ബ്രഹ്മാവ്‌ ശംഖനിധി, പദ്‌മനിധി, പുഷ്‌പകം എന്നീ വിമാനങ്ങള്‍ ഇദ്ദേഹത്തിനു സമ്മാനിച്ചു. വിശ്രവസ്സിന്റെ നിർദേശമനുസരിച്ച്‌ ത്രികൂടപർവതത്തിലുള്ള ലങ്കയിൽ താമസിച്ച കുബേരന്‍ യക്ഷന്മാരുടെയും കിന്നരന്മാരുടെയും രാജാവായിത്തീർന്നു. വിശ്രവസ്സിനു മറ്റൊരു ഭാര്യയിൽ ജനിച്ച രാവണനും കുംഭകർണനും ഇത്‌ ഇഷ്‌ടമായില്ല. തപസ്സുചെയ്‌തു ബ്രഹ്മാവിനെ പ്രസാദിപ്പിച്ചു വരംവാങ്ങിയ രാവണന്‍ കുബേരനെ ലങ്കയിൽ നിന്ന് ഓടിച്ചു പുഷ്‌പകവിമാനം കൈക്കലാക്കി. അന്നുമുതൽ കുബേരന്‍ ഗന്ധമാദനപർവതത്തിലെ അളകയിലായി താമസം. കുബേരസഭയ്‌ക്കു 100 യോജന നീളവും 70 യോജന വീതിയുമുണ്ടെന്നു മഹാഭാരതത്തിൽ പറഞ്ഞിരിക്കുന്നു.
ഒരിക്കൽ രാജാവായ മരുത്തന്‍ നടത്തിയ മഹേശ്വരയാഗത്തിൽ കുബേരനും യമനും വരുണനും പങ്കുകൊണ്ടു. യാഗാവസരത്തിൽ അവിടെ രാവണന്റെ ആഗമനം അറിഞ്ഞ ദേവന്മാർ പരിഭ്രമിച്ചു. അവർ ഓരോ വേഷം ധരിച്ചു ഓടി രക്ഷപ്പെട്ടു. അപ്പോള്‍ കുബേരന്‍ സ്വീകരിച്ചതു ഓന്തിന്റെ രൂപമായിരുന്നു. രാവണന്റെ പിടിയിൽ നിന്ന് രക്ഷപ്പെട്ടതിൽ സന്തുഷ്‌ടചിത്തനായിത്തീർന്ന കുബേരന്‍ ഓന്തിനു നിറം മാറാനുള്ള വരംകൊടുത്ത്‌ അനുഗ്രഹിച്ചുവത്ര. മൂന്നു കാലും എട്ടു പല്ലും ഒരു കണ്ണിനു പകരം മഞ്ഞ നിറത്തിലുള്ള ഒരു അടയാളവും ആണ്‌ വിരൂപനായ ഇദ്ദേഹത്തിന്റെ പ്രത്യേകത. മുരാസുരന്റെ മകളായ യക്ഷി ഭാര്യയും മണിഗ്രീവനും നളകൂബരനും പുത്രന്മാരും മീനാക്ഷി പുത്രിയുമാണ്‌. അലഹബാദ്‌ ശിലാലിഖിതത്തിൽ കുബേരനെന്ന ദേവരാഷ്‌ട്രരാജാവിനെ സമുദ്രഗുപ്‌തന്‍ മോചിപ്പിച്ചതായി പരാമർശമുണ്ട്‌. ആന്ധ്രപ്രദേശത്തെ വിശാഖപട്ടണമാണ്‌ ദേവരാഷ്‌ട്രമെന്നും അഭിപ്രായമുണ്ട്‌.
(മുതുകുളം ശ്രീധർ)
